1. Pamodi ki nu ta dadu konsedju i pamodi ki nos tudu nu meste konsedju?

 DI VÊS en kuandu nos tudu nu ta meste konsedju. Na alguns situason, nu pode pidi konsedju na un algen ki nu ta ruspeta. Má alvês, un irmon ki sta preokupadu ku nos pode fla-nu ma nu sta kuazi ta da ‘un pasu mariadu’. (Gál. 6:1) Tanbê, nu pode dadu konsedju óras ki nu faze un pekadu gravi. Ka ta nporta pamodi ki nu dadu kel konsedju, nu debe obi ku el. Faze kel-li é bon pa nos i el pode salva nos vida! — Pro. 6:23.

2. Sima sta na Provérbios 12:15, pamodi ki nu debe obi konsedju?

² Kel testu ki tradu téma di kel studu li, ta insentiva-nu pa nu ‘obi kes palavra di kes ki ten sabedoria’. (Pro. 22:17) Ninhun di nos ka sabe tudu kuza. Sénpri ten algen ki sabe más di ki nos ô ki ten más spiriénsa di ki nos. (Lé Provérbios 12:15.) Pur isu, óras ki nu ta obi konsedju nu ta mostra ma nos é umildi. Kel-li ta mostra ma nu ta seta nos limitason i nu ta rekonhese ma nu meste ajuda pa nu alkansa nos obijetivu. Ku ajuda di spritu santu di Jeová, rei Salumon skrebe: ‘Ku konsedju di txeu algen ta ten bons rezultadu.’ — Pro. 15:22.

3. Di ki maneras nu pode dadu konsedju?

³ Nu pode dadu konsedju di manera indirétu ô dirétu. Kuzê ki siginifika konsedju indirétu? Konsedju indirétu é óras ki nu ta lé algun kuza na Bíblia ô na nos publikason ki ta pô-nu ta para i ta pensa na nos konportamentu i ta pô-nu ta muda nos manera di aji. (Heb. 4:12) Má kuzê ki siginifika konsedju dirétu? Konsedju dirétu é óras ki un ansion ô un otu irmon ki ten más spiriénsa ta  fla-nu algun kuza ki nu meste midjora. Si un algen ki ta ama-nu da-nu un konsedju ku bazi na Bíblia, nu ta mostra nos gratidon óras ki nu ta obi ku kel konsedju i aplika-l.

4. Sima sta na Eclesiastes 7:9, alvês modi ki nu ta reaji óras ki nu ta dadu konsedju?

⁴ Na verdadi, pode ser difísil seta un konsedju dirétu i nu pode ti fika maguadu. Pamodi? Pamodi nbóra nu sabe ma nos é inperfetu, alvês é difísil seta konsedju óras ki un algen ta fla-nu un kuza ki nu meste midjora. (Lé Eclesiastes 7:9.) Nu pode kumesa ta ranja diskulpa i nu pode pergunta pamodi ki kel algen sta ta da-nu konsedju. Tanbê, nu pode fika maguadu ku manera ki el da-nu konsedju i nu pode ti atxa fadja na kel algen ki da-nu konsedju. Talvês nu pode pensa: ‘El é kenha pa el da-m konsedju? El tanbê el ta fadja!’ Si nu ka gosta di kel konsedju, nu ka ta seta-l ô nu pode ti ba pâpia ku otus algen, pamodi nu ta spéra ma es ta fla-nu kel ki nu krê obi.

5. Kuzê ki nu sta ben odja na kel studu li?

⁵ Na kel studu li, nu sta ben odja alguns izénplu na Bíblia di kes algen ki ka seta konsedju i di kes ki seta konsedju. Tanbê, nu sta ben odja kuzê ki ta djuda-nu seta konsedju i ki bons rezultadu nu ta ten si nu faze kel-li.

6. Kuzê ki nu ta prende di manera ki rei Rubuon reaji ku konsedju ki el dadu?

⁶ Odja izénplu di Rubuon. Kantu el bira rei di Israel, se povu bai faze-l un pididu. Es pidi-l pa el da-s ménus trabadju ki se pai Salumon ta daba es. El ba pâpia ku kes ómi ki tinha más spiriénsa na Israel, pa el odja modi ki el pode djudaba povu. Kes ómi ku más spiriénsa aviza rei ma si el faze kuzê ki povu staba ta pidi-l, sénpri kel povu ta apoiaba el. (1 Reis 12:3-7) Ta parse ma Rubuon ka fika kontenti ku kel konsedju, pur isu el bai pâpia ku se kolégas. Kes ómi li talvês tinha uns 40 anu i dja es tinha alguns spiriénsa na vida. (2 Cró. 12:13) Má na kel okazion, es ka da Rubuon un bon konsedju. Es fla-l pa el poi povu ta trabadja más txeu. (1 Reis 12:8-11) Rubuon dadu dôs konsedju diferenti. El pode pidiba Jeová na orason pa djuda-l sabe kal di kes konsedju ki el debe sigiba. Má envês di kel-li, el seta kel konsedju ki el atxa ma éra más midjór i el faze kuzê ki kes ómi más jóven fla-l pa el faze. Kel-li traze txeu sufrimentu pa Rubuon i pa povu di Israel. Alvês, konsedju ki nu ta dadu nen sénpri é ka kel ki nu krê obi. Má, si el ten bazi na Palavra di Deus, nu debe seta-l.

7. Kuzê ki izénplu di rei Uzias ta inxina-nu?

⁷ Rei Uzias ka seta konsedju. El entra na kel párti di ténplu di Jeová, undi ki sô saserdótis tinha direitu di entraba i el tenta oferese insénsu. Kes saserdóti di Jeová fla-l: ‘É ka nho, rei Uzias, ki debe kema insénsu pa Jeová! É sô saserdótis ki debe kema insénsu’. Modi ki Uzias reaji? Si el éra umildi, el setaba kel konsedju i el saíba di ténplu lógu, Jeová podia purduaba el. Má envês di kel-li, ‘Uzias fika xatiadu’. Pamodi ki el ka seta kel konsedju? Talvês el ta atxaba ma el tinha direitu di fazeba kuzê ki el kreba sô pamodi el éra rei. Má é ka si ki Jeová ta pensaba. Dja ki el faze un kuza ki el ka tinha direitu di faze, Jeová kastiga-l  ku lépra i el ‘kontinua leprozu ti dia ki el móre.’ (2 Cró. 26:16-21) Izénplu di Uzias ta inxina-nu ma ka ta nporta nos é kenha, si nu nega un konsedju ki ten bazi na Bíblia, nu ka ta ten benson di Jeová.

8. Modi ki Jó reaji kantu el dadu konsedju?

⁸ Dja nu odja izénplus di kes ki ka seta konsedju, má Bíblia tanbê ten bons izénplu di pesoas ki resebe benson di Jeová pamodi es seta konsedju. Odja izénplu di Jó. Nbóra el ta amaba Deus i el krê fazeba se vontadi, el éra inperfetu. Pamodi el staba preokupadu dimás el fla alguns kuza mariadu. Pur isu, Eliú ku Jeová da-l konsedju dirétu. Modi ki Jó reaji? El fla: ‘N pâpia sen ntende. N ta volta pa tras na kel ki N fla, i N ta rapende na téra ku sinza.’ Jeová abênsua Jó pamodi el foi umildi i el seta kel konsedju. — Jó 42:3-6, 12-17.

9. Modi ki Muizés reaji kantu el dadu konsedju i pamodi ki el é un bon izénplu pa nos?

⁹ Muizés é un bon izénplu di algen ki seta konsedju dipôs ki el faze un pekadu gravi. Un bês el fika uma xatiadu i el ka da Jeová ónra. Pamodi kel-li, Muizés perde priviléjiu di entra na kel téra ki Deus prometeba es. (Núm. 20:1-13) Kantu Muizés tenta pâpia otu bês ku Jeová sobri kel asuntu, Jeová fla-l: ‘Nunka más ka bu pâpia ku mi sobri kel asuntu li.’ (Deut. 3:23-27) Muizés ka fika xatiadu. Envês di kel-li, el seta kel disizon di Jeová i Jeová kontinua ta uza-l pa el toma kónta di kes israelita. (Deut. 4:1) Jó ku Muizés é bons izénplu pa nu imita óras ki nu ta dadu konsedju. Jó koriji se manera di pensa i el ka tenta ranja diskulpa. Muizés mostra ma el seta konsedju di Jeová pamodi el kontinua fiel sikrê dipôs ki el perde kel priviléjiu ki el ta daba txeu valor.

10. (a) Kuzê ki Provérbios 4:10-13 ta inxina-nu sobri kes bon rezultadu di seta konsedju? (b) Modi ki alguns irmon mostra bon atitudi kantu es dadu konsedju?

¹⁰ Óras ki nu ta imita izénplu di ómis fiel sima Jó ku Muizés, nu ta ten bons rezultadu. (Lé Provérbios 4:10-13.) Txeu di nos irmons ku irmans ta faze kel-li. Odja kuzê ki un irmon ki txoma Emanuel, ki ta vive na Kongu, fla sobri un konsedju ki el dadu: “Irmons maduru di nha kongregason odja ma N staba kuazi ta perde nha amizadi ku Jeová i es djuda-m. N aplika ses konsedju i kel-la djuda-m ivita txeu prubléma.” * Un pionera ki txoma Megan, ki ta vive na Kanadá fla sobri un konsedju ki el dadu: “É ka kel-la ki N krê obiba, má éra kel-la ki N staba ta meste obi.” Un irmon ki txoma Marku, ki ta vive na Kroásia fla: “N perde un priviléjiu ki N tinha, má óras ki N ta djobe pa tras, N ta odja ma kel konsedju djuda-m rekupera nha amizadi ku Jeová otu bês.”

11. Kuzê ki irmon Karl Klein fla sobri konsedju ki el dadu?

¹¹ Otu algen ki tevi bons rezultadu pamodi el seta konsedju é irmon Karl Klein, ki ta fazeba párti di Grupu Enkaregadu di Óbra. Na se stória di vida, irmon Karl fla ma un bês se grandi amigu, Joseph Rutherford, da-l un konsedju ki due-l txeu. Irmon Karl fla ma na komésu el fika maguadu ku kel konsedju. El fla: “Kantu N torna nkontra ku [irmon Rutherford], el fla-m kontenti:  ‘Oi Karl!’ Má pamodi inda N staba maguadu, N responde baxu. El fla-m: ‘Karl, toma kuidadu! Diabu sta bu tras!’ N fika ku vergónha i N fla-l: ‘É ka nada, irmon Rutherford.’ Má el sabia ma N staba maguadu, pur isu el torna fla-m: ‘N ta ntende. Má, toma kuidadu. Diabu sta bu tras.’ El tinha razon! Óras ki nu ta fika xatiadu ku un irmon, prinsipalmenti pamodi el fla-nu un kuza ki el ten direitu di fla. . . , é fásil nu kai na armadilha di Diabu.” * (Efé. 4:25-27) Irmon Karl seta kel konsedju ki irmon Rutherford da-l i es kontinua bons amigu.

12. Modi ki umildadi pode djuda-nu seta konsedju? (Salmo 141:5)

¹² Kuzê ki pode djuda-nu seta konsedju? Nu meste ser umildi i lenbra ma nos é inperfetu i ma txeu bês nu ta fadja. Sima dja nu odjaba antis, Jó tinha un ideia mariadu, má dipôs el muda se manera di pensa i Jeová abensua-l. Pamodi? Pamodi Jó éra umildi. El mostra kel-li kantu el seta konsedju ki Eliú da-l, nbóra Eliú éra más jóven di ki el. (Jó 32:6, 7) Umildadi tanbê ta djuda-nu seta konsedju mésmu óras ki nu ta atxa ma kel konsedju é ka pa nos ô óras ki kel algen ki sta da-nu konsedju é más jóven di ki nos. Un ansion na Kanadá, fla: “Dja ki nu ka ta odja nos kabésa sima otus algen ta odja-nu, modi ki nu pode faze prugrésu si otus ka da-nu konsedju?” Nos tudu nu meste dizenvolve kes kualidadi di frutu di spritu i midjora nos manera di prega i inxina notísias sábi. — Lé Salmo 141:5.

13. Modi ki nu debe odja un konsedju ki nu ta dadu?

¹³ Konsedju é un próva di amor di Jeová. Jeová krê kel ki é midjór pa nos. (Pro. 4:20-22) Óras ki el ta uza Bíblia, un publikason ki ten bazi na Bíblia ô un irmon ku más spiriénsa pa da-nu konsedju, el sta mostra se amor pa nos. Hebreus 12:9, 10 ta fla: ‘El ta faze-l pa nos ben’.

14. Na kuzê ki nu debe konsentra óras ki nu ta dadu un konsedju?

¹⁴ Konsentra na konsedju envês di na manera ki bu dadu konsedju. Alvês nu pode xinti ma kel manera ki nu dadu un konsedju ka sta dretu. É klaru ki kel algen ki sta ba da konsedju debe sforsa pa faze-l di un manera ki é más fásil pa algen seta-l. * (Gál. 6:1) Má, si é nos ki sta  dadu konsedju, nu debe konsentra na kel konsedju, sikrê nu ta atxa ma kel algen ki da-nu konsedju debe fazeba el di un otu manera. Nu pode pergunta: ‘Sikrê N ka gosta di kel manera ki kel algen da-m konsedju, ten algun verdadi na kel konsedju ki el da-m? N pode prende ku kel konsedju ki el da-m envês di konsentra na fadjas di kel algen?’ É bon nu djobe algun manera di aplika kalker konsedju ki nu ta dadu. — Pro. 15:31.

15. Pamodi ki nu debe pidi konsedju?

¹⁵ Bíblia ta insentiva-nu pa nu pidi konsedju. Provérbios 13:10, ta fla: ‘É kes ki ta djobe konsedju ki ten sabedoria.’ Kel-li é verdadi! Kes algen ki ta pidi konsedju txeu bês ta faze prugrésu más faxi di ki kes algen ki ka ta pidi konsedju. Pur isu, pidi konsedju sénpri ki bu meste.

16. Na ki situasons nu pode pidi konsedju?

¹⁶ Na ki situasons nu pode pidi konsedju na nos irmons? Odja alguns izénplu: (1) Un irman ta pidi un publikadora ku más spiriénsa pa bai ku el faze un studu i dipôs el ta pidi-l konsedju sobri modi ki el pode midjora se manera di inxina. (2) Un irman soltera krê kunpra un ropa, nton el ta pergunta un irman ku más spiriénsa kuzê ki el ta atxa di kel ropa. (3) Un irmon resebe un diziginason pa el faze se primeru diskursu pa públiku. El ta pidi un irmon ku más spiriénsa pa obi se diskursu i pa da-l alguns konsedju sobri modi ki el pode midjora. Ti mésmu un irmon ki dja ten txeu anu ta faze diskursu pode pidi konsedju na kes irmon ki ten más spiriénsa i aplika kes konsedju.

17. Modi ki konsedju pode djuda-nu?

¹⁷ Na kes simana ô mês ki sta pa ben, nos tudu nu ta ben dadu konsedju di manera dirétu ô indirétu. Óras ki kel-li kontise, lenbra di kes kuza ki dja nu pâpia di el. Kontinua umildi i konsentra na konsedju envês di na manera ki bu dadu konsedju. Aplika kel konsedju ki bu dadu. Lenbra ma ninhun di nos ka nase ku sabedoria, má óras ki nu ta ‘obi konsedju i seta disiplina,’ Bíblia ta promete ma nu ta ‘bira sábiu’. — Pro. 19:20.