‘Nhos mante sienti, pamodi nhos ka sabe nen dia, nen óra.’ — MATEUS 25:13.

‘Nhos mante sienti, nhos kontinua kordadu, pamodi nhos ka sabe ki ténpu ki é kel óra markadu.’ — MARCOS 13:33.

Ningen ka sabe ki ténpu ki es mundu li ta ben kaba. Má, Deus dja tene un ‘ténpu markadu’ ô kel ‘dia i kel óra’ sértu pa fin ben. (Mateus 24:36) Má kel-li ka krê fla ma nu ka ta pode sabe si fin di mundu sta pértu. Jizus fla se disiplus pa es presta atenson na alguns kuza ki ta kontiseba i ki ta mostraba ma fin staba kuazi ta txiga.

Kes kuza ki Jizus fla ma ta ben kontiseba ta sérba un sinal ki ta mostra ma nu sta na ‘fin di es sistéma.’ El fla: ‘Gentis di un nason ta briga ku gentis di otu nason i reinu ku reinu, ta ben ten falta di kumida i tremor di téra na un lugar trás di kel otu.’ (Mateus 24:3, 7) Tanbê el fla ma ta ben tinha ‘duénsas’ ki ta spadjaba. (Lucas 21:11) Bu sta ta odja kes kuza li ta kontise?

Oji pesoas sta ta sufri pamodi géra, fómi, tremor di téra i duénsas un trás di kel otu. Pur izénplu na 2004, kontise un grandi tremor di Téra na Osianu Índiku ki poi un tsunami ta kontise i mata uns 225 mil algen. Na três anu, kel duénsa di COVID-19 dja mata uns 6,9 milhon di algen na mundu interu. Jizus fla ma óras ki kes kuza li kumesa ta kontise, é pamodi fin di mundu staba kuazi ta txiga.

Bíblia dja flaba ma antis di fin ben, nu ta ben viveba na un ténpu, ki ta txomadu ‘ténpu di fin.’ (2 Pedro 3:3, 4) Na 2 Timóteo 3:1-5, ta fla ma na ténpu di fin pesoas ka ta setaba vive di akordu ku leis di konportamentu di Deus. (Odja kuadru “ Poku ténpu antis di fin di mundu.”) Dja bu repara ma pesoas di oji, sta ta pensa sô na ses kabésa, ma es é ganansiozu, violéntus i sen amor? Kel-li tanbê é un prova ki ta mostra klaru, ma nu sta própi na fin di kel mundu li.

Kantu ténpu ki ténpu di fin ta dura? Bíblia ta fla, ‘poku ténpu.’ Dipôs di kel-li, Deus ta ben ‘distrui kes ki sta distrui Téra.’ — Apocalipse 11:15-18, i nóta di rodapé; 12:12.

Ten un bon notísia. Deus dja marka dia i óra pa el traze fin di es mundu mau. (Mateus 24:36) Má, é ka sô kel-li. Tanbê, Deus ‘ka krê pa ningen ser distruídu’. (2 Pedro 3:9) El sta ta da tudu algen oportunidadi di vive di akordu ku se vontadi. Pamodi? Pamodi el krê pa kada un di nos skapa na fin di kel mundu mau li, i pa nu ben vive na kel mundu novu óras ki Téra bira un paraízu.

Na mundu interu Deus sta ta djuda pesoas prende kuzê ki es debe faze pa es ben vive na Paraízu li na Téra, dibaxu di se Reinu. Jizus fla ma kes notísia sábi di Reinu, ta sérba pregadu ‘na mundu interu’. (Mateus 24:14) Tistimunhas di Jeová, gasta bilhons di óra na trabadju di pregason. Es prega i es inxina pesoas di mundu interu kel mensaji di speransa ki Bíblia ta da. Jizus fla ma kel kanpanha di pregason li tinha ki fazedu na Téra interu antis di fin ben.

Govérnus di ómi dja sta ku ses dia kontadu. Má, ten más un notísia sábi. Bu pode skapa na fin di mundu i ben vive li na Téra, na kel Paraízu ki Deus promete. Kel otu artigu ta ben splika kuzê ki bu meste faze pa bu vive na kel mundu novu.