Palavra disiplina pode siginifika gia ô inxina. Alvês, el ta nvolve koriji un konportamentu mariadu di bu fidju. Má txeu bês, el ta nvolve inxina bu fidju sobri kuzê ki é dretu i mariadu. Kel-li ta djuda-l prende toma bons disizon.

Na kes últimu anu, disiplina kuazi dja dizaparse na alguns família. Alguns pai ku mai para di koriji ses fidju pamodi es ta atxa ma kel-li pode poi ses fidju ta xinti ma es ka ten txeu valor. Má, kes pai ku mai ki ta mostra sabedoria, ta poi ses fidju régras ikilibradu i ta trena-s pa es obi ku kes régra.

“Mininus ta meste pa fla-s kuzê ki es pode i ki es ka pode faze, asi pa es pode da bons ómi ô bons mudjer. Sen disiplina, es ta fika sima un barku sen lémi ki un óra ô otu pode perde rumu ô ti rabida.” — Pamela.

Kunpri sénpri ku kel ki bu fla. Si bu fidju ka obi ku bus régra, da-l kel kastigu ki dja bu flaba el. Má tanbê, sta prontu pa ilojia-l óras ki el faze sima bu fla-l.

“Sénpri N ta ilôjia nhas fidju pamodi es ta obi ku mi na kel mundu li ki maioria di algen ka ta obi ku régras. Pamodi kes ilojiu ki N ta da-s, ta fika más fásil es seta algun kastigu óras ki meste.” — Christine.

KONSEDJU DI BÍBLIA: ‘Kel ki algen símia, é kel ki tanbê el ta kodje.’ — Gálatas 6:7.

Ser ikilibradu. Óras ki bu ta disiplina bu fidju, analiza se idadi, se kapasidadi i si kel kuza ki el faze mariadu é gravi ô nau. Kel disiplina ki bu ta da-l, ta ten más rezultadu si bu da-l un kastigu ki ten aver ku kel kuza mariadu ki el faze. Pur izénplu, si el ka obi ku bus régra sobri uza telemóvel, bu pode toma-l el ô bu pode pô-l alguns limiti duránti algun ténpu. Má tanbê, ivita fika xatiadu pamodi algun kuza ki é ka inportanti, sô pamodi bu ka gosta di kel kuza.

“N ta tenta ntende si nha fidju ka obi ku mi pamodi el ka krê ô sô pamodi el aji sen pensa. Óras ki bu fidju sénpri ta faze un kuza mariadu ki ta mostra un frakéza ki meste koriji, é diferenti di óras ki sô el da un éru ki bu ten ki txoma-l atenson.” — Wendell.

KONSEDJU DI BÍBLIA: ‘Ka nhos irita nhos fidjus, pa es ka fika dizanimadu.’ — Colossenses 3:21.

Mostra amor. É más fásil fidjus seta disiplina i aji di akordu ku el, si es sabe ma ses pai ku ses mai da-s kel kastigu pamodi es ta ama-s.

“Óras ki nos fidju matxu ta fazeba algun kuza mariadu, nu ta djudaba el ten sertéza ma nu staba kontenti ku tudu kes kuza dretu ki dja el fazeba antis. Nu ta splikaba el ma kel se fadja ka ta mudaba kel ki nu ta pensaba sobri el, si el sforsaba pa midjora i ma nu ta staba la pa djuda-l konsigi kel-la.” — Daniel.

KONSEDJU DI BÍBLIA: ‘Amor ten paxénxa i el é bon’. — 1 Coríntios 13:4.