PESOAS KI TA VIVE NA TÉRA

Kuzê ki Bíblia ta fla: Deus ‘ka kria [Téra] pa nada, má el faze-l pa moradu na el’. — ISAÍAS 45:18.

PLANÉTA TÉRA

Kuzê ki Bíblia ta fla: ‘Un jerason ta bai i otu jerason ta ben, má Téra ta fika pa tudu ténpu.’ — ECLESIASTES 1:4.

KUZÊ KI KEL-LI KRÊ FLA: Sima Bíblia ta mostra, Téra nunka ka ta distruídu i sénpri ta ten algen ta mora na el. Nton, kuzê ki é fin di mundu?

PENSA NA KEL-LI: Bíblia ta konpara fin di kel mundu li, ku kuzê ki kontise na ténpu di Nué. Na kel ténpu, Téra staba ‘xeiu di violénsia’. (Génesis 6:13) Má Nué éra un ómi justu. Pur isu, Deus ka distrui Nué ku se família. Má el distrui kes algen mau na un dilúviu. Sobri kuzê ki kontise na kel ténpu, Bíblia ta fla: ‘Mundu di kel ténpu distruídu kantu el fika xeiu di agu.’ (2 Pedro 3:6) Kel testu li ta fla ma mundu distruídu. Má kuzê ki distruídu própi? É ka planéta Téra, má é kes algen mau na Téra. Nton, óras ki Bíblia sta pâpia di fin di mundu, el ka sta pâpia di distruison di planéta Téra. Má el sta pâpia di fin di kes algen mau ki sta vive na Téra i tanbê di kes kuza mariadu ki es ta faze.

PRUBLÉMAS I MALDADI

Kuzê ki Bíblia ta fla: ‘Ka ta dura kes algen mau ta ben dexa di izisti; bu ta djobe pa lugar ki es staba, i es ka ta sta la. Má, kes algen mansu ta ben toma kónta di Téra i es ta ben ten txeu alegria ku txeu pas.’ — SALMO 37:10, 11.

KUZÊ KI KEL-LI KRÊ FLA: Kel Dilúviu na ténpu di Nué ka kaba ku maldadi pa tudu ténpu. Dipôs di Dilúviu, vida torna fika xeiu di prubléma pamodi kes algen mau. Má ka ta dura, Deus ta ben kaba ku maldadi. Sima Salmo 37 ta fla, ‘kes algen mau ta ben dexa di izisti’. Deus ta ben uza se Reinu pa kaba ku maldadi. Reinu di Deus é un govérnu na Séu ki ta ben governa tudu kes algen ki ta obi ku Deus.

PENSA NA KEL-LI: Governantis di kel mundu li ta ben seta pa Deus governa-s? Bíblia ta fla ma nau. Envês di kel-li, es ta ben fika kóntra Reinu di Deus. (Salmo 2:2) I kal ki ta ser rezultadu? Reinu di Deus ta ben kaba ku tudu govérnus di ómi ‘i sô el ta ben fika pa tudu ténpu’. (Daniel 2:44) Má pamodi ki govérnus di ómi meste kaba?

Kuzê ki Bíblia ta fla: ‘Ómi é ka kapás di gia se kabésa.’ — JEREMIAS 10:23.

KUZÊ KI KEL-LI KRÊ FLA: Ómis ka kriadu pa governa ses kabésa. Es ka ta konsigi governa otus algen nen rezolve ses prubléma.

PENSA NA KEL-LI: Un ensiklopédia ta fla ma ta parse ma kes govérnu ki ten oji “ka ta konsigi rezolve prublémas sima pobréza, fómi, duénsa, dizastri na naturéza, géra i violénsia.” Tanbê, el ta fla ma “alguns. . . ta kridita ma é sô un govérnu pa mundu interu ki ta konsigi rezolve kes prubléma li.” Má sikrê tudu govérnus di ómi djunta, es ka ta konsigi rezolve kes prubléma ki dja nu pâpia di es pamodi es é inperfetu. Reinu di Deus, é kel úniku govérnu ki ten puder di rezolve kes prubléma na mundu interu pa tudu ténpu.

Nton sima Bíblia ta mostra, kes algen dretu ka meste ten medu di fin di es mundu ki sta xeiu di maldadi. Kel-li é un bon notísia, pamodi kel mundu bédju li ki sta xeiu di prubléma, ta ben trokadu pa un mundu novu di Deus rei di sábi!

Na ki ténpu ki tudu kes kuza li ta ben kontise? Nu ta ben odja respósta di Bíblia na kel otu artigu.