1-2. (a) Kuzê ki é un jubileu? (Odja kuadru “ Kuzê ki éra Jubileu?”) (b) Di akordu ku Lucas 4:16-18, sobri kuzê ki Jizus staba ta pâpia?

NA ALGUNS país, es ta kustuma komemora 50 anu di govérnu di un rei ô di un rainha. Na anu ki un governanti ta faze 50 anu ta governa ta txomadu di anu di jubileu. Kes komemorason di jubileu pode dura un dia, un simana ô mutu más. Má, kes komemorason ta kaba i dipôs di poku ténpu pesoas ta skese di tudu kes alegria.

² Nu sta ben pâpia di un jubileu mutu más midjór, ti más midjór inda, di ki kel ki es ta fazeba kada 50 anu na Israel duránti un anu. Kel Jubileu ta daba israelitas liberdadi. Pamodi ki nu debe prende sobri el? Pamodi kel anu di Jubileu di israelitas ta lenbra-nu di un kuza mutu más grandi ki Jeová faze pa liberta-nu. El ta ben da-nu liberdadi pa tudu ténpu i el pode djuda-nu désdi gósi. Jizus dja papiaba sobri es liberdadi. — Lé Lucas 4:16-18.

3. Di akordu ku Levítico 25:8-12, modi ki Jubileu ta djudaba israelitas?

³ Pa nu ntende midjór kuzê ki Jizus krê flaba kantu el pâpia di liberdadi, primeru nu meste prende sobri un komemorason ki Deus manda se povu pa faze na ténpu antigu. Jeová flaba israelitas: ‘Nhos ten ki santifika kel anu 50 i aviza ma tudu algen ki ta mora na nhos téra sta livri. Kel anu ta bira un jubileu pa nhos, i kada un di nhos ta volta pa se propriadadi, i kada un di nhos debe volta pa se família.’ (Lé Levítico 25:8-12.) Na kel otu studu, nu odja modi ki lei di sábadu éra bon pa israelitas. Má, modi  ki Jubileu ta djudaba israelitas? Pur izénplu, imajina ma un israelita tinha txeu dívida i el tevi ki bende se txon pa el pode paga dívida. Duránti anu di Jubileu, el ta tomaba se txon otu bês. Asi, kel ómi pode voltaba pa se propriadadi i más tardi se fidjus ta erdaba kel txon. Ô pode ser ki un ómi staba na un situason difísil ki el tevi ki bende se fidjus ô ti se kabésa pa ser skravu pa el pode pagaba un dívida. Duránti anu di Jubileu un skravu tinha ki ‘voltaba pa se família.’ Asi ningen ka ta fikaba skravu pa tudu ténpu sen speransa di ser libertadu. Kel-li ta mostra ma Jeová ta preokupaba di verdadi ku se povu!

4-5. Pamodi ki é inportanti nu prende sobri Jubileu?

⁴ Di ki otu manera Jubileu ta djudaba israelitas? Jeová splika: ‘Ningen ka debe fika póbri na bu meiu, pamodi Jeová di sertéza ta abensua-u na téra ki Jeová, bu Deus, ta da-u pa bu toma sima un eransa.’ (Deut. 15:4) Kel-li é ka diferenti di kuzê ki ta kontise na mundu di oji? Kes algen riku sta ta bira kada bês más riku i póbri kada bês más póbri!

⁵ Dja ki nos é kriston, nu ka meste sigi Lei di Muizes. Kel-li krê fla ma nu ka meste sigi kel lei sobri Jubileu pa liberta skravu, pa púrdua dívida ô ntrega pesoas ses txon. (Rom. 7:4; 10:4; Efé. 2:15) Má é inportanti nu prende sobri Jubileu. Pamodi? Pamodi kel liberdadi ki Jeová ta daba se povu duránti kel komemorason, ta lenbra-nu di un liberdadi ki nu pode ben ten.

6. Di kuzê ki nu meste libertadu?

⁶ Nos tudu nu meste ser libertadu pamodi nos é skravu di pekadu. Kel-li é un di kes fórma di skravidon más tristi ki ten. Pamodi pekadu, nu ta bira bédju, nu ta duense i nu ta móre. Txeu algen ta odja klaru kes rezultadu di pekadu óras ki es ta odja na spedju ô óras ki es sta duenti i es ten ki bai konsulta. Tanbê nu  ta fika dizanimadu óras ki nu faze algun pekadu. Apóstlu Polu rekonhise ma el staba ‘prézu pa lei di pekadu ki [staba na se] korpu.’ Tanbê el fla: ‘Ómi mizeriadu ki mi é! Ken ki ta libra-m di kel korpu ki sta kondenadu pa móre?’ — Rom. 7:23, 24.

7. Kuzê ki Izaías dja flaba sobri liberdadi?

⁷ Nu ta agradise Jeová pamodi el ranja un manera di salva-nu ô liberta-nu di pekadu. Jizus é kel algen ki da-nu xansi di ten es liberdadi. Más di 700 anu antis di Jizus ben pa Téra, proféta Izaías dja flaba ma ta ben tinha un grandi libertason. Kel grandi libertason ta ben sérba mutu más midjór ki kel libertason ki ta kontiseba duránti anu di Jubileu na Israel antigu. El skrebe: ‘Spritu di Jeová, ki é kel Sinhor Más Grandi, sta riba mi, pamodi Jeová skodje-m pa N pâpia di notísias sábi pa kes mansu. El manda-m pa N kura kes ki sta ku korason tristi, pa pâpia di liberdadi pa kes ki sta prézu’. (Isa. 61:1) Kel profesia li staba ta pâpia di kenha?

8. Profesia di Izaías staba ta pâpia di kenha?

⁸ Es profesia inportanti sobri liberdadi kumesa ta kunpri dipôs ki Jizus kumesa se trabadju di pregason. Kantu el entra na sinagóga di Nazaré, kel sidadi ki el kriadu, Jizus lé kel profesia di Izaías pa kes judeu ki staba la. Jizus fla ma kel profesia staba ta pâpia sobri el. El fla: ‘Spritu di Jeová sta riba mi, pamodi el skodje-m pa N pâpia di notísias sábi pa kes algen póbri. El manda-m pa N pâpia di liberdadi pa kes ki sta prézu i pa N fla ma kes ki é ségu ta torna odja, pa N liberta kes ki sta maltratadu, pa prega sobri kel anu ki Jeová skodje.’ (Luc. 4:16-19) Modi ki Jizus kunpri kel profesia li?

9. Ki tipu di liberdadi txeu algen na ténpu di Jizus staba ta spéra?

⁹ Pesoas kumesa ta resebe kel liberdadi ki Izaías pâpia di el na ténpu di Jizus. Jizus konfirma kel-li kantu el fla: ‘Oji dja kunpri es párti di Skrituras ki nhos kaba di obi.’ (Luc. 4:21) Talvês txeu di kes algen ki obi Jizus ta lé profesia di Izaías staba ta spéra algun mudansa na pulítika, sima ser libertadu di govérnu di Roma. Pode ser ki es ta xintiba sima kes  dôs ómi ki fla: ‘Nu staba ta spéra ma kel ómi li éra kel ki ta ben libertaba Israel.’ (Luc. 24:13, 21) Má nu sabe ma Jizus ka insentiva se sigidoris pa rabela kóntra govérnu duru di Roma. Envês di kel-li, el fla-s pa es paga ‘Séza kel ki é di Séza’. (Mat. 22:21) Nton modi ki Jizus liberta pesoas di kel ténpu?

10. Di kuzê ki Jizus liberta pesoas?

¹⁰ Fidju di Deus ben pa liberta pesoas di dôs kuza. Primeru, Jizus djuda pesoas liberta di ensinus falsu di kes xéfi di relijion. Txeu judeu na kel ténpu éra skravu di tradisons i di ensinus falsu. (Mat. 5:31-37; 15:1-11) Kes ki ta flaba ma es staba ta djuda otus algen sirbi Deus éra sima un gia ségu. Tanbê, es nega Misías i kes verdadi ki el inxina. Pur isu, es fika sen konxe Deus i es kontinua na pekadu. (João 9:1, 14-16, 35-41 ) Má, Jizus inxina verdadi i el da bon izénplu. Asi, el mostra kes algen mansu modi ki es pode fikaba livri di kes ensinu falsu. — Mar. 1:22; 2:23–3:5.

11. Kal ki é kel sugundu kuza ki Jizus liberta-nu di el?

¹¹ Sugundu, Jizus da tudu algen xansi di fika livri di pekadu. El da se vida pa resgata-nu, pur isu Deus pode púrdua pekadus di kes algen ki ten fé na resgati i ki ta mostra fé através di kuzas ki es ta faze. (Heb. 10:12-18) Jizus fla: ‘Si Fidju liberta nhos, nhos ta ser livri di verdadi.’ (João 8:36 ) Kel liberdadi li é mutu más midjór di ki kel liberdadi ki israelitas ta resebeba na anu di Jubileu! Pur izénplu, un ómi ki libertadu duránti Jubileu podia fikaba skravu otu bês i un dia el ta moreba. Má Jizus da-nu xansi di ten liberdadi pa tudu ténpu.

12. Kenha ki é kes primeru algen ki resebe kel liberdadi ki Jizus papiaba di el?

¹² Na dia di Pentikósti di anu 33, Jeová skodje ku spritu santu kes apóstlu i otus ómi ku mudjeris fiel. El adota-s sima se fidjus, asi óras ki es sérba resusitadu, es ta ba governaba na Séu djuntu ku Jizus. (Rom. 8:2, 15-17) Es bira kes primeru algen ki resebe kel liberdadi ki Jizus papiaba di el na sinagóga na Nazaré. Kes ómi ku mudjeris fika livri di kes ensinu falsu i kustumus di kes xéfi di relijion ki Bíblia ta kondena. Tanbê pa Deus, es staba livri di pekadu, ki ta poi algen ta móre. Kantu kes sigidor di Kristu  skodjedu ku spritu santu na anu 33, kumesa kel Jubileu pa kristons, ki ta ben tirmina na fin di kel Reinu di Kristu di mil anu. Ki kuzas sábi ta ben kontise désdi gósi ti fin di Reinu di mil anu?

13-14. Alén di kes kriston skodjedu ku spritu santu, kenha ki pode resebe kel liberdadi ki Jizus pâpia di el?

¹³ Oji, milhons di algen di tudu nason ta faze párti di ‘otus ovelha’. (João 10:16 ) Deus ka skodje-s pa es bai governa ku Jizus na Séu. Má, Bíblia ta fla ma es ten xansi di vive na Téra pa tudu ténpu. Kel-li é bu speransa?

¹⁴ Mésmu gósi bu sta ta resebe alguns di kes bon kuza ki kes skodjedu ku spritu santu tanbê sta ta resebe. Pamodi fé ki bu ten na resgati di Jizus, bu pode pidi Jeová pa purdua-u bus pekadu. Asi bu pode ten aprovason di Deus i un konsénsia trankilu. (Efé. 1:7; Apo. 7:14, 15) Tanbê, pensa na otus benson ki bu ten pamodi bu sta livri di ensinus falsu. Jizus fla: ‘Nhos ta konxe verdadi i verdadi ta liberta nhos.’ (João 8:32 ) Nu sta txeu kontenti di ten es liberdadi!

15. Di kuzê ki nu ta ben libertadu i ki bensons nu ta ben resebe na futuru?

¹⁵ Nu pode ten sertéza ma ta ben ten un liberdadi mutu más grandi. Ka ta  dura, Jizus ta ben kaba ku tudu relijion falsu i ku govérnus injustu di ómi. Deus ta ben proteje ‘un monti di algen’ ki ta sirbi-l, i el ta ben da-s txeu benson óras ki Téra bira un paraízu. (Apo. 7:9, 14) Milhons di otus algen ta ben resusitadu i es ta ben ten xansi di libertadu di tudu kes rezultadu di pekadu di Adon. — Atos 24:15.

16. Ki liberdadi mutu más midjór nu ta ben ten?

¹⁶ Duránti kel Reinu di mil anu, Jizus i kes ki ta bai governa ku el, ta ben djuda tudu algen ten saúdi perfetu i un amizadi perfetu ku Deus. Na kel ténpu ta ben ten liberdadi mutu más midjór ki kel ki israelitas ta resebeba na anu di Jubileu. Kel-li krê fla ma tudu algen ki ta sirbi Jeová ku lialdadi ta ben sta perfetu, livri di pekadu.

17. Di akordu ku Isaías 65:21-23, modi ki vida di povu di Deus ta ben ser? (Odja dizenhu na kapa.)

¹⁷ Profesia di Izaías ta mostra modi ki vida na Téra ta ben ser. (Lé Isaías 65:21-23.) Vida ka ta ben ser paradu ô sen nada faze. Má Bíblia ta mostra ma na kel ténpu povu di Deus ta ben xinti ma es ten valor i ku un trabadju ki bale péna. Nu pode ten sertéza ma na fin di kel Reinu di Kristu di mil anu, ‘kriason tanbê ta libertadu di ser skravu di korupson i es ta ben ten liberdadi ku glória di fidjus di Deus.’ — Rom. 8:21.

18. Pamodi ki nu pode ten sertéza ma nu ta ben ten un futuru sábi?

¹⁸ Sima Jeová ranja manera pa israelitas tinha ténpu pa trabadja i diskansa, el ta ben faze mésmu kuza pa se povu duránti kel Reinu di Kristu di mil anu. Di sertéza kel-la ta ben ser un ténpu pa adora Deus. Adora Deus é inportanti pa nu ser filís oji, i mésmu na kel mundu novu, el ta ben ser inportanti pa nu ser filís. Pur isu, tudu algen fiel ta ben xinti alegria di ten un trabadju ki bale péna i di sirbi Deus duránti kel Reinu di Kristu di mil anu.