STUDU 34
KÁNTIKU 107 Nu mostra amor sima Jeová
Modi ki ansions pode mostra amor i mizerikórdia pa kes algen ki peka
“Deus, na se bondadi, sta ta tenta djuda-u rapende”. — ROMANUS 2:4.
ASUNTU PRINSIPAL
Modi ki ansions pode djuda kes algen na kongregason ki faze un pekadu gravi.
1. Kuzê ki pode kontise dipôs ki un algen faze un pekadu gravi?
NA STUDU ki pasa, nu odja kuzê ki Paulu fla kongregason na Korintu pa faze kantu un ómi faze un pekadu gravi. Kel ómi ka rapendeba pur isu el tradu di kongregason. Má sima testu ki tradu téma di es studu ta mostra, Deus pode djuda un algen ki faze un pekadu gravi rapende. (Rom. 2:4) Modi ki ansions pode djuda kes algen ki rapende?
2-3. Kuzê ki nu debe faze si nu fika ta sabe ma un irmon faze un pekadu gravi, i pamodi ki nu debe faze kel-li?
2 Si ansions ka sabe ma un algen faze un pekadu gravi, es ka ta pode djuda-l. Nton, kuzê ki nu pode faze si nu sabe ma un algen faze un pekadu gravi ki pode pô-l ta tradu di kongregason? Nu debe insentiva kel algen pa ba pâpia ku ansions pa es pode djuda-l. — Isa. 1:18; Atus 20:28; 1 Ped. 5:2.
3 Má, i si kel algen ka krê pâpia ku ansions? Nton, nu ta ba pâpia ku ansions pa ten serteza ma kel algen ta resebe kel ajuda ki el meste. Óras ki nu ta faze si, nu ta mostra ma nu ta ama kel irmon ô kel irman pamodi nu ka krê perde-l. Si kel algen kontinua ta faze kel kuza mariadu el ta prujudika se amizadi ku Jeová. Tanbê, el pode straga kel bon nómi di kongregason. Pur isu, mésmu ki pode ser difísil, nu ta ba pâpia ku ansions pamodi nu ta ama Jeová i nos irmons ku irmans. — Sal. 27:14.
MODI KI ANSIONS TA DJUDA UN ALGEN KI FAZE UN PEKADU GRAVI
4. Kal ki é obijetivu di ansions óras ki es ta faze runion ku un algen ki peka?
4 Óras ki un algen na kongregason faze un pekadu gravi, grupu di ansion di kel kongregason ta skodje três ansion kualifikadu entri es, pa faze un runion ku kel algen. a Kes ansion meste ser ikilibradu i umildi. Enbóra es ta tenta djuda kel algen ki peka rapende, es debe rekonhese ma es ka pode obriga un algen muda. (Deut. 30:19) Ansions ta rekonhese ma é ka tudu pekador ki ta rapende, sima rei Davidi faze. (2 Sam. 12:13) Alguns algen ki peka pode skodje ka obi ku kes konsedju di Jeová. (Jén. 4:6-8) Má, obijetivu di ansions é djuda kel algen rapende. Ki prinsípius ansions debe sigi óras ki es ta faze runion ku kel algen?
5. Ki atitudi kes ansion debe ten óras ki es ta faze runion ku kel algen ki peka? (2 Timótiu 2:24-26) (Odja dizenhu.)
5 Kes ansion debe odja kel algen ki peka sima un ovelha ki perde má ki ten txeu valor. (Luk. 15:4, 6) Pur isu, óras ki ansions ta faze runion ku kel algen, es ka ta pâpia ku el di manera duru ô sen bondadi. Tanbê, ansions ka debe pensa ma es debe sô faze pergunta i sabe kuzê ki kontise. Envês di kel-li, es debe mostra kes kualidadi ki sta na 2 Timótiu 2:24-26. (Lé.) Ansions debe kontinua ta mostra bondadi i brandura timenti es ta djuda kel algen ki peka muda se manera di pensa.
Sima un pastor na ténpu antigu, ansions ta faze tudu kel ki es ta pode pa djuda un ovelha ki perde. (Odja parágrafu 5.)
6. Modi ki ansions debe pripara ses korason antis di es faze runion ku kel algen ki peka? (Romanus 2:4)
6 Kes ansion ta pripara ses korason. Es ta lenbra di kes palavra di Paulu: “Deus, na se bondadi, sta ta tenta djuda-u rapende”. (Lé Romanus 2:4.) Nton, es ta tenta imita bondadi di Jeová na manera ki es ta trata kes algen ki peka. Ansions debe lenbra ma es é pastor ki ta sigi orientason di Jizus Kristu. (Isa. 11:3, 4; Mat. 18:18-20) Antis di ansions faze runion ku kel algen ki faze un pekadu, es ta faze orason pa Jeová djuda-s, asi pa es pode konsigi ses obijetivu, ki é djuda kel algen rapende. Es ta faze piskizas na Bíblia i na nos publikason i es ta ora pa Jeová ta pidi-l ajuda pa es pode intende kel algen i kel situason. Es ta djobe kuzê ki es meste sabe sobri kel algen ki talvês pô-l ta pensa i aji di manera mariadu. — Pro. 20:5.
7-8. Modi ki ansions pode imita paxénxa di Jeová óras ki es ta faze runion ku un algen ki peka?
7 Ansions ta imita paxénxa di Jeová. Es ta lenbra modi ki Jeová tenta djuda kes algen ki peka na pasadu. Pur izénplu, Jeová tevi paxénxa ku Kain, el fla-l kuzê ki ta kontiseba ku el si el ka mudaba i ma el ta abensuaba el si el obiba ku el. (Jén. 4:6, 7) Jeová manda proféta Natan pa pâpia ku Davidi. Natan uza un ilustrason ki djuda Davidi rapende. (2 Sam. 12:1-7) I Jeová ‘manda’ se profétas ‘txeu bês’ pa israelitas kantu ki es ka obi ku el. (Jer. 7:24, 25) El ka staba ta spera pa se povu rapendeba antis di el djudaba es. Má, timenti es staba ta peka el ta insentivaba es pa es rapendeba.
8 Ansions ta sigi izénplu di Jeová óras ki es ta tenta djuda kes algen ki faze un pekadu gravi. Óras ki es ta lida ku un algen ki faze un pekadu, es debe faze-l “ku tudu paxénxa”, sima 2 Timótiu 4:2 ta fla. Pur isu, sénpri kel ansion debe ten kalma i paxénxa pa djuda kel algen ki peka ten dizeju di faze kel ki é dretu. Si kel ansion fika xatiadu, kel algen pode ka obi kel konsedju ô el pode ka krê rapende.
9-10. Modi ki ansions pode djuda kel algen ki peka pensa na kuzê ki el faze?
9 Ansions ta tenta sabe kuzê ki poi kel algen ta faze kel pekadu. Pur izénplu, kuzê ki poi se amizadi ku Jeová ta fika fraku? El para di faze se studu pesoal ô di sai na pregason? El dexa di faze orason pa Jeová? El dexa pa dizejus mariadu disvia-l? Kenha ki el staba ta pasa se ténpu ku el? Kuzê ki el staba ta divirti ku el? Modi ki kes kuza li afeta se korason? El ta intende kuzê ki se Pai Jeová ta xinti sobri kuzê ki el faze?
10 Ansions pode faze kel algen perguntas ki ta djuda-l pensa sobri kes kuza ki frakise se amizadi ku Jeová i pô-l ta peka. Es ta faze kel-li ku bondadi i es ka ta faze kel algen perguntas sobri asuntus di se vida ki es ka debe sabe. (Pro. 20:5) Ansions pode uza ilustrasons sima Natan faze ku Davidi pa djuda kel algen pensa sobri kuzê ki el faze i pa el odja pamodi ki el sta eradu. Talvês duránti kel primeru runion ki es ta faze ku kel algen el pode xinti tristi pamodi kes kuza mariadu ki el faze. El pode ti mésmu rapende.
11. Modi ki Jizus lida ku kes algen ki peka?
11 Ansions ta sforsa pa imita Jizus. Pa djuda Saulu di Tarsu, Jizus faze un pergunta pa rasusina ku el: “Saulu, Saulu, pamodi ki bu sta pirsigi-m?” Ku kel pergunta li, Jizus djuda Paulu odja ma kel ki el staba ta faze éra mariadu. (Atus 9:3-6) I sobri “kel mudjer Jizabel,” Jizus fla: “N da-l ténpu pa el rapende”. — Apo. 2:20, 21.
12-13. Modi ki ansions pode da ténpu pa kel algen ki peka rapende? (Odja fotus.)
12 Ansions ta imita Jizus, i es ka ta tra konkluzon faxi ma un algen ka krê muda se manera di pensa i se konportamentu. Alguns algen pode rapende óras ki ansions pâpia ku es na kel primeru runion ki es faze. Má, otus pode meste di más ténpu. Nton ansions pode faze más di ki un runion ku kel algen ki peka. Talvês, dipôs di kel primeru runion, kel algen ki peka pode kumesa ta pensa más txeu na kuzê ki ansions fla-l. El pode mostra umildadi i pidi Jeová pa purdua-l se pekadu. (Sal. 32:5; 38:18) Pur isu, na kel otu runion kel algen ki peka pode mostra un atitudi diferenti di kel ki el mostraba na kel primeru runion.
13 Pa djuda kel algen rapende, ansions ta poi na se lugar i es ta mostra-l bondadi. Es ta ora pa Jeová abênsua ses sforsu i es ta spera ma kel irmon ô irman ta ben na el i el ta rapende. — 2 Tim. 2:25, 26.
Ansions pode faze más di ki un runion ku un algen ki peka, asi pa es pode da-l ténpu di rapende. (Odja parágrafu 12.)
14. Kenha ki ta djuda un algen rapende, i pamodi ki nu ta fla kel-li?
14 Nu ta fika txeu kontenti óras ki un algen ki peka rapende! (Luk. 15:7, 10) Enbóra ansions ta faze ses midjór pa djuda kel algen ki peka, kenha ki ta djuda kel algen ki peka muda? Apóstlu Paulu fla: “Talvês Deus ta da-s rapendimentu”. (2 Tim. 2:25) É ka pesoas, má é Jeová ki ta poi un algen ta muda se manera di pensa i se atitudi. Paulu fla alguns kuza bon ki ta kontise dipôs ki kel algen rapende. El fla ma kel algen ta ten un konhisimentu izatu di verdadi, el ta fika ta pensa di manera dretu otu bês i dipôs el ta pode skapa di armadilha di Satanás. — 2 Tim. 2:26.
15. Modi ki ansions pode kontinua ta djuda un algen ki rapende di se pekadu?
15 Óras ki un algen rapende, ansions ta kontinua ta vizita-l pa djuda-l bira se fé más fórti i djuda-l kontinua ta luta kóntra kes tentason di Satanás i faze kel ki é dretu. (Ebr. 12:12, 13) É klaru ki ansions ka ta ba konta otus algen kuzê ki kel algen faze. Má kuzê ki irmons na kongregason meste sabe?
“KORIJI NA FRENTI DI TUDU ALGEN”
16. Sima sta na 1 Timótiu 5:20, kenha ki é kes “tudu algen” ki Paulu pâpia di el?
16 Lé 1 Timótiu 5:20. Paulu fla Timótiu, ki éra un ansion, pa koriji kes algen ki peka na frenti di “tudu algen”. Kuzê ki kel-li krê fla? El ka krê flaba ma “tudu algen” éra tudu algen na kongregason. Envês di kel-li, el staba ta pâpia di kes poku algen ki dja sabeba di kel pekadu, ki pode ser un algen ki odja kuzê ki kontise ô pode ser un algen ki kel algen ki peka fla-l kuzê ki el faze. Ansions ta ba pâpia sô ku kes algen li pa dexa-s sabe ma kel asuntu dja rezolvedu.
17. Si txeu algen na kongregason fika ta sabe ma un algen faze un pekadu gravi ô es pode ben fika ta sabe di kel pekadu, ki avizu ta dadu na kongregason i pamodi?
17 Alvês, txeu algen na kongregason ta sabe ma un algen faze un pekadu gravi ô es pode ben fika ta sabe di kel pekadu. Na kes situason li, “tudu algen” ta inklui tudu algen na kel kongregason. Nton, un ansion ta da un avizu pa kongregason ta fla ma kel irmon ô irman reprendedu. Pamodi? Paulu fla: “Asi pa sirbi di avizu pa kes otu” pa es ka faze pekadu gravi.
18. Kuzê ki ansions ta faze óras ki un algen batizadu i ki é menór faze un pekadu gravi? (Odja fotu.)
18 Kuzê ki ansions ta faze óras ki un algen batizadu ki ten ménus di 18 anu, faze un pekadu gravi? Grupu di ansion ta skodje dôs ansion pa faze un runion ku kel menór djuntu ku se pai i ku se mai, si es é Tistimunhas di Jeová. b Ansions ta ba pergunta kel pai ku kel mai kuzê ki dja es faze pa tenta djuda ses fidju faze kes mudansa ki meste i rapende. Si kel menór tiver un bon atitudi i se pai ku se mai sta konsigi djuda-l, dôs ansion pode disidi ma es ka meste faze un kumison di ansion pa faze un runion ku kel menór djuntu ku se pai i ku se mai. Ansions sabe ma Jeová da pai ku mai responsabilidadi di koriji ses fidju ku amor. (Deut. 6:6, 7; Pro. 6:20; 22:6; Efé. 6:2-4) Di vês en kuandu, ansions ta pâpia ku kel pai i ku kel mai pa es ten serteza ma kel menór sta ta resebe kel ajuda ki el meste. Má, i si kel menór ka rapende i el kontinua ta faze kel pekadu gravi? Na kel situason li, un kumison di ansion ta faze un runion ku el djuntu ku se pai i ku se mai, si es é Tistimunhas di Jeová.
Óras ki un menór ta faze un pekadu gravi, dôs ansion ta faze un runion ku el djuntu ku se pai i ku se mai, si es é Tistimunhas di Jeová. (Odja parágrafu 18.)
“JEOVÁ TEN TXEU KONPAXON I MIZERIKÓRDIA”
19. Modi ki ansions ta sforsa pa imita Jeová óras ki es ta lida ku un algen ki faze un pekadu gravi?
19 Jeová ta iziji pa ansions proteje kongregason di kes algen ki ka ta krê kunpri se leis. (1 Kor. 5:7) Má tanbê si ta da es debe faze tudu ki es ta pode pa djuda un algen rapende. I óras ki es ta djuda kel algen, es debe kontinua ku speransa ma kel algen ta muda. Pamodi? Pamodi es krê imita Jeová, ki “ten txeu konpaxon i mizerikórdia.” (Tia. 5:11) Apóstlu Juan trata se irmons ku irmans ku amor. El skrebe: “Nhas fidju, N sta skrebe nhos kes kuza li pa nhos ka faze pekadu. Má si un algen faze un pekadu, nu ten un algen djuntu ku nos Pai ki ta djuda-nu, un algen justu, ki é Jizus Kristu.” — 1 Juan 2:1.
20. Kuzê ki nu ta ben pâpia di el na kel últimu studu di es grupu di artigu?
20 Infilismenti, alvês un sérvu di Jeová pode ka rapende. Si kel-li kontise el debe tradu di kongregason. Modi ki ansions debe lida ku kes situason li? Nu ta ben pâpia sobri kel-li na kel últimu studu di es grupu di artigu.
KÁNTIKU 103 Ansions é un prenda di Jeová
a Antis nu ta flaba kumison pa julga. Má, dja ki julga é sô un párti di ses trabadju, gósi nu ka ta fla kumison pa julga más. Envês di kel-li, nu ta fla sô kumison di ansions.
b Kel informason li tanbê ta aplika na kes algen ki lei ta da-s direitu di toma kónta di un menór ô na kalker otu algen ki ta kuida di el.
