Satanás ku se dimónis sénpri foi mau i prigozu. Satanás tevi koraji di mata kes animal i sérvus di Jó, ki éra un ómi fiel. Dipôs, el mata kes 10 fidju di Jó i el poi un ‘béntu fórti’ ta distrui kel kaza ki es staba na el. Tanbê el ataka Jó ku ‘uns frunku ki ta da txeu dór, di se sóla pé ti riba kabésa.’ — Jó 1:7-19; 2:7.

Na ténpu di Jizus, dimónis poi alguns algen ta fika mudu i ségu. (Mateus 9:32, 33; 12:22) Es tormenta un ómi i es pô-l ta lanha se korpu ku pédra. (Marcos 5:5) Tanbê es poi un mininu ta grita, es da-l na txon i es pô-l ‘ta da un ataki fórti.’ — Lucas 9:42.

Na nos ténpu, Satanás ku se dimónis ta mata algen sima es ta fazeba antis. Na verdadi, kes kuza mau ki es ta faze bira inda más txeu dipôs ki es tradu di Séu. Notísias na mundu interu ta mostra modi ki es é mau. Es ta poi algen ta fika duenti, es ta ataka algen di noti, es ka ta dexa-s durmi i es ta pô-s ta ten sonhus ki ta da algen medu. Es ta faze pesoas abuzu seksual, es ta poi alguns algen ta bira dodu, es ta pô-s ta mata otus algen ô ta mata ses kabésa.

Un sinhora ki txoma Lintina, ki ta mora na Suriname, fla ma un dimóni ô spritu mau mata 16 algen di se família i es tormenta-l duránti 18 anu. Dja el kustuma odja ku se odju kes kuza li ta kontise i el fla: “Dimónis gosta di tortura algen ti ki es mata-s.”

Má Jeová ten puder di proteje se sérvus di kes ataki di Satanás. — Provérbios 18:10.