1, 2. Kuzê ki nu pode faze pa nu kontinua ta ama Deus?

 NOS tudu nu krê ser fórti i nu krê ten bon saúdi. Pur isu, nu ta tenta kume kumida ki é bon pa saúdi, nu ta faze izersísiu i nu ta kuida di nos korpu. Faze kes kuza li ta iziji sforsu, má nu ta ten bons rezultadu si nu ka dizisti. Gósi, nu sta ben odja un otu manera ki nu meste ser fórti i ten un bon saúdi.

² Dja nu konxe Jeová i kel-li é un bon komésu. Má, nu meste kontinua ta bira nos amizadi ku el más fórti. Kantu Judas nkoraja kristons pa es ‘kontinua na amor di Deus’, el splika modi ki es ta fazeba kel-la. El fla: ‘Nhos bira nhos fé ki é santu más fórti’. (Judas 20, 21 ) Nton, modi ki nu pode bira nos fé más fórti?

3-5. (a) Kuzê ki Satanás ta krê pa bu pensa sobri leis di Jeová? (b) Kuzê ki bu ta atxa di leis i prinsípius di Jeová?

³ É inportanti bu ten sertéza ma manera ki Jeová ta faze kuzas é sénpri midjór. Satanás krê pa bu pensa ma leis di Deus é difísil dimás di sigi i ma bu ta ser filís si bu disidi pa bu kabésa kuzê ki é dretu ô  mariadu. Désdi jardin di Éden, Satanás sta ta poi pesoas ta pensa di kel manera li. (Génesis 3:1-6 ) I ti inda el sta tenta faze kel-li.

⁴ Má, Satanás ten razon? Si nu sigi leis di Jeová nu sta perde algun kuza? Nau. Imajina ma bu sta ta anda na un parki bunitu. Bu odja ma sta un sérka altu ta tapa un párti di kaminhu. Talvês bu ta pensa: ‘Pamodi ki podu kel sérka la?’ Má lógu dipôs, bu ta obi barudju di un lion di kel otu ladu di sérka. I gósi, kuzê ki bu ta atxaba di kel sérka? Si kel proteson ka staba la, bu ta sérba un bon almosu pa kel lion! Di mésmu manera, prinsípius di Jeová é sima kel sérka i Diabu é sima kel lion. Bíblia ta fla: ‘Nhos fika atentu, nhos mante sienti! Nhos inimigu ki é Diabu, sta ta ronda nhos sima un lion ku txeu fómi, ki sta djobe algen pa satadja.’ — 1 Pedro 5:8.

⁵ Jeová krê pa nu ten kel midjór vida ki ten. El ka krê pa Satanás ngana-nu. É pur isu ki Jeová da-nu leis i prinsípius pa proteje-nu i pa djuda-nu ser filís. (Efésios 6:11 ) Tiagu skrebe: ‘Kel ki ta djobe ku kuidadu pa lei perfetu ki ta liberta i el ta kontinua na el, el ta ser filís na kuzas ki el ta faze.’ — Tiago 1:25.

 6. Kuzê ki ta da-nu sertéza ma Jeová sabe kuzê ki é midjór pa nos?

⁶ Óras ki nu ta sigi orientasons di Jeová, nos vida ta midjora i nos amizadi ku el ta fika más fórti. Pur izénplu, Jeová ta konvida-nu pa nu faze orason sénpri. I nu ta xinti dretu óras ki nu ta faze kel-la. (Mateus 6:5-8; 1 Tessalonicenses 5:17 ) Óras ki nu ta sigi se orientason di djunta pa adora-l i pa da kunpanheru koraji, nu ta fika kontenti. Tanbê nu ta fika  kontenti óras ki nu ta faze nos midjór na trabadju di pregason i inxina otus. (Mateus 28:19, 20; Gálatas 6:2; Hebreus 10:24, 25 ) Si nu pensa modi ki kes kuza li ta djuda-nu, nos fé ta fika más fórti i ta da-nu más sertéza ma Jeová sénpri sabe kuzê ki é midjór pa nos.

7, 8. Kuzê ki ta djuda-nu ka fika preokupadu ku prublémas ki pode ben kontise na futuru?

⁷ Talvês nu ta fika preokupadu ta pensa na prublémas difísil ki nu pode ben pasa na futuru. Si algun dia bu xinti si, lenbra di kuzê ki Jeová fla: ‘Ami, Jeová, mi é bu Deus, Kel ki ta inxina-u kuzê ki é midjór pa bo, Kel ki ta gia-u na kaminhu ki bu debe anda. Éra bon si bu prestaba atenson na nhas  mandamentu. Nton, bu pas ta sérba sima un riu, i bu justisa sima óndias di mar.’ — Isaías 48:17, 18.

⁸ Óras ki nu ta obi ku Jeová, nos pas ta bira sima un riu ki nunka ka ta seka. I nos justisa ô nos manera sértu di aji, ta bira sima óndias di mar ki ka ta para di kebra na areia. Ka ta nporta kuzê ki kontise na nos vida, nu pode ser fiel. Bíblia ta promete: ‘Bota bu karga riba Jeová, i el ta anpara-u. Nunka el ka ta dexa pa justu kai.’ — Salmo 55:22.

9, 10. Kuzê ki siginifika ser un kriston maduru?

⁹ Sima bu amizadi ku Jeová ta fika más fórti, bu ta ‘bira un algen más maduru’. (Hebreus 6:1 ) Kuzê ki siginifika ser un algen maduru?

¹⁰ Nu ka ta bira un kriston maduru sô pamodi dja nu sta más bédju. Pa nu ser un algen maduru, Jeová debe ser nos midjór Amigu i nu debe odja kuzas sima el ta odja. (João 4:23 ) Polu skrebe: ‘Kes ki ta vive di akordu ku karni ta konsentra ses menti na kuzas di karni; má kes ki ta vive di akordu ku spritu, ta konsentra na kuzas di spritu.’ (Romanos 8:5) Un algen maduru ka ta konsentra se vida sô na pasa sábi ô na kuzas material. Má, el ta konsentra na sirbi Jeová i el ta toma bons disizon na vida. (Provérbios 27:11; lé Tiago 1:2, 3.) El ka ta dexa otus algen pô-l ta faze kuzas mariadu. Un algen maduru sabe kuzê ki é dretu i el sta disididu na faze-l.

11, 12. (a) Kuzê ki Polu fla sobri ‘kapasidadi de pensa’? (b) Pamodi ki nu pode fla ma bira un kriston maduru é sima bira un atléta?

¹¹ Nu meste faze txeu sforsu pa nu ser un algen  maduru. Apóstlu Polu skrebe: ‘Kumida fórti é pa algen grandi, pa kes ki ta trena ses kapasidadi di pensa óras ki es ta uza-l pa sabe kuzê ki é dretu i kuzê ki é mariadu.’ (Hebreus 5:14 ) Kel palavra ‘trena’ ta pô-nu ta pensa na un atléta.

¹² Óras ki nu ta odja un atléta na un konpitison, nu sabe ma el gasta txeu ténpu i el faze txeu sforsu pa el konsigi kuzê ki el faze. Má, el ka nase un atléta. Pur izénplu, óras ki un mininu nase, el ka ta sabe uza dretu se brasu ku se pérna. Má poku-poku, el ta prende pega na algun kuza i el ta kumesa ta anda. Ku ténpu, si el kontinua ta trena, el pode bira un atléta. Di mésmu manera, nu meste tra ténpu i trena pa nu ser un kriston maduru.

13. Pa nu prende pensa sima Jeová, kuzê ki nu debe pergunta nos kabésa?

¹³ Na kel livru li, nu odja modi ki nu pode pensa sima Jeová i odja kuzas sima el ta odja. Nu prende ama i da valor pa se leis ku se prinsípius. Óras ki nu ta toma disizons, nu debe pergunta nos kabésa: ‘Ki leis ô prinsípius N pode sigi na kel situason li? Modi ki N pode faze sima kel prinsípiu ta fla? Kuzê ki Jeová ta spéra pa N faze?’ — Lé Provérbios 3:5, 6; Tiago 1:5.

14. Kuzê ki nu meste faze pa nos fé fika más fórti?

¹⁴ Nu kontinua ta faze di tudu pa nos fé na Jeová bira más fórti. Sima kume kumida ki é bon pa saúdi ta djuda-nu ten un korpu fórti, tanbê prende sobri Jeová ta djuda-nu ten un fé fórti. Óras ki nu kumesa ta studa Bíblia, nu ta prende kes verdadi prinsipal  sobri Jeová i se manera di faze kuzas. Má ku ténpu, nu meste ntende kes asuntu más difísil. É kel-la ki Polu krê flaba kantu el fla: ‘Kumida fórti é pa algen grandi’. Óras ki nu faze sima nu prende, nu ta ganha sabedoria. Bíblia ta fla: ‘Sabedoria é kuza más inportanti’. — Provérbios 4:5-7; 1 Pedro 2:2.

15. Pamodi ki é inportanti nu ama Jeová i nos irmons di korason?

¹⁵ Un algen pode ser fórti i ten un bon saúdi. Má pa el kontinua si, el sabe ma el debe kontinua ta kuida dretu di se kabésa. Di mésmu manera, un algen maduru sabe ma el meste faze txeu sforsu pa el mante un amizadi fórti ku Jeová. Polu fla: ‘Nhos kontinua ta djobe si nhos sta na fé; nhos kontinua ta prova kuzê ki nhos é di verdadi.’ (2 Coríntios 13:5) Nu meste ten un fé fórti, má sô kel-la ka ta txiga. Nos amor pa Jeová i pa nos irmons ten ki kontinua ta bira más fórti. Polu fla: ‘Si N ten konhisimentu, i si N ten tudu fé, ti di muda montanhas, má si N ka ten amor, ami é ka nada.’ — 1 Coríntios 13:1-3.

16. Modi ki Satanás krê pa nu pensa?

¹⁶ Satanás krê pa nu pensa ma nunka nu ka ta konsigi faze vontadi di Jeová sima el ta krê. El krê pa nu xinti dizanimadu i pa nu pensa ma nos prublémas ka ten soluson. El ka krê pa nu kúnfia na nos irmons na fé i nen el ka krê pa nu ser filís. (Efésios 2:2 ) Satanás sabe ma pensamentus mariadu pode prujudika nos kabésa i nos amizadi ku Deus. Má Jeová da-nu un kuza ki ta djuda-nu luta kóntra pensamentus mariadu. El da-nu speransa.

17. Pamodi ki speransa é inportanti?

 ¹⁷ Na 1 Tessalonicenses 5:8, Bíblia ta fla ma nos speransa é sima un kapaseti ki ta proteje un trópa na un géra. Bíblia ta txoma kel kapaseti di ‘speransa di salvason’. Speransa na promésas di Jeová ta proteje nos menti i ta djuda-nu luta kóntra pensamentus mariadu.

18, 19. Modi ki speransa da Jizus forsa?

¹⁸ Speransa ki Jizus tinha da-l forsa. Na kel últimu noti antis di el móre, el lida ku txeu situason difísil un tras di kel otu. Un di se amigus trai-l, otu ti fla ma el ka konxeba el. Inda otus bandona-l i es fuji. Se própi povu fika kóntra el i es manda pa tortura-l ti ki el móre. Kuzê ki djuda Jizus lida ku tudu kes kuza li? Bíblia ta fla: ‘Pa alegria ki el mostradu, el aguenta  mórti na un staka di tortura, ta dispreza vergónha, i el xinta na ladu direita di tronu di Deus.’ — Hebreus 12:2.

¹⁹ Jizus sabia ma si el kontinuaba fiel, el ta daba glória pa se Pai i el ta provaba ma Satanás é mintirozu. Tanbê el sabia ma faltaba poku ténpu pa el staba otu bês djuntu ku se Pai na Séu. Kel speransa djuda-l aguenta firmi. Sima Jizus, nu ten ki konsentra na nos speransa. Kel-li ta djuda-nu aguenta firmi ka ta nporta kuzê ki pode kontise.

20. Kuzê ki ta djuda-u luta kóntra pensamentus mariadu?

²⁰ Jeová sabe ma bu ten fé i ma bu sta aguenta firmi. (Isaías 30:18; lé Malaquias 3:10.) El promete ma el ta faze ‘kes dizeju di bu korason.’ (Salmo 37:4 ) Pur isu, konsentra na bu speransa. Satanás krê pa  bu perde bu speransa i pa bu pensa ma promésas di Jeová nunka ka ta kunpri. Má, ka bu dexa pensamentus mariadu toma kónta di bo! Si bu xinti ma bu sta perde speransa, pidi Jeová pa djuda-u. Lenbra di kuzê ki Filipenses 4:6, 7 ta fla: ‘Ka nhos fika preokupadu dimás ku algun kuza, má pa tudu kuza, nhos faze orason ku súplika, djuntu ku agradesimentu, pa nhos faze nhos pididu pa Deus; i pas di Deus, ki ningen ka ta konsigi ntende, ta guarda nhos korason i nhos pensamentu ku ajuda di Kristu Jizus.’

21, 22. (a) Kuzê ki Jeová promete pa futuru? (b) Kuzê ki bu sta disididu na faze?

²¹ Sénpri tra ténpu pa bu pensa na kel futuru rei di sábi ki Jeová promete. Ka ta dura tudu algen na Téra ta ben adora Jeová. (Apocalipse 7:9, 14 ) Pensa modi ki vida ta ben ser na kel mundu novu. Ta ben ser mutu más sábi di ki kel ki nu ta imajina! Satanás ku se dimónis i tudu maldadi ta dexa di izisti. Nunka más bu ka ta fika duenti nen bu ka ta móre. Tudu dia bu ta labanta xeiu di forsa i filís pamodi bu sta la. Tudu algen ta ben trabadja djuntu pa bira Téra na un paraízu. Tudu algen ta ben kume un bon kumida i es ta mora na un lugar suguru. Ningen ka ta ben faze maldadi ô violénsia. Tudu algen ta ben trata kunpanheru ku bondadi. Ku ténpu, tudu algen na Téra ta ben ten ‘liberdadi ku glória di fidjus di Deus.’ — Romanos 8:21.

²² Jeová krê pa bu ser se midjór Amigu. Pur isu, faze tudu ki bu pode pa bu obi ku Jeová i pa nhos amizadi bira más fórti. Asi, nos tudu nu ta kontinua ta ama Deus pa tudu ténpu. — Judas 21.