Kantu Jeová kria família, el da mai ku pai responsabilidadi di kria ses fidjus. (Colossenses 3:20 ) É mai ku pai ki ten responsabilidadi di inxina ses fidju ama Jeová i bira un algen responsável. (2 Timóteo 1:5; 3:15 ) Tanbê, bu debe sabe kuzê ki sta na korason di bu fidju. É klaru ki bu izénplu é txeu inportanti. Midjór manera di inxina bu fidju Palavra di Deus é pô-l na bu korason primeru. — Salmo 40:8.

KUZÊ KI BÍBLIA TA FLA: ‘Sta prontu pa obi, má bu ka debe pâpia faxi’. (Tiago 1:19 ) É klaru ki bu krê pa bu fidju xinti avontádi pa pâpia ku bo. Es meste sabe ma bu sta prontu pa bu obi-s óras ki es meste pâpia. Si bu kria un anbienti di pas, ta ser más fásil es pâpia ku bo. (Tiago 3:18 ) Má, si es ta atxa ma bo é duru ô ma bu ta julga-s, poku-poku es pode para di pâpia ku bo. Ten paxénxa ku bus fidju, i sénpri fla-s ma bu ta ama-s. — Mateus 3:17; 1 Coríntios 8:1.

KUZÊ KI BU PODE FAZE:

• Sta prontu pa obi óras ki bus fidju meste pâpia.

• Pâpia ku bus fidju sénpri, ka sô óras ki kontise prublémas.

KUZÊ KI BÍBLIA TA FLA: ‘Kenha ki ta mostra ntendimentu na un asuntu ta ten bon rezultadu’. (Provérbios 16:20 ) Alvês sô kuzê ki bu fidju sta ta fla, ka ta txiga pa bu ntende kuzê ki el sta xinti di verdadi. É normal jóvens izajera na kuzê ki es ta fla ô fla kuzas ki es ka kria flaba. ‘Óras ki un algen responde antis di obi informason, é tolisi’. (Provérbios 18:13 ) Ka bu xatia faxi. — Provérbios 19:11.

KUZÊ KI BU PODE FAZE:

• Ka ta nporta kuzê ki bus fidju fla, ka bu korta-s konbérsu i nen ka bu reaji di manera izajeradu.

• Tenta lenbra modi ki bu ta xintiba kantu bu tinha ses idadi i kuzê ki éra inportanti pa bo.

KUZÊ KI BÍBLIA TA FLA: ‘Nha fidju, seta disiplina di bu pai i ka bu bandona lei di bu mai.’ (Provérbios 1:8 ) Jeová da mai ku pai autoridadi pa manda na ses fidjus. Nhos debe inxina nhos fidjus ruspeta i obi ku nhos. (Efésios 6:1-3 ) Fidjus pode xinti óras ki ses mai ku ses pai ka sta pensa di mésmu manera. (1 Coríntios 1:10 ) Si nhos ka ta konkorda na un asuntu, nhos tenta ka mostra-l na frenti di nhos fidjus, pamodi poku-poku es pode dexa di ruspeta nhos.

KUZÊ KI BU PODE FAZE:

• Nhos pâpia i nhos disidi djuntu modi ki nhos ta disiplina nhos fidjus.

• Si bu ta pensa diferenti di bu maridu ô bu mudjer sobri modi ki nhos ta kria nhos fidjus, nhos tenta ntende opinion di kunpanheru.

KUZÊ KI BÍBLIA TA FLA: ‘Iduka mininu na kaminhu ki el debe anda’. (Provérbios 22:6 ) Iduka bus fidju dretu, é ka un kuza ki ta kontise atoa. Bu meste faze un planu, ki ta inklui disiplina bus fidju. (Salmo 127:4; Provérbios 29:17 ) Disiplina é ka sô da kastigu, má tanbê djuda bus fidju ntende pamodi ki bu kria kes régra. (Provérbios 28:7 ) Tanbê, inxina-s ama Palavra di Jeová i ntende se konsedjus. (Salmo 1:2 ) Kel-li ta djuda-s ten un konsénsia trenadu. — Hebreus 5:14.

KUZÊ KI BU PODE FAZE:

• Inxina bus fidju odja Deus sima ses amigu, ki es pode kunfia na el.

• Djuda-s sabe modi ki es ta da kónta ma un konportamentu é mariadu i modi ki es ta ivita-s, sima kes kuza ki ta sta na internet i na redi sosial. Inxina-s modi ki es ta ivita kes algen ki ta abuza di mininu.