Organizason di Nasons Unidu sta insentiva tudu algen pa kolabora ku kunpanheru, pa ruspeta direitus di ómi i pa proteje nos planéta. Pamodi? Un revista a ki Nasons Unidu publika fla ma “mudansas di klima, krimi, injustisa ki sta bira kada bês más txeu, géras, rafujiadus, terorismu, duénsas ki ta pega i otus kuza sima kes-li sta ta afeta pesoas na mundu interu.”

Inda otus algen bai más lonji. Es ta difende kel ideia di ten un govérnu sô na mundu interu. Alguns di kes algen li é kel filózofu, poéta i pulítiku italianu, Dante (1265 ti 1321) i fíziku, Albert Einstein (1879 ti 1955). Dante, ta kriditaba ma ka ta podia ten pas pa txeu ténpu na un mundu ki sta divididu pa pulítika. Ti el uza kes palavra di Jizus: ‘Tudu reinu ki sta divididu kóntra el mê ta kai’. — Lucas 11:17.

Albert Einstein skrebe un karta ki tudu algen ta podia lé pa Asenbleia Jeral di Nasons Unidu lógu dipôs di fin di Sugundu Géra na Mundu interu kantu uzadu dôs bonba atómika. El fla: “Nasons Unidu debe aji faxi pa faze tudu kel ki meste pa kria tudu kondison pa pode ten suguransa na mundu interu.”

Má, kes pulítiku ki ta ba fazeba párti di kel govérnu la, ta sérba onéstu, kualifikadu i bondozu, sikrê ku tudu kel puder ki es ta tinha? Ô es ta konportaba di mésmu manera ki kes mau governanti? Kes pergunta li ta faze-nu lenbra kes palavra di un storiador di Inglatéra b ki fla: “Puder ten tendénsia di straga algen, i si un algen ten tudu puder el ta straga konpletamenti.”

Má, pa umanus ten pas di verdadi nos tudu nu meste sta unidu. Kuzê ki nu ten ki faze pa nu konsigi kel obijetivu li? Nu ta konsigi alkansa kel obijetivu li própi? Bíblia ta fla ma sin. Nu pode i el sta ben kontise. Modi? Ken ki ta ben traze kel mudansa li é ka un govérnu di ómi ki pode bira koruptu. Má é govérnu di Deus. Kel govérnu li ta ben mostra-nu ma é sô Deus ki ten direitu di governa, envês di ómis. Ki govérnu é kel-li? Bíblia ta fla ma é ‘Reinu di Deus’. — Lucas 4:43.

Jizus Kristu staba ta pensa na Reinu di Deus kantu el fla na kel orason di Pai Nosso: ‘Faze bu Reinu ben. Pa bu vontadi fazedu na Téra.’ (Mateus 6:9, 10) Sin, Reinu di Deus ta ben garanti ma vontadi di Deus ta ben fazedu na Téra, envês di vontadi di ómis ki ta pensa sô na ten puder i na ses kabésa.

Reinu di Deus tanbê ta txomadu di ‘Reinu di Séu’. (Mateus 5:3) Pamodi? É pamodi el ta ben governa Téra la di Séu. Pensa na kuzê ki kel-la siginifika. Kel govérnu li ka ta ben meste di dinheru i nen el ka ta ben dipende di inpostu pa el pode funsiona. Kes algen ki kel Reinu li ta ben governa ta ben xinti txeu aliviadu!

Tudu reinu meste ten un rei ô un rainha. Reinu di Deus ten un Rei, ki é Jizus Kristu. Deus da Jizus autoridadi pa governa. Bíblia ta fla kel-li sobri Jizus:

• ‘Govérnu ta ben sta riba di se onbru. Omentu di se govérnu i di pas ka ta ten fin’. — Isaías 9:6, 7, King James Version.

•   ‘El dadu autoridadi, ónra i un reinu, asi pa povus, nasons i línguas sirbi-l. Se govérnu ka ta distruídu.’ — Daniel 7:14.

• ‘Reinu di mundu dja bira Reinu di nos Sinhor [Deus] i di se Kristu’. — Apocalipse 11:15.

Reinu di Deus ta ben kunpri kel orason di Jizus, i el ta ben faze tudu kel ki Deus sénpri krê fazeba pa Téra. Ku kel govérnu li tudu algen ta ben prende kuida di planéta Téra, pa el pode ser otu bês un lugar livri di poluison i xeiu di vida.

I más inportanti, Reinu di Deus ta ben inxina tudu algen na Téra. Tudu es ta ben prende kes mésmu lei di konportamentu. Tudu algen ta ben ruspeta kunpanheru i es ta ben vive unidu. Odja kuzê ki Isaías 11:9 ta fla sobri kel ténpu: ‘Ka ta fazedu ninhun stragu, pamodi Téra ta intxi di konhisimentu di Jeová sima agu ta kubri mar.’

Tudu algen na Téra ta ben bira un povu ki ta ama pas, ki é un kuza ki Nasons Unidu ka ta konsigi faze. Salmo 37:11 ta fla ma tudu algen ‘ta ben ten txeu alegria ku txeu pas.’ Ka ta dura palavras sima “krimi”, “poluison”, “pobréza” i “géra” ka ta ben faze párti di nos vida. Má ki ténpu ki Reinu di Deus ta ben kumesa ta governa Téra? Modi ki kel-li ta ben kontise? Kuzê ki bu meste faze pa bu resebe bensons di kel Reinu? Nu ta ben odja respósta di kes pergunta li.