BU TA atxa ma bo é un algen ki ta mostra gratidon? Kel-li é un pergunta ki nos tudu debe pensa na el. Bíblia dja flaba ma na nos ténpu txeu algen ta sérba ‘ingratu’. (2 Tim. 3:2) Talvês bu konxe pesoas ki ta atxa ma tudu algen debe faze kuza pa es ô da-s algun kuza. Ta parse ma es ta atxa ma es ka meste mostra gratidon pa kuza ki es ta resebe. Bu ta gostaba di sta djuntu ku algen asi?

Má, sérvus di Jeová ta insentivadu: ‘Nhos mostra ma nhos é gratu.’ Nu ta ‘agradise pa tudu kuza.’ (Col. 3:15; 1 Tes. 5:18) Tanbê, mostra gratidon é bon pa nos i ten monti razon ki ta mostra ma kel-li é verdadi.

Un razon inportanti pa nu sta sénpri ta agradise é pamodi el ta djuda-nu xinti dretu ku nos kabésa. Óras ki un algen ta agradise pa un kuza ki el fazedu, el ta xinti sábi i kel algen ki el ta agradise tanbê ta xinti sábi. Pamodi ki kel-li ta kontise? Pensa na kel izénplu li: Óras ki otus algen krê faze algun kuza pa bo, kel-li ka ta mostra ma bu ten valor pa es i es ta preokupa ku bo? Óras ki bu repara kel-li bu ta fika kontenti. Nu pode imajina ma é kel-li ki kontise ku Ruti kantu Boás da-l txeu kuza. Kantu Ruti repara kel-li el fika txeu kontenti pamodi el odja ma tinha un algen ki ta preokupaba ku el. — Rute 2:10-13.

Mostra gratidon pa Deus é mutu más inportanti inda. Di sertéza, sénpri bu ta pensa na tudu kes bon kuza ki Deus dja da-u i ki ti inda el sta ta da-u. (Deut. 8:17, 18; Atos 14:17 ) Má, envês di pensa sô un bokadinhu na bondadi di Deus, pamodi ki bu ka ta tra ténpu pa bu pensa na tudu kes benson ki Deus dja da-u abo i kes algen ki bu ta ama? Óras ki bu ta pensa na tudu kes kuza ki bu Kriador dja da-u, bu gratidon pa el ta omenta i ta da-u kunfiansa ma Jeová ta ama-u txeu i ma el ta preokupa ku bo. — 1 João 4:9.

Má, faze más di ki sô pensa na kes kuza ki Jeová dja da-u i na se bensons. Agradise Jeová pa se bondadi. (Sal. 100:4, 5) Ta fladu ma “agradise otus ta poi algen ta xinti filís.”

Un otu razon pa nu mostra gratidon é pamodi el ta djuda-nu ten amizadis más fórti. Nos tudu nu meste xinti ma algen ta da-nu valor. Óras ki nu ta agradise otus di korason pamodi un bondadi ki el faze-nu, nos tudu dôs ta fika más amigu. (Rom. 16:3, 4) Tanbê, kes algen ki ta mostra gratidon ta djuda otus. Es ta repara óras ki otus algen ta trata-s ku bondadi, i kel-li ta pô-s ta mostra bondadi tanbê. Di sertéza djuda otus ta poi algen ta ser filís. É sima Jizus fla: ‘É más sábi da di ki toma.’ — Atos 20:35.

Un profesor di universidadi di Kalifórnia ki txoma Robert Emmons, fla: “Pa nu mostra gratidon, nu meste ntende ma nu ta dipende di kunpanheru. Un óra nu ta da otu óra nu ta dadu.” Pur isu, pa nu kontinua ta vive i ta ser filís nu meste pa otus algen djuda-nu di un monti manera. Pur izénplu, es pode da-nu kumida ô djuda-nu faze algun tratamentu di saúdi. (1 Cor. 12:21) É klaru ki kes algen ki é gratu ta da valor pa kuzê ki otus algen ta faze pa es. Nton, pergunta bu kabésa: ‘N ta kustuma agradise algen óras ki el faze algun kuza pa mi?’

Otu razon pa nu dizenvolve gratidon é pamodi el ta djuda-nu konsentra na kuzas dretu envês di kuzas mariadu. Nu pode fla ma nos menti ta funsiona sima un filtru. El ta dexa-nu konsentra na alguns kuza ki sta ta kontise na nos vólta i ka presta atenson na otus kuza. Kenha ki é gratu ta konsentra más na kuzas dretu i el ka ta konsentra txeu na prublémas. Si bo é un algen ki sénpri ta mostra gratidon, é más faxi bu konsentra na kuzas dretu i ti bu ta bira un algen kada bês más gratu. Si bu konsentra na kuzas ki bu pode agradise, el ta djuda-u sigi izénplu di apóstlu Polu ki fla: ‘Nhos fika sénpri kontenti na Sinhor.’ — Fil. 4:4.

Bu ta odja ma gratidon ta djuda-u luta kóntra sentimentus mariadu. Bu ka ta atxa ma é mutu más difísil pa un algen xinti gratidon, i omésmu ténpu pa el xinti invéja, tristéza ô raiba? Tanbê, kes algen ki é gratu ten tendénsia di preokupa ménus ku kuzas material. Es ta da valor pa kuza ki es ten i es ka ta sta sénpri ta djobe más kuza. — Fil. 4:12.

Dja ki nos é kristons, nu sabe ma Satanás ta gostaba di odja-nu tristi i dizanimadu pamodi kes prubléma ki nu ta pasa pa es na es ténpu di fin. El ta fikaba rei di kontenti si el odja-u ta dizenvolve pensamentu mariadu i ta kexa di tudu kuza. Si bu bira kel tipu di algen li, é más difísil pesoas obi-u óras ki bu ta prega notísias sábi. Má, si nos é gratu nu ta mostra ma nu ten frutu di spritu di Deus. Pur izénplu, nu ta ser filís pamodi nu ta odja kes bon kuza ki Deus sta ta da-nu i nu ta ten más fé na tudu se promésas. — Gál. 5:22, 23.

Talvês bu ta konkorda ku kuzê ki es artigu dja fla sobri gratidon, pamodi bu ta faze párti di povu di Jeová. Má simé, bu pode atxa ma alvês é difísil mostra gratidon i konsentra na kuzas dretu. Ka bu fika dizanimadu pamodi kel-li. Bu pode ser un algen kada bês más gratu. Modi? Tra ténpu tudu dia pa bu pensa na alguns kuza na bu vida ki bu pode ser gratu. Kada bês ki bu faze kel-li, ta ser más fásil mostra gratidon. Kel-li ta pô-u ta ser más filís di ki kes algen ki ta konsentra sô na prublémas di vida. Pensa na kes bon kuza ki Deus i otus algen faze pa bo ki nkoraja-u. Talvês bu pode kumesa ta skrebe dôs ô três kuza ki pô-u ta xinti gratu na kel dia.

Alguns algen ki studa sobri es asuntu ta fla ma si sénpri nu ta agradise otus, kel-li pode muda manera ki nos sérbru ta funsiona, di un fórma ki ta fika más fásil pa nu xinti filís ku nos vida. Un algen gratu é un algen más filís. Pur isu, pensa na tudu kes benson ki dja bu resebe, pruveta kes kuza dretu ki ta kontise na bu vida i agradise sénpri! Envês di atxa ma bu merese kes bon kuza ki bu ten, ‘agradise Jeová pamodi el é bon’ i ‘agradise pa tudu kuza.’ — 1 Cró. 16:34; 1 Tes. 5:18.