1-2. Kuzê ki é resgati i pamodi ki nu meste-l?

KANTU Adon peka, é ka sô el ki perde xansi di vive pa tudu ténpu, má tanbê tudu kes fidju ki el ben ten. Ka tinha diskulpa pa kel ki Adon faze. El skodje peka i pur isu el merese moreba. Má i se fidjus? Es ka tevi ninhun kulpa pa pekadu di Adon. (Rom. 5:12, 14) Ta da pa fazeba algun kuza pa salvaba es di kel kondenason di mórti? Sin! Lógu dipôs ki Adon peka, Jeová ba ta mostra poku-poku kuzê ki el ta ben fazeba, pa resgataba kes milhon di disendenti di Adon di maldison di pekadu ku mórti. (Gén. 3:15) Óras ki txigaba kel ténpu sértu, Jeová ta mandaba se Fidju la di Séu pa ben ‘daba se vida pa sirbi di resgati na lugar di un monti di algen.’ — Mar. 10:45; João 6:51.

² Kuzê ki é resgati? Di akordu ku Skrituras Gregu, resgati é kel présu ki Jizus paga pa torna kunpra kel ki Adon perde. (1 Cor. 15:22) Pamodi ki nu meste resgati? Pamodi kes lei di Jeová ki é justu. Na kel lei ki Jeová daba israelitas, el fla ma tinha ki sérba vida pa vida. (Êxo. 21:23, 24) Adon perde kel vida perfetu. Nton, pa kunpri kes lei di Deus ki é justu, Jizus da se vida perfetu. (Rom. 5:17) Asi, el bira ‘Pai pa tudu ténpu’ di tudu kes ki ta mostra fé na resgati. — Isa. 9:6; Rom. 3:23, 24.

3. Sima sta na João 14:31 i 15:13, pamodi ki Jizus staba dispostu na sakrifika se vida perfetu?

³ Jizus staba dispostu na sakrifika se vida pamodi se grandi amor pa se Pai na Séu i pa nos. (Lé João 14:31; 15:13.) Pamodi kel amor li, Jizus mante fiel ti fin di se vida i na faze vontadi di se Pai. Asi, ta ben kunpriba vontadi di Jeová pa Téra i pa tudu algen sima el kreba désdi komésu. Na kel studu li, nu sta ben odja pamodi ki Deus  dexa Jizus sufri un mórti kruel. Dipôs, nu sta ben odja di un manera brévi izénplu di un skritor di Bíblia ki ta daba txeu valor pa resgati. Tanbê, nu ta ben odja modi ki nu pode mostra ma nu ta da valor pa resgati. I na fin, nu ta ben prende modi ki nu debe da más valor pa kel sakrifisiu ki Jeová i Jizus faze pa nos.

4. Konta modi ki Jizus móre.

⁴ Imajina kel últimu dia di Jizus li na Téra. El podia txomaba un monti di anju pa protejeba el, má el dexa kes trópa di Roma prende-l i sota-l sen xinti péna di el. (Mat. 26:52-54; João 18:3; 19:1) Kes trópa di Roma uza un tipu di xikóti ki ta rinkaba karni di kósta di Jizus. Dipôs, nbóra kósta di Jizus staba xeiu di pankada fundu, kes trópa pô-l ta karega aforsa un viga di madera uma pizadu. Jizus kumesa ta rasta kel staka pa kel lugar ki es ta mataba el. Má kel óra, kes trópa di Roma manda un otu ómi pa karega kel staka di Jizus. (Mat. 27:32) Kantu Jizus txiga na kel lugar ki es ta ba mataba el, kes trópa prega se mô ku se pé na staka. Pézu di korpu di Jizus poi kes pankada na mô ku na pé ta abri más inda. Se amigus lamenta i se mai txora. Má kes judeu faze trósa di Jizus. (Luc. 23:32-38; João 19:25) Jizus pasa txeu óra ta sufri. Korason i pulmons di Jizus kumesa ta fika más fraku i fika difísil pa el respira. El uza kel últimu folgu ki resta-l pa el faze se últimu orason. Nton, el nbaxa kabésa i el ntrega se vida. (Mar. 15:37; Luc. 23:46; João 10:17, 18; 19:30) Nu ka ten dúvida ma mórti di Jizus foi léntu, xeiu di dór i sen ninhun ruspetu!

5. Pa Jizus, kuzê ki foi más piór di ki ser pregadu na staka?

⁵ Pa Jizus, manera ki el matadu ka foi kel kuza más piór ki kontise ku el. Kuza ki dexa-l más angustiadu foi kel akuzason falsu ki pô-l ta matadu. Es fla ma el ka tinha ruspetu pa Deus ô pa nómi di Deus. (Mat. 26:64-66) Sô di pensa na kel akuzason falsu ma el ka tinha ruspetu pa Deus, poi Jizus ta fika txeu preokupadu ki el pidi se Pai pa ka dexa-l pasa pa kel situason la. (Mat. 26:38, 39, 42) Pamodi ki Jeová dexa se Fidju ki el ta ama sufri i móre? Nu ben odja três motivu.

6. Pamodi ki Jizus pregadu na un staka di tortura?

⁶ Primeru, Jizus tinha ki sérba pregadu na staka, pa libertaba judeus di un maldison. (Gál. 3:10, 13) Kes judeu staba dibaxu di un maldison pamodi es prometeba ma es ta obiba ku lei di Deus, má es ka kunpri kel promésa. Kes judeu merese moreba pamodi es éra fidju di Adon, má tanbê es staba dibaxu di kel maldison li. (Rom. 5:12) Kel lei ki Deus daba Israel, ta fla ma si un ómi faze un pekadu ki merese mórti, es devia mataba el. Dipôs es podia prindaba se korpu na un staka. * Kel lei tanbê ta flaba ma kel ómi ki prindadu na staka éra un algen maldisuadu pa Deus. (Deut. 21:22, 23; 27:26) Pamodi Jizus pregadu na staka, kes judeu podia fikaba livri di kel maldison. Nbóra es nega-l, kel sakrifisiu di Jizus podia djudaba es.

7. Kal ki é sugundu motivu ki poi Deus ta dexa se Fidju sufri?

⁷ Odja kel sugundu motivu ki poi Deus ta dexa se Fidju sufri. El staba ta trena  Jizus pa ben sérba Saserdóti Prinsipal na futuru. Jizus xinti na péli modi ki é ka fásil obi ku Deus i pasa pa kes próva difísil. Kel preson ki Jizus xinti, éra tantu txeu ki el ora ‘ta grita riju i ku láguas’ ta pidi Deus pa djuda-l. Dja ki Jizus pasa pa tudu kel preokupason, el ta konsigi ntende nos nisisidadi i el ta ‘pode ben [djuda-nu]’ óras ki nu ‘sta podu na próva.’ Nu ta fika kontenti pamodi Jeová da-nu ‘un Saserdóti Prinsipal ki ten mizerikórdia i ki ta konsigi ‘ntende nos frakézas’! — Heb. 2:17, 18; 4:14-16; 5:7-10.

8. Kal ki é tirseru motivu ki poi Deus ta dexa Jizus pasa pa un próva txeu difísil?

⁸ Tirseru, Jeová dexa se Fidju pasa pa un próva txeu difísil, pa pode responde un pergunta inportanti: ‘Kes algen ki ta sirbi Deus pode ser fiel pa el, mésmu óras ki es ta pasa pa próvas difísil?’ Satanás ta fla ma nau! El ta fla ma nu ta sirbi Deus sô pa interesi. Tanbê el ta fla ma nu ka ta ama Deus sima nos pai Adon. (Jó 1:9-11; 2:4, 5) Má Jeová ta kunfiaba na lialdadi di se Fidju. Pur isu, el dexa Jizus provadu ti undi un algen ta pode aguenta. Jizus kontinua lial i el prova ma Satanás é un mintirozu.

9. Ki izénplu apóstlu Juan dexa pa nos?

⁹ Txeu kriston pasa ta ten un fé más fórti pamodi kuzê ki es prende sobri resgati. Es kontinua ta prega sikrê ku opozison i es nfrenta txeu tipu di difikuldadi, mésmu ki dja es staba algen grandi. Odja izénplu di apóstlu Juan. Ku lialdadi el prega kes verdadi sobri Kristu i sobri resgati, talvês pa más di 60 anu. Kantu el tinha kuazi 100 anu, govérnu di Roma ba pô-l prézu na ilha di Pátmus, pamodi es pensa ma el éra un grandi prigu pa ses govérnu. Kal ki éra se krimi? El staba ta ‘pâpia di Deus i ta da tistimunhu di Jizus.’ (Apo. 1:9) El é un grandi izénplu di algen ki tinha txeu fé i ki aguenta firmi!

10. Modi ki kes livru di Bíblia ki Juan skrebe ta mostra ma el ta daba valor pa resgati?

¹⁰ Kes livru di Bíblia ki Juan skrebe ta mostra ma el ta amaba Jizus txeu i ma el ta daba txeu valor pa resgati. Se livrus ta pâpia di resgati más di 100 bês ô di modi ki resgati ta pode djuda-nu. Pur izénplu, Juan skrebe: ‘Si algen faze un pekadu, nu ten un ajudador djuntu ku nos Pai. I es ajudador é un algen justu, ki é Jizus Kristu.’ (1 João 2:1, 2) Kes livru di Juan ta mostra ma tanbê é inportanti ‘da tistimunhu di Jizus.’ (Apo. 19:10) Nu ka ten dúvida ma Juan ta daba txeu valor pa resgati. Modi ki nu pode mostra ma nos tanbê nu ta da valor pa resgati?

11. Kuzê ki pode djuda-nu ka kai na tentason?

¹¹ Ka bu kai na tentason di faze pekadu. Si nu ta da valor pa resgati di verdadi, nunka nu ka ta pensa di kel manera li: ‘Pakê sforsa txeu pa ka kai na tentason? N pode peka i dipôs N ta pidi perdon.’ Envês di kel-li, si nu xinti tentason di faze algun kuza mariadu, nu debe fla nos kabésa: ‘Nau! Modi ki N pode pensa na faze un kuza di kel-li, dipôs di tudu kel ki Jeová ku Jizus dja faze pa mi?’ Pa nu aji di akordu ku kel pensamentu li, nu pode pidi Jeová pa da-nu forsa i ti mésmu nu pode inplora: ‘Favor, ka nhu dexa-m kai na tentason’. — Mat. 6:13.

12. Modi ki nu pode sigi kel konsedju ki sta na 1 João 3:16-18 ?

 ¹² Ama bus irmon ku irmans. Óras ki nu ta mostra amor, tanbê nu ta mostra ma nu ta da valor pa resgati. Pamodi? Pamodi Jizus da se vida ka sô pa nos, má tanbê pa nos irmons. I si Jizus staba prontu pa móre pa es é pamodi es ten txeu valor pa el. (Lé 1 João 3:16-18.) Un manera di nu mostra amor pa nos irmons, é óras ki nu ta trata-s dretu. (Efé. 4:29, 31–5:2) Pur izénplu, nu pode djuda-s óras ki es sta duenti ô óras ki es ta pasa pa kes situason txeu difísil sima dizastri na naturéza. Má kuzê ki nu debe faze óras ki un irmon fla ô faze algun kuza ki magua-nu?

13. Pamodi ki sénpri nu debe púrdua otus?

¹³ Alvês bu ta atxa difísil púrdua un irmon ô un irman? (Lev. 19:18) Si kel-li ta kontise ku bo, sigi kel konsedju li: ‘Nhos kontinua ta suporta kunpanheru i ta púrdua kunpanheru di korason, sikrê algen tene algun razon di kexa kóntra kel otu. Sima Jeová púrdua nhos di korason, nhos tanbê nhos faze mésmu kuza.’ (Col. 3:13) Tudu bês ki nu púrdua nos irmons ku irmans, nu ta prova nos Pai na Séu ma nu ta da valor pa resgati di verdadi. Kuzê ki nu pode faze pa nu kontinua ta da más valor pa es prezenti di Deus?

14. Kal ki é un manera di mostra ma bu ta da más valor pa resgati?

¹⁴ Agradese Jeová pa resgati. Juana, ki é un irman di 83 anu ki ta mora na Índia, fla: “N ta atxa ma é inportanti pâpia di resgati tudu dia na nhas orason i agradese Jeová pa kel prezenti li.” Óras ki bu ta faze bus orason bo sô, pensa na kes kuza mariadu ki bu faze duránti kel dia. Dipôs, pidi Jeová pa purdua-u. É klaru ki si bu faze un pekadu gravi, bu meste pidi ajuda di ansions. Es ta obi-u i es ta da-u konsedju ku amor ku bazi na Palavra di Deus. Es ta faze orason ku bo, i es ta pidi Jeová pa purdua-u ku bazi na resgati di Jizus. Asi, bu ta rekupera bu amizadi ku Jeová. — Tia. 5:14-16.

15. Pamodi ki nu debe tra ténpu pa lé sobri resgati i pensa na el?

¹⁵ Pensa na resgati. Rajamani, ki é un irman di 73 anu, fla: “Óras ki N ta lé di  modi ki Jizus sufri txeu nhas odju ta intxi di lágua.” Abo tanbê bu pode xinti txeu tristi óras ki bu ta pensa na modi ki Fidju di Deus tevi ki sufri. Má, sima bu ta ba ta pensa na sakrifisiu di Jizus, bu amor pa el ku Jeová ta bira más txeu. Pa djuda-u pensa na resgati, pamodi ki bu ka ta inklui kel asuntu li na bu studu pesoal?

16. Pamodi ki inxina otus algen sobri resgati é bon pa nos? (Odja dizenhu na kapa.)

¹⁶ Inxina otus algen sobri resgati. Kada bês ki nu pâpia ku otus algen sobri resgati, nu ta bira ta da-l más valor. Nu ten bons feraménta ki ta djuda-nu inxina otus algen pamodi ki Jizus tevi ki móre pa nos. Pur izénplu, nu pode uza lison 4 di bruxura Notísias sábi di Deus pa bo!. Kel lison ten kel téma li: “Ken ki é Jizus Kristu?” Tanbê nu pode uza kapítlu 5 di livru Kuzê ki nu pode prende na Bíblia? Kel kapítlu ten kel téma li: “Resgati é midjór prezenti ki Deus da-nu”. Tudu anu nu ta bira ta da más valor pa resgati óras ki nu ta sisti Komemorason di mórti di Jizus i óras ki nu ta faze nos midjór pa konvida otus algen pa kel okazion inportanti li. Nos é txeu gratu pa kel priviléjiu ki Jeová da-nu di inxina otus algen sobri se Fidju!

17. Pamodi ki resgati é kel prezenti más grandi ki Deus dja da-nu?

¹⁷ Di sertéza nu ten txeu motivu pa nu da valor pa resgati i kontinua ta ten kel gratidon li. Pamodi resgati, nu pode ten un amizadi fórti ku Jeová sikrê nos é inperfetu. Pamodi resgati, tudu kes óbra di Diabu ta ben kabadu ku el. (1 João 3:8) Pamodi resgati, vontadi di Jeová pa Téra ta ben kunpri sima éra na komésu. Téra interu ta ben bira un Paraízu. Tudu kes algen ki bu ta ben konxe ta ben ama i ta ben sirbi Jeová. Pur isu, tudu dia faze bu midjór pa mostra ma bu ta da valor pa resgati, ki é kel prezenti más grandi ki Deus dja da-nu!