1, 2. (a) Pamodi ki izénplu di Nué, Daniel i Jó ta da-nu koraji? (b) Na ki situason Ezekiel skrebe palavras ki sta na Ezequiel 14:14 ?

 BU STA ta lida ku prublémas sima duénsa, falta di dinheru ô pirsigison? Alvês bu ta atxa ma é difísil sirbi Jeová ku alegria? Si bu kustuma xinti asi, nton izénplu di Nué, Daniel i Jó ta da-u koraji. Es tanbê es éra inperfetu i es pasa pa txeu prubléma sima kes ki nu ta pasa oji. Alguns di kes prubléma poi ses vida na prigu. Má es kontinua lial i es bira izénplus di fé i obidiensa dianti di Deus. — Lé Ezequiel 14:12 -14.

² Téma di es artigu tradu di kel testu di Bíblia ki Ezekiel skrebe na Babilónia na anu 612 A. J. a (Eze. 1:1; 8:1) Faltaba sô sinku anu pa distruison di Jiruzalen, pamodi es disvia di adorason verdaderu. Kel-li kontise na anu 607 A. J.  Sô alguns algen ki tinha kualidadis sima Nué, Daniel i Jó ki salva. (Eze. 9:1-5) Na meiu di kes algen staba Jeremias, Baruki, Ebedi-Meleki i rekabitas.

 3. Kuzê ki nu sta ben studa na es artigu?

³ Oji tanbê é sô kes algen ki Jeová ta atxa ma é justu, sima Nué, Daniel i Jó ki ta ben salva, óras ki kel mundu li ben distruídu. (Apo. 7:9, 14) Nton nu ben odja pamodi ki Jeová uza-s kómu izénplu di justisa. Sima nu ta ba ta pâpia di kada un di es, nu ta ben konsentra (1) na prublémas ki es pasa pa el i (2) modi ki nu pode imita ses fé i obidiensa.

4, 5. Ki prublémas Nué pasa i pamodi ki el é un bon izénplu pa nos?

⁴ Prublémas ki Nué pasa. Na ténpu di Enoki, ki éra bizavó di Nué, gentis éra mau dimás. Es ta flaba ‘kuzas gravi’ kóntra Jeová. (Judas 14, 15 ) Violénsia staba ta bira kada bês más txeu. I na ténpu di Nué ‘téra staba xeiu di violénsia.’ Anjus mau ki bira sima umanus kaza ku mudjeris i es ten fidjus ki éra jigantis i violéntu. (Gén. 6:2-4, 11, 12) Má Nué éra diferenti. Bíblia ta fla: ‘Jeová staba kontenti ku Nué. El ta fazeba sô kuzas dretu na meiu di gentis na se ténpu. Nué ta andaba ku Deus verdaderu.’ — Gén. 6:8, 9.

⁵ Pensa kuzê ki kes palavra li ta fla-nu sobri Nué. Repara ma Nué ka anda ku Deus sô 70 ô 80 anu, ki é ténpu di vida di txeu algen oji. El vive na kel mundu mau antis di Dilúviu kuazi 600 anu! (Gén. 7:11) Tanbê, diferenti di nos oji, el ka ta staba na un kongregason di irmons na fé. Ta parse ma nen se irmons di mai ku pai ka djuda-l na se amizadi ku Deus. b

 6. Di ki maneras Nué mostra grandi koraji?

⁶ Nué ka ta preokupaba sô ku ten un vida normal. Má tanbê el éra ‘pregador di justisa’, asi el mostra tudu algen se fé na Jeová. (2 Ped. 2:5) Apóstlu Polu skrebe: ‘Através di es fé, el kondena mundu’. (Heb. 11:7) Kel-li ta mostra ma Nué, lida ku trósa, pirsigison i talvês ti violénsia. Má el ka ‘treme frenti di ómi’. (Prov. 29:25) Envês di kel-li, el tinha koraji ki Jeová ta da se sérvus fiel.

 7. Kantu Nué staba ta faze arka ki prublémas el pasa pa el?

⁷ Dipôs ki Nué anda ku Deus pa más di 500 anu, Jeová fla-l pa el faze un arka pa salva umanus i animal. (Gén. 5:32; 6:14) Kel-la éra un trabadju difísil pa Nué pamodi éra un konstruson grandi. I tanbê kel-la ta poba el ta sufri más trósa i pirsigison. Má simé, el kontinua obidienti i ku se fé. ‘El faze sima el mandadu.’ — Gén. 6:22.

 8. Di ki maneras Nué mostra ma el ta kunfiaba ma Jeová ta kuidaba di el?

⁸ Otu difikuldadi di Nué éra sustenta se mudjer ku se fidjus. Antis di Dilúviu, pesoas ta trabadjaba duru pa konsigiba sustentu i Nué tinha ki fazeba mésmu kuza. (Gén. 5:28, 29) Má simé, el ka dexa kuzas material fika frenti di se amizadi ku Deus. Nbóra el pasa uns 40 ô 50 anu ta faze arka, el konsentra na se amizadi ku Jeová. I dipôs di Dilúviu, el kontinua ta kuida di se amizadi ku  Jeová pa más 350 anu. (Gén. 9:28) Nué é un grandi izénplu di fé i obidiensa!

9, 10. (a) Modi ki nu pode imita fé i obidiensa di Nué? (b) Kuzê ki Jeová ta faze pa kes algen ki ta imita fé ku obidiensa di Nué?

⁹ Modi ki nu pode imita fé i obidiensa di Nué? Nu ta faze kel-li óras ki nu difende justisa di Deus, ka faze párti di mundu di Satanás i kontinua ta poi Reinu na primeru lugar. (Mat. 6:33; João 15:19 ) Nu sabe ma mundu ka gosta di manera ki nu ta leba vida. Mésmu gósi, óras ki nu ta sigi leis di Deus sobri kazamentu i konportamentu seksual, pesoas ta pâpia mal di nos. (Lé Malaquias 3:17, 18.) Sima Nué, nu ta prifiri agrada Deus envês di agrada ómis. Nu sabe ma é sô el ki ta da-nu vida pa tudu ténpu. — Lucas 12:4, 5.

¹⁰ Má i bo? Bu ta kontinua ta anda ku Deus sikrê es faze-u trósa, es kritika-u ô óras ki bu tene falta di dinheru? Bu ta kontinua ta kúnfia ma Jeová ta kuida di bo? Si bu imita fé i obidiensa di Nué, bu pode ten sertéza ma Jeová ta kuida di bo. — Fil. 4:6, 7.

11. Ki prublémas difísil Daniel ku se três kunpanheru pasa na Babilónia? (Odja dizenhu na komésu di studu.)

¹¹ Prublémas ki Daniel pasa. Daniel lebadu prézu pa Babilónia, ki éra un sidadi xeiu di fitisaria ku bruxaria i adorason falsu. Gentis di Babilónia ta disprezaba judeus i ta fazeba trósa di ses Deus Jeová. (Sal. 137:1, 3) Kes judeu ki éra fiel sima Daniel ta fikaba txeu maguadu. Tanbê Daniel i se três kunpanheru Ananias, Mizael i Azarias, ta staba na palásiu ta trenadu pa sirbi rei. Rei disidi kuzê ki es ta kumeba i kuzê ki es ta bebeba. Nton kumida ku bebida bira un prubléma pa Daniel pamodi ‘kumida di rei ta poba el inpuru’. — Dan. 1:5-8, 14-17.

12. (a) Ki bons kualidadi Daniel mostra? (b) Kuzê ki Jeová ta atxaba di Daniel?

¹² Daniel éra intilijenti, pur isu el dadu alguns responsabilidadi inportanti. Kel-li podia ser un prubléma pa Daniel. (Dan. 1:19, 20) Má envês di el fika orgulhozu i temozu, el kontinua umildi, nunka el ka txoma atenson pa el i sénpri el da glória pa Jeová. (Dan. 2:30) Kantu Daniel éra jóven, Jeová fla ma el éra un izénplu di justisa sima Nué ku Jó. Má, Daniel mereseba kunfiansa ki Deus tinha na el? Klaru ki sin! Daniel kontinua fiel i obidienti ti fin di se vida. El tinha uns 90 anu, kantu un anju di Deus fla-l: ‘Ó Daniel, abo é ómi ki ten txeu valor.’ — Dan. 10:11.

13. Di ki manera Daniel foi un benson pa se povu?

¹³ Daniel tinha bensons di Deus, pur isu el resebe txeu responsabilidadi na govérnu di Babilónia i di Média ku Pérsia. (Dan. 1:21; 6:1, 2) Talvês é Jeová ki orienta asuntus di manera pa Daniel bira un benson pa se povu, sima Juzé na Ijitu i Ester ku Mordekai na Pérsia. c (Dan. 2:48) Imajina modi ki kes judeu ki staba prézu, sima Ezekiel, xinti konsoladu na odja Jeová ta orienta asuntu di kel manera la!

14, 15. (a) Di ki maneras nos situason é sima di Daniel? (b) Kuzê ki ken ki ten fidju pode prende ku izénplu di pai ku mai di Daniel?

 ¹⁴ Modi ki nu pode imita fé ku obidiensa di Daniel? Nu pode fla ma oji nu sta ta vive sima si nos é stranjerus, na un mundu xeiu di konportamentu mariadu i adorason falsu. Mundu sta si pamodi Babilónia kel Grandi, ki ta reprizenta tudu kes relijion falsu, é ‘morada di dimónis’. (Apo. 18:2) Nos tanbê nu ten ki ser diferenti sikrê nu fazedu trósa. (Marcos 13:13 ) Sima Daniel, nu meste sforsa pa nu ten un amizadi fórti ku Jeová, nos Deus. Óras ki nos é umildi, nu ta kúnfia i nu ta obi ku Jeová, nu ta ser algen di grandi valor pa el. — Ageu 2:7.

¹⁵ Ken ki ten fidju pode prende ku izénplu di pai ku mai di Daniel. Di ki manera? Nbóra tinha txeu kuza mariadu na Judá kantu Daniel éra pikinoti, el kria ku amor pa Jeová. Má kel-li ka kontise atoa. Ta da pa odja ma se pai ku se mai trena-l dretu. (Prov. 22:6) Nómi di Daniel ki siginifika ‘nha Juís é Deus’, ta mostra ma se pai ku se mai ta adoraba Deus. (Dan. 1:6, nóta di rodapé.) Pur isu pai ku mai, ka nhos dizisti di nhos fidjus, má nhos inxina-s ku paxénxa. (Efé. 6:4) Tanbê nhos ora ku es i nhos ora pa es. Óras ki nhos ta sforsa pa poi verdadis di Bíblia na ses korason, Jeová ta da nhos txeu benson. — Sal. 37:5.

16, 17. Modi ki Jó prova se lialdadi pa Jeová na rikéza i na pobréza?

¹⁶ Prublémas ki Jó pasa. Vida di Jó muda di un óra pa otu. Antis di el pasa pa prublémas, el éra ‘ómi más inportanti di orienti.’ (Jó 1:3 ) El éra riku, konxedu i ruspetadu. (Jó 29:7-16 ) Má simé Jó ka bira orgulhozu i nen el ka xinti ma el ka mesteba ajuda di Deus. Jeová txoma-l di ‘nha sérvu’ i el fla: ‘El é un omi rétu i justu, ki ta ruspeta Deus i ki ka ta seta kuzas mau.’ — Jó 1:8.

¹⁷ Na poku ténpu, vida di Jó rabida di kabésa ba baxu. El kai na pobréza i na dizusperu. Nu sabe ma kulpadu éra Satanás ki konta mintira, kantu el fla ma Jó ta adoraba Deus sô pa interesi. (Lé Jó 1:9, 10.) Jeová ka fika sen faze  nada. Má, el da Jó oportunidadi di prova se lialdadi i mostra ma el ta adoraba Jeová di korason.

18. (a) Kuzê ki ta dexa-u dimiradu ku lialdadi di Jó? (b) Kuzê ki nu ta prende sobri Jeová pa manera ki el trata Jó?

¹⁸ Satanás faze un monti kuza kóntra Jó i el pô-l ta pensa ma Deus ki éra kulpadu. (Jó 1:13-21 ) Dipôs, três amigu di Jó ki finji ma sta ba konsolaba el, fla-l kuzas ki pô-l más dizanimadu. Es fla-l ma Deus staba ta da-l kel ki el mereseba! (Jó 2:11 ; 22:1, 5-10 ) Má Jó kontinua fiel. É verdadi ki alguns bês el pâpia sen pensa, má Jeová ntende dór ki Jó staba ta xinti. (Jó 6:1-3 ) Jeová odja tudu kuza ki Satanás faze pa dizanima i kaba ku Jó, más simé el ka da Jeová kósta. Kantu kes prubléma pasa, Jeová da Jó tudu kes kuza ki el tinha antis, dôs bês más txeu i tanbê más 140 anu di vida. (Tia. 5:11) Duránti tudu kel ténpu li, Jó kontinua ta adora sô Jeová. Modi ki nu ten sertéza ma é si? Kantu Ezekiel skrebe kes palavra ki tradu téma di es artigu di studu, dja tinha senténas di anu ki Jó dja moreba.

19, 20. (a) Modi ki nu pode imita fé i obidiensa di Jó? (b) Modi ki nu ta imita konpaxon di Deus na manera ki nu ta trata otus?

¹⁹ Modi ki nu pode imita fé i obidiensa di Jó? Ka ta nporta ki situason nu sta pasa pa el, nu kontinua ta poi Jeová na primeru lugar na nos vida. Nu kúnfia sénpri na el i nu obi ku el di tudu korason. Nu ten mutu más motivus pa nu faze si di ki Jó tinha. Pur izénplu: nu sabe txeu kuza sobri Satanás i se armadilhas. (2 Cor. 2:11) Ku ajuda di livru di Jó nu sabe pamodi ki Deus ta dexa algen ta sufri. Profesia di Daniel, ta djuda-nu ntende ma Jizus Kristu é Rei di Reinu di Deus i el ta ben governa Téra interu. (Dan. 7:13, 14) I nu sabe ma ka ta dura kel Reinu li ta ben kaba ku tudu sufrimentu pa tudu ténpu.

²⁰ Prublémas ki Jó pasa, ta inxina-nu ma nu debe mostra konpaxon pa nos irmons ki sta pasa pa difikuldadis. Sima Jó, alvês alguns algen pode pâpia sen pensa. (Ecl. 7:7) Má envês di julga-s, nu mostra-s konpaxon i ma nu ta ntende-s. Asi nu ta imita nos Pai Jeová ki é mizerikordiozu i ki krê-nu txeu. — Sal. 103:8.

21. Di akordu ku 1 Pedro 5:10, kuzê ki kontise na vida di Nué Daniel i Jó?

²¹ Nbóra Nué, Daniel i Jó vive na ténpu diferenti i es pasa pa situasons diferenti, es aguenta firmi. Ses stória ta lenbra-nu kuzas ki apóstlu Pedru skrebe: ‘Dipôs ki dja nhos sufri un poku, Deus di tudu bondadi ki nu ka merese, ta konpleta nhos trenamentu. El ta poi nhos fika firmi, el ta poi nhos fika fórti, el ta poi nhos finkadu na un lisérsi firmi.’ — 1 Ped. 5:10.

22. Kuzê ki nu ta ben odja na kel otu studu?

²² Através di apóstlu Pedru, Jeová promete ma el ta djuda se sérvus fika firmi i fórti. Kes palavra li tanbê ta aplika na povu di Deus oji. Nos tudu nu krê pa Jeová da-nu forsa i pa nu kontinua firmi na nos adorason. Tanbê nu krê imita fé i obidiensa di Nué, Daniel i Jó. Na kel otu studu nu ta ben odja, ma es kontinua fiel pamodi es konxeba Jeová dretu. Es ta ‘ntendeba tudu kuza’ ki Jeová ta speraba di es. (Prov. 28:5) Mésmu kuza pode kontise ku nos.