NA ANU ki pasa, milharis di ómis skodjedu pa ser ansions i ajudantis di kongregason di Tistimunhas di Jeová. Si bo é un di kes irmon, di sertéza bu sta kontenti ku es novu priviléjiu di sirvisu.

É normal bu sta xinti un poku preokupadu. Un ansion jóven ki txoma Jason fla: “Kantu N resebe es diziginason, kes novu responsabilidadi pô-m txeu preokupadu.” Muizes i Jeremias tanbê xinti ma es ka ta konsigiba faze kel diziginason ki Jeová da-s. (Êx. 4:10; Jer. 1:6) Si bu sta ta xinti si, modi ki bu pode vense medu i kontinua ta faze prugrésu? Nu ben odja izénplu di Timótiu. — Atos 16:1-3.

Talvês Timótiu tinha uns 20 anu, kantu apóstlu Polu konvida-l pa el ser se kunpanheru di viaji. Dja ki Timótiu éra jóven, talvês el xinti ma el ka ta konsigiba kunpri se novu diziginason. (1 Tim. 4:11, 12; 2 Tim. 1:1, 2, 7) Má simé, uns 10 anu dipôs Polu fla pa kongregason na Filipus: ‘N ta spéra na Sinhor Jizus ma ka ta dura N ta manda nhos Timótiu. N ka ten ningen ku bon vontadi sima el’. — Fil. 2:19, 20.

Kuzê ki djuda Timótiu ser un bon ansion? Nu ben odja 6 kuza ki bu pode prende ku el.

1. El ta preokupaba ku algen di verdadi. Polu fla kes irmon na Filipus: ‘[Timótiu] ta ben kuida di nhos di verdadi.’ (Fil. 2:20) Timótiu ta kuidaba di pesoas. El krê djudaba es ten un amizadi fórti ku Jeová i el uza se ténpu pa faze kel-la.

Ivita ser sima un kondutor di otokaru ki sta preokupadu sô ku txiga na óra, má nen el ka ta preokupa ku ken ki sta ta entra na otokaru. William ki dja é ansion pa más di 20 anu, da kel konsedju li pa kes ki resebe diziginason ka dura: “Nhos ama irmons. Nhos konsentra más na kuzê ki es meste, di ki djobe si tudu kuza sta ta fazedu sima régras di organizason ta fla.”

2. El poi kuzas spritual na primeru lugar. Polu mostra diferénsa entri Timótiu i kes otu irmon: ‘Tudu kes otu ta djobe sô ses interesi, envês di kes di Jizus Kristu.’ (Fil. 2:21) Polu staba ta skrebe di Roma. El da kónta ma kes irmon la staba txeu okupadu ku ses interesi. Es ka sta ta preokupa ku kuzas spritual. Má Timótiu é ka éra si. Sénpri ki parseba xansi pa prega notísias sábi, el mostra kel mésmu atitudi di Izaías: ‘Ale-m li! Manda-m bai!’ — Isa. 6:8.

Modi ki bu pode ikilibra bus responsabilidadi ku di kongregason? Primeru, djobe kel ki é más inportanti. Polu fla: ‘Nhos ten sertéza di kuzê ki é más inportanti’. (Fil. 1:10) Poi Deus na primeru lugar na bu vida. Sugundu, bira bu vida más sinplis. Kaba ku kes kuza ki ta toma-u ténpu i forsa. Polu fla Timótiu: ‘Fuji di dizejus di juventudi, má npenha  pa justisa, pa fé, pa amor, pa pas’. — 2 Tim. 2:22.

3. El trabadja txeu pa Jeová. Polu lenbra irmons na Filipus: ‘Nhos konxe próva ki [Timótiu] da di se kabésa, ma el trabadja ku mi sima skravu na pâpia di notísias sábi, sima un fidju ku se pai.’ (Fil. 2:22) Timótiu é ka éra prigisozu. El trabadja txeu djuntu ku Polu, i kel-la kria un amizadi fórti entri es.

Oji ten txeu trabadju na organizason di Jeová. Má é trabadju ki ta da alegria i ki pode djuda-u omenta bu amizadi ku irmons. Poi obijetivu di faze ‘sénpri txeu na óbra di Sinhor’. — 1 Cor. 15:58.

4. El ta fazeba sima el prende. Polu skrebe pa Timótiu: ‘Bu sigi ku atenson kuzas ki N inxina, nha manera di vive, nha obijetivu, nha fé, nha paxénxa, nha amor, nha kapasidadi di aguenta firmi’. (2 Tim. 3:10) Timótiu resebe más responsabilidadis, pamodi el ta fazeba sima el prende. — 1 Cor. 4:17.

Bu konxe algun ansion ki ten más spiriénsa ki bo i ki bu pode sigi se izénplu? Si inda nau, bu pode djobe un. Odja un izénplu. Tom ki é ansion dja ten txeu anu fla: “Un ansion ku txeu spiriénsa mostra interesi na mi i el trena-m dretu. Sénpri N ta pidiba el konsedju i N ta sigiba kuzê ki el ta flaba mi. Kel-la djuda-m ganha kunfiansa más faxi.”

5. El trena se kabésa. Polu da Timótiu un konsedju: ‘Trena bu kabésa ku obijetivu di ten divoson pa Deus.’ (1 Tim. 4:7) Un atléta pode ten un trenador, má el meste trena se kabésa. Polu fla: ‘Kontinua ta lé na públiku, ta da konsedju, ta inxina. Pensa na kes kuza li; konsentra na es, asi pa tudu algen odja bu prugrésu.’ — 1 Tim. 4:13-15.

Bo tanbê, bu meste kontinua ta midjora bus kapasidadi. Ka bu dexa bu prugrésu fika paradu. Má ser un bon studanti i kunpanha kes novu orientason ki organizason ta da. Tanbê toma kuidadu pa bu ka kúnfia dimás na bu kabésa. Alguns ta kúnfia txeu na ses spiriénsa ki es ta atxa ma es pode rezolve kalker situason sen faze piskiza. Sima Timótiu, ‘presta txeu atenson na bu kabésa i na bu manera di inxina.’ — 1 Tim. 4:16.

6. El ta kunfiaba na spritu di Jeová. Ta pensa na pregason di Timótiu, Polu fla: ‘Ku ajuda di spritu santu ki ta mora na nos, guarda es tizoru di grandi valor ki bu dadu.’ (2 Tim. 1:14) Pa el kontinuaba ta da valor pa se diziginason, Timótiu meste kunfiaba na spritu santu di Deus.

Donald, ki dja ten txeu ténpu ki el é ansion, fla: “Ansions ku ajudantis di kongregason meste da valor pa ses amizadi ku Deus. Kel-la ta djuda-s ten kada bês más forsa. Si es ora ta pidi spritu di Deus i es dizenvolve frutu di spritu, es ta ser un grandi benson pa ses irmons.” — Sal. 84:7; 1 Ped. 4:11.

Odja un monti ansion i ajudanti di kongregason sima nhos, ta faze prugrésu spritual, ta pô-nu xinti koraji. Jason, ki papiadu di el na komésu di es artigu, fla: “Désdi ki N diziginadu ansion N prende txeu kuza i N ta xinti más kunfiansa. Gósi N gosta txeu di nha diziginason. Pa mi é un priviléjiu grandi!”

Bu pode kontinua ta faze prugrésu? Sforsa pa bu sigi izénplu di Timótiu. Asi, bo tanbê bu pode ser un benson pa povu di Deus.