Duránti un monti anu, ningen ka sabia respósta di kel pergunta li. Pur isu, milhons di algen móre pamodi duénsas ki ta spadja faxi. Dipôs sientistas ben atxa verdadi. Es diskubri ma txeu duénsa ki algen ta panha é pamodi mikróbius ô vírus. Dipôs ki es diskubri kel un verdadi li, es konsigi djuda pesoas proteje i kura di un monti duénsa. Pur isu, bilhons di algen oji ta pode vive pa más ténpu i ku más saúdi.

Má i sobri kes otu pergunta inportanti? Bu ta atxa ma sabe verdadi sobri kes pergunta li pode djuda-u na bu vida? Pur izénplu, odja alguns pergunta:

• Ken ki é Deus?

• Ken ki é Jizus Kristu?

• Kuzê ki é Reinu di Deus?

• Kuzê ki ta ben kontise na futuru?

Milhons di algen dja atxa respósta pa kes pergunta li i ses vida sta mutu más midjór gósi. Abo tanbê, bu pode ten un vida mutu más midjór si bu atxa respósta pa kes pergunta li.

Talvês bu ta pergunta: ‘Modi ki N ta konsigi atxa verdadi sobri algun kuza?’ Gósi sta kada bês más difísil sabe verdadi sobri txeu kuza. Pamodi?

Txeu algen ka ta kunfia na govérnus, inprézas i jornalistas pa fla-s verdadi. Es ta atxa difísil di sabe si otus algen sta ta fla-s verdadi, si es sta ta da ses opinion, si es sta ta sukundi algun informason ô ti konta mintira. Dja ki ten txeu informason falsu, pesoas ka sabe na kenha ki es ta kunfia. Pur isu, es ten opinion diferenti sobri kuzê ki é verdadi ô ti si verdadi ta izisti.

Sikrê ku kes prubléma li, nu pode atxa respósta di kunfiansa pa kes pergunta más inportanti di vida. Modi? Faze kes mésmu kuza ki bu ta faze tudu dia óras ki bu krê atxa un respósta.

Nu pode fla ma bu ta djobe verdadi tudu dia. Odja izénplu di Jésika. El fla: “Nha fidju-fémia ka pode kume mankara pamodi ta faze-l alerjia. Sikrê el kume sô un bokadinhu di mankara, el pode móre.” Pur isu, Jésika meste ten serteza ma kumida ki el ta kunpra ka ta prujudika se fidju-fémia. El fla: “Antis di N kunpra un kuza, primeru N ta lé ku atenson tudu informason ki ta splika kuzê ki ten na kel kuza. Dipôs, N ta faze más piskiza i ti N pode pâpia ku kes algen ki faze-l pa N sabe si ka ten ninhun prigu. Tanbê N ta piskiza na otus fonti di kunfiansa pa N pode ten serteza ma kumida di kel inpréza é suguru.”

Talvês nen tudu respósta ki bu ta tenta djobe na bu dia-dia é ka txeu inportanti sima kes di Jésika. Má, bu pode faze sima el pa bu atxa respósta di kalker pergunta. Bu meste:

• Sabe tudu informason.

• Faze más piskiza.

• Konfirma si kes fonti di informason é di kunfiansa.

Kes kuza li pode djuda-u atxa respósta di kunfiansa pa kes pergunta más inportanti di vida. Modi?

Kantu Jésika djobe verdadi na Bíblia, el faze mésmu kuza ki el ta kustuma faze óras ki el ta piskiza sobri alerjia di se fidju-fémia. El fla: “Lé ku atenson i faze txeu piskiza djuda-m atxa verdadi na Bíblia.” Sima Jésika, milhons di algen sta ta atxa respósta na Bíblia pa kes pergunta li:

• Pamodi ki nu sta na mundu?

• Kuzê ki ta kontise óras ki nu móre?

• Pamodi ki ten sufrimentu?

• Kuzê ki Deus sta ta faze pa kaba ku sufrimentu?

• Modi ki nu pode ten un família filís?

Bu pode atxa respósta di kes pergunta li i di otus pergunta óras ki bu ta lé Bíblia i faze más piskiza na internet, na www.dan124.com.