Modi ki N atxa respósta pa injustisas ki N ta odjaba

Kontadu pa Ursula Menne

Sénpri N tinha gana di odja tudu algen ta tratadu ku justisa. Má pamodi kel-li, N podu prézu na Alimanha Oriental Kumunista. Imajina gó, justu na kadia ki N bai prende sobri un mundu sen injustisa. Dexa-m splika midjór.

N NASE na anu 1922 na un sidadi di Alimanha, ki txoma Halle. Kel sidadi li ten más di 1.200 anu di stória ki sta skrebedu. El ta fika uns 200 kilómetru lonji di Berlin. Halle foi un di kes primeru lugar ki parse kes tradison di relijion protestanti. Nha irman, Käthe, nase na anu 1923. Nha pai ta sirbiba na trópa i nha mai ta kantaba na tiatu.

Kel vontadi di kaba ku injustisa, N traze-l di nha pai. Pur izénplu, el kunpra un lója kantu ki el sai di trópa. Dja ki maioria di se klientis éra póbri, el ta xintiba péna di es i el ta bendeba es fiadu. Má kel-la da se lója na pédra. N devia prende ku kel-li ma luta kóntra injustisa é mutu más konplikadu di ki kel ki ta parse. Má kel gana ki jóvens ten di muda mundu é un kuza difísil di kontrola.

N traze taléntu pa múzika di nha mai. Mi ku Käthe nu prende sobri múzika, kanta i badja ku nos mai. Mi éra un mininu animadu i mi ku nha irman nu tevi un vida sábi ti anu 1939.

Komésu di un vida difísil

Dipôs ki N tirmina skóla, N bai pa skóla di balé i é la tanbê ki N prende Ausdruckstanz, ki é un tipu di badju ki algen ta mostra modi ki el ta xinti, i kenha ki inxina-m kel manera di badja li é Mary Wigman, ki foi un di kes primeru algen ki badja kel stilu li. Tanbê N kumesa ta pinta. Nton, komésu di nha juventudi foi sábi i animadu i N prende txeu kuza. Má tudu kuza muda na anu 1939 kantu Sugundu Géra na Mundu kumesa. Otu disgrasa kontise na anu 1941, kantu nha pai móre di tuberkulozi.

Géra é un pezadélu. N tinha sô 17 anu kantu ki géra kumesa. N pensa ma tudu algen na mundu staba dodu. N odja un monti di algen ki antis tinha bon konportamentu ta aji sima algen dodu, pamodi es fika di ladu di kes nazista. Dipôs ben mizéria, mórti i distruison. Un bonba kaba ku nos kaza i txeu algen di nos família móre na géra.

Kantu géra kaba na anu 1945, inda mi ku nha mai i nha irman ta moraba na Halle. Dja N staba kazadu i N tinha un fidju-fémia, sô ki nha kazamentu ka staba ta bai dretu. Pur isu, mi ku nha maridu sipara. N ta badjaba i N ta pintaba pa N sustenta nha fidju-fémia.

Dipôs ki géra kaba, Alimanha fika divididu na kuatu párti. I nos sidadi fika na kel párti di govérnu di Union Suviétika, pur isu tudu algen tevi ki kustuma ku govérnu Kumunista. Na anu 1949, kel párti di Alimanha undi ki nu ta moraba, ki éra konxedu pa Alimanha Oriental, fika ta txomadu Repúblika Demokrátika di Alimanha.

Modi ki vida éra na govérnu Kumunista

Na kel ténpu nha mai fika duenti i N tinha ki kuida di el. N ranja un trabadju na un skritóriu di govérnu na kel sidadi. Na kel ténpu la tanbê, N konxe alguns studanti ki rabela kóntra kes injustisa ki staba ta fazedu. Pur izénplu, un jóven ka setadu na universidadi pamodi se pai antis éra di partidu nazista. N konxeba kel jóven dretu pamodi nu ta pasaba txeu ténpu djuntu na kuzas di múzika. N fika ta pergunta: ‘Pamodi ki el ten ki paga pa éru di se pai?’ N fika ta pasa más ténpu ku kes studanti i N disidi partisipa na alguns manifestason. Un bês N txiga ti di prega uns folhetu na un skada ki ta fikaba na entrada di tribunal di la.

Mi éra sekretária di Kumison di Pas na kel sidadi, pur isu N tinha ki skrebe alguns karta ki es ta fazeba, má ki N ka ta konkordaba ku es pamodi kel vontadi di odja justisa ta fazedu ki N tinha. Un bês pamodi kuzas di pulítika, kel Kumison manda un publisidadi kumunista pa un sinhor di idadi, ki ta moraba na Alimanha Osidental, sô pa ranja próvas pa el akuzadu. N fika uma xatiadu ku injustisa ki kel ómi staba ta ba pasa pa el pamodi kes publisidadi, pur isu N sukundi-s na skritóriu i ti oji kes kuza ka mandadu.

“Kel piór algen di kel lugar” da-m speransa

Na mês di junhu di 1951, dôs ómi entra na nha skritóriu i es fla-m: “Bu sta prézu.” Es leba-m pa un kadia ki éra konxedu pa Roter Ochse, ô Boi Burmedju. Un anu dipôs, N kondenadu di rabela kóntra govérnu. Un studanti traíba mi i el ba fla pulísia ma mi ki poba kes folhetu na tribunal. Kel julgamentu foi sô finjimentu pamodi ningen ka liga kuzê ki N fla pa difende nha kabésa i N dadu 6 anu di kadia. Na kel ténpu, N fika duenti i N podu na kel lugar di kadia ki es ta poba kes algen duenti, djuntu ku más 40 mudjer. Kantu N odja tudu kes algen diprimidu, N dizorienta. N kóre i N kumesa ta da soku na pórta dizusperadu.

Kel guarda fla-m: “Kuzê ki bu krê?”

N grita: “Tra-m di li, sikrê bu pô-m na un lugar mi sô, má N meste sai di li!” É klaru ki nen el ka liga-m. Dipôs N odja un mudjer ki éra diferenti di kes otu. N odja un pas na ses odju. Nton, N bai xinta djuntu ku el.

N fika dimiradu kantu el fla-m: “Si bu krê xinta djuntu ku mi, é midjór bu toma kuidadu. Es ta atxa ma mi é kel piór algen ki sta li pamodi mi é Tistimunha di Jeová.”

Na kel ténpu N ka sabia ma pesoas ta atxaba ma Tistimunhas di Jeová éra inimigu di govérnu Kumunista. Kuzê ki N sabia é ma dôs Studanti di Bíblia (sima es ta txomaba Tistimunhas di Jeová na kel ténpu) ta vizitaba nha pai manenti kantu mi éra mininu. N ta lenbra ti di obi nha pai ta fla: “Kel ki Studantis di Bíblia ta fla é verdadi!”

N xinti aliviadu i N txora kantu N konxe kel mudjer dretu, ki txomaba Berta Brüggemeier. N fla-l: “Favor pâpia ku mi sobri Jeová.” Di la pa dianti nu pasa txeu ténpu djuntu i sénpri nu ta papiaba sobri Bíblia. N prende txeu kuza, pur izénplu N prende ma Jeová é Deus verdaderu i ma el é un Deus di amor, justisa i pas. N prende tanbê ma el ta ben kaba ku tudu maldadi ki ómis mau ten stadu ta faze. Salmo 37:10, 11 ta fla: ‘I ka ta dura kes algen mau ta ben dexa di izisti. . . Má, kes algen mansu ta ben toma kónta di Téra i es ta ben ten txeu alegria ku txeu pas.’

Kantu N sai di kadia

N pasa uns sinku anu na kadia i dipôs N libertadu na anu 1956. Sinku dia dipôs, N sai di Repúblika Demokrátika di Alimanha i N bai pa Alimanha Osidental. Na kel ténpu, dja N tinha dôs fidju-fémia, ki txoma Hannelore ku Sabine, i es bai ku mi. É la ki mi ku nha maridu divôrsia i N torna nkontra ku Tistimunhas di Jeová. Sima N ba ta studa Bíblia, N da kónta ma N meste fazeba txeu mudansa pa N vive di akordu ku lei di Jeová. N faze kes mudansa i N batiza na anu 1958.

Dipôs N kaza otu bês, sô ki di es bês, N kaza ku un Tistimunha di Jeová, ki txomaba Klaus Menne. Mi ku Klaus nu tinha un kazamentu rei di sábi i nu tevi dôs fidju, Benjamin ku Tabia. Má dja ten uns 20 anu, Klaus móre di un manera tristi na un asidenti i nunka más N ka torna kaza. Má kel speransa ki N ten di resureison ta konsola-m txeu pamodi N sabe ma mortus ta torna ben vive na Paraízu li na Téra. (Lucas 23:43; Atos 24:15) Otu kuza ki ta konsola-m txeu é sabe ma tudu nhas kuatu fidju ta sirbi Jeová.

N prende na nha studu di Bíblia ma é sô Jeová ki pode traze justisa di verdadi. El é ka sima ómis, pamodi el ta konsigi da kónta di tudu kuza ki ta kontise, ti kes kuza ki ninhun ómi ka ta konsigi odja. Sabe di kel-li ta da-m un pas déntu mi, mésmu gósi, prinsipalmenti óras ki N ta pasa pa algun injustisa. Eclesiastes 5:8 ta fla: ‘Si bu odja na bu zóna, un póbri ta abuzadu di el ô violason di justisa i di kel ki é dretu, ka bu fika spantadu. Pamodi kel ki ten autoridadi sta ta odjadu pa otu algen ki é más grandi ki el i ten otus algen ki inda ten más autoridadi ki es.’ É klaru ki kel ‘algen ki é más grandi’ é nos Kriador. Hebreus 4:13 ta fla: ‘Tudu kuza sta nu i klaru dianti di odju di kel ki nu ten ki presta kónta na el.’

Ta lenbra kuazi 90 anu di vida

Alvês alguns algen ta pergunta-m modi ki vida éra dibaxu di govérnu Nazista i Kumunista. Ninhun di es ka éra fásil. I kes dôs manera di governa li, sima tudu kes otu, sô ta mostra ma ómis ka ta pode governa ses kabésa. Bíblia ta fla kel verdadi li di manera dirétu: ‘Ómi ta manda na ómi pa se disgrasa.’ — Eclesiastes 8:9.

Kantu mi éra jóven i sen spiriénsa, N ta atxaba ma ómis ten kapasidadi pa governa ku justisa. Gósi N ta ntende midjór modi ki kuzas é. É sô nos Kriador ki ta pode traze un mundu justu di verdadi. I el ta ben faze kel-li óras ki el kaba ku tudu algen mau i el poi govérnu di Téra na mô di se Fidju, Jizus Kristu, ki sénpri ta poi interesis di otus pa frenti di kel di sel. Bíblia ta fla kel-li sobri Jizus: ‘Nhu ama justisa i nhu ôdia kel ki é kóntra lei.’ (Hebreus 1:9) N ta xinti txeu gratidon pamodi Deus atrai-m pa es Rei justu i rei di dretu, i pamodi N ten speransa di ben vive pa tudu ténpu óras ki el ben governa!

[Fotu]

Mi ku nhas fidju-fémia, Hannelore ku Sabine, dipôs ki nu txiga na Alimanha Osidental

[Fotu]

Mi ku nha fidju, Benjamin, i se mudjer Sandra gósi