DÔS jóven staba ta anda pa un lugar di komérsiu na sidadi di Baguio, na Filipinas. Es odja un karinhu di tistimunhu pa públiku, má es ka para pa djobe. Kel irman ki staba ta trabadja na karinhu, ki txoma Helen, da-s un sorizu grandi. Kes jóven kontinua ta anda, má es fika dimiradu ku kel sorizu.

Dipôs, kantu kes jóven staba ta volta pa kaza di otokaru, es odja un plaka na Salon di Reinu ku kes mésmu létra ki es odjaba na karinhu: jw.org. Pur isu, es dixi di otokaru, pa es ba odja ki óra ki kongregasons ta faze runion na kel Salon.

Poku ténpu dipôs, kes dôs jóven ba sisti un runion. I kenha ki es odja lógu ki es entra na Salon di Reinu? Helen! Es lenbra di el lógu. El éra kel mésmu irman ki daba es kel sorizu. Helen fla: “Kantu es txiga nha pértu, N fika un poku preokupadu. N pensa ma talvês N faze algun kuza mariadu.” Kes jóven splika Helen pamodi ki es staba la.

Kes jóven gosta txeu di runion i di konxe irmons. I es xinti sima ki es staba na ses kaza. Kantu es odja alguns irmon ta linpa Salon di Reinu dipôs di runion, es oferese pa djuda. Un di es ka sta mora más na Filipinas, má kel otu kumesa ta sisti runion i ta studa Bíblia. Sô pamodi un sorizu!