1-2. (a) Óras ki nu ta pensa na vida i pregason di Jizus, kuzê ki nu pode xinti? (b) Kuzê ki nu ta ben odja na kel studu li?

 ÓRAS ki un algen ki nu ta ama móre, nu ta xinti txeu sodadi di el! Na komésu, nu pode xinti txeu dór óras ki nu ta pensa na kes dia antis di el móre, prinsipalmenti si el sufri txeu antis di el móre. Má dipôs di un ténpu, nu pode kumesa ta xinti kontenti otu bês, óras ki nu pensa na algun kuza ki el inxina-nu ô algun kuza ki el faze ô ki el fla ki da-nu koraji ô ki pô-nu ta ri.

² Di mésmu manera, óras ki nu ta lé sobri modi ki Jizus sufri i el móre, nu ta fika tristi. Na kes simana antis i dipôs di Komemorason, nu ta tra ténpu prinsipalmenti pa midita na kel grandi valor ki sakrifisiu di Jizus ten. (1 Cor. 11:24, 25) Má, nu ta fika kontenti óras ki nu ta pensa na tudu kes kuza ki Jizus fla i ki el faze timenti el staba na téra. Tanbê, pensa na kuzê ki el sta ta faze gósi i na kuzê ki el ta ben faze pa nos na futuru ta da-nu koraji. Sima nu ta ben odja na kel studu li, midita na kes kuza li i na amor di Jizus pa nos pode pô-nu ta mostra ma nu ta da valor pa sakrifisiu di resgati.

3. Pamodi ki nu debe mostra gratidon pa resgati?

³ Óras ki nu ta pensa na vida i na mórti di Jizus, nu ta xinti gratidon. Kantu Jizus staba na téra, el inxina algen sobri kes benson ki Reinu di Deus ta ben traze. Kes verdadi  sobri Reinu ten txeu valor pa nos. Nu ten txeu gratidon pa resgati pamodi el ta dexa-nu ten un amizadi fórti ku Jeová i ku Jizus. Kes ki ta mostra ma es ten fé na Jizus, tanbê ten speransa di vive pa tudu ténpu i di odja kes algen ki es ta ama ki dja móre ta resusita. (João 5:28, 29; Rom. 6:23) Nu ka faze nada pa nu merese kes benson li, nen nu ka pode paga Deus i Jizus pa kuzê ki es faze pa nos. (Rom. 5:8, 20, 21) Má nu pode mostra-s ma nu ta da txeu valor pa kuzê ki es faze pa nos. Di ki manera?

4. Modi ki Maria Madalena mostra gratidon pa kuzê ki Jizus faze pa el? (Odja dizenhu.)

⁴ Odja izénplu di un mudjer di Judea ki txomaba Maria Madalena. El sufri txeu pamodi 7 dimóni staba ta tormenta-l. Talvês el xinti ma ningen ka pode djudaba el. Nton, imajina modi ki el xinti gratidon kantu Jizus tra-l kes dimóni. Se gratidon pô-l ta bira disiplu di Jizus i ta uza se ténpu, se forsa i kuzas ki el tinha pa djudaba Jizus na pregason. (Luc. 8:1-3) Nbóra Maria tinha txeu gratidon pa kuzê ki Jizus faze pa el, talvês el ka sabia ma Jizus pode ben faze mutu más pa el na futuru. Jizus ta ben daba se vida pa djuda tudu algen, ‘pa tudu kenha ki mostra fé na el’ pode ben ten vida pa tudu ténpu. (João 3:16) Má simé, Maria mostra se gratidon pa Jizus kantu el kontinua lial. Timenti Jizus staba ta sufri na staka, Maria fika pértu di el pamodi el ta preokupaba ku Jizus i el krê konsolaba kes otu algen ki staba la. (João 19:25) Dipôs ki Jizus móre, Maria i más dôs mudjer leba alguns kuza ki es staba ta meste pa pripara korpu di Jizus pa ntéru. (Mar. 16:1, 2) Jeová da Maria un grandi rekonpénsa pamodi el éra lial pa Jizus. El tevi alegria di odja i pâpia ku Jizus dipôs ki el resusitadu. I kel-li é un priviléjiu ki poku disiplu tevi. — João 20:11-18.

5. Modi ki nu pode mostra gratidon pa tudu kel ki Jeová i Jizus dja faze pa nos?

 ⁵ Nos tanbê nu pode mostra gratidon pa tudu kel ki Jeová i Jizus dja faze pa nos, óras ki nu ta uza nos ténpu, nos forsa i dinheru ki nu ten pa apoia trabadju di Reinu. Pur izénplu, nu pode djuda faze i kuida di kes lugar ki nu ta uza pa adora Jeová.

6. Pamodi ki nu pode fla ma resgati é un prezenti pa kada un di nos?

⁶ Óras ki nu ta pensa na modi ki Jeová ku Jizus ta ama-nu, kel-li ta pô-nu ta ama otus tanbê. (1 João 4:10, 19) I ti nu ta ama-s más txeu óras ki nu da kónta ma Jizus móre pa kada un di nos. Apóstlu Polu da kónta di kel-li i el mostra ma el ta daba el valor kantu el skrebe pa kes irmon na Galásia: ‘Fidju di Deus ama-m i ntrega se kabésa pa mi.’ (Gál. 2:20) Ku bazi na resgati, Jeová atrai-u pa el, asi pa bu pode bira se amigu. (João 6:44) Sabe ma Jeová odja algun kuza di bon na bo i ma el paga kel présu más altu pa bu pode bira se amigu, ka ta mexe ku bu korason? Kel-li ka ta pô-u ta ama Jeová i Jizus más txeu? É bon nu pergunta nos kabésa: ‘Kuzê ki kel amor li ta pô-m ta faze?’

7. Sima sta na fotu, modi ki nu pode mostra nos amor pa Jeová i pa Jizus? (2 Coríntios 5:14, 15; 6:1, 2)

⁷ Nos amor pa Deus i pa Jizus ta pô-nu ta mostra amor pa otus algen. (Lé 2 Coríntios 5:14, 15; 6:1, 2.) Un manera ki nu ta mostra nos amor é óras ki nu ta partisipa na pregason ku zelu. Nu ta pâpia ku tudu algen ki nu ta atxa. Nu ka ta ivita pâpia ku un algen pamodi el é di un rasa ô tribu diferenti. Tanbê nu ta pâpia ku tudu algen, ka ta nporta si el é riku ô póbri,  si el ten skóla ô nau. Di kel manera li, nu ta faze vontadi di Jeová ki é ‘pa tudu tipu di algen salva i pa es ten un konhisimentu izatu di verdadi.’ — 1 Tim. 2:4.

8. Modi ki nu pode mostra amor pa nos irmons ku irmans?

⁸ Tanbê nu ta prova ma nu ten amor pa Deus i pa Jizus, óras ki nu ta mostra amor pa nos irmons ku irmans. (1 João 4:21) Nu ta preokupa txeu ku kuzê ki es meste i nu ta djuda-s óras ki es ta pasa pa prublémas. Nu ta konsola-s óras ki un algen ki es ta ama móre, nu ta vizita-s óras ki es sta duenti i óras ki es sta dizanimadu nu ta faze nos midjór pa da-s koraji. (2 Cor. 1:3-7; 1 Tes. 5:11, 14) Nu ta kontinua ta ora pa es pamodi nu sabe ma ‘súplika di un ómi justu ten txeu forsa.’ — Tia. 5:16.

9. Kal ki é otu manera di mostra amor pa nos irmons ku irmans?

⁹ Tanbê nu ta mostra amor pa nos irmons ku irmans óras ki nu ta sforsa txeu pa mante pas ku es. Nu ta tenta imita manera ki Jeová ta púrdua otus. Si Jeová dexa se Fidju móre pa nos pekadus, nu ka debe sta prontu pa púrdua nos irmons ku irmans óras ki es peka kóntra nos? Nu ka krê ser sima kel skravu mau di un ilustrason ki Jizus konta. Mésmu dipôs ki se patron púrdua se dívida ki el ka ta pode pagaba, kel skravu ka konsigi púrdua un dívida mutu más pikinoti di un otu skravu sima el. (Mat. 18:23-35) Si bu tene algun prubléma ku algun algen na kongregason, bu pode faze pas ku el antis di sisti Komemorason? (Mat. 5:23, 24) Si bu faze kel-li, bu ta prova ma bu ta ama Jeová ku Jizus.

10-11. Modi ki ansions pode mostra ma es ta ama Jeová ku Jizus? (1 Pedro 5:1, 2)

¹⁰ Modi ki ansions pode mostra ma es ta ama Jeová ku Jizus? Un manera inportanti é óras ki es ta kuida di kuzê ki kes ovelha di Jizus meste. (Lé 1 Pedro 5:1, 2.) Jizus dexa kel-li klaru pa apóstlu Pedru. Dipôs ki Pedru nega Jizus três bês, talvês Pedru tinha gana di prova ma el ta amaba Jizus. Dipôs ki Jizus resusita, el pergunta Pedru: ‘Simon, fidju di Juan, bu ta ama-m?’ Nu pode ten sertéza ma Pedru ta fazeba kalker kuza pa mostraba se amor pa Jizus. Jizus fla Pedru: ‘Pastora nhas ovelhinha.’ (João 21:15-17) I pa réstu di se vida, Pedru kuida di kes ovelha di Sinhor ku amor, asi el prova ma el ta amaba Jizus.

¹¹ Ansions, duránti kes simana antis i dipôs di Komemorason, modi ki nhos pode mostra ma kes palavra ki Jizus fla Pedru é inportanti pa nhos? Nhos pode mostra ma nhos ta ama Jeová ku Jizus óras ki sénpri nhos ta tra ténpu pa nkoraja irmons ku irmans. Otu manera di faze kel-li é óras ki nhos faze más pa djuda kes ki sta inativu volta pa Jeová. (Eze. 34:11, 12) Tanbê nhos pode tenta nkoraja kes studanti di Bíblia i otus algen ki sisti Komemorason. Nhos krê pa es xinti ma es é ben-vindu pamodi nhos ta spéra ma es tanbê es ta bira disiplus di Jizus.

12. Pamodi ki pensa na kes palavra ki Jizus fla na kel noti antis di el móre ta da-nu koraji? (João 16:32, 33)

¹² Na kel noti antis di Jizus móre, el fla se disiplus: ‘Na mundu nhos ta ten  prublémas, má nhos ten koraji! N vense mundu.’ (Lé João 16:32, 33.) Kuzê ki djuda Jizus kontinua lial ti ki el móre i mostra koraji kantu se inimigus amiasa-l? El kunfia na Jeová. Jizus sabia ma se disiplus pode ben pasaba pa situasons sima di sel. Pur isu, el pidi Jeová pa kuida di es. (João 17:11) Pamodi ki kel-li ta da-nu koraji? Pamodi Jeová é más fórti di ki kalker un di nos inimigus. (1 João 4:4) Jeová ta odja tudu kuza. Nu pode ten sertéza ma si nu kunfia na Jeová, el pode djuda-nu vense nos medu i mostra koraji.

13. Modi ki Juzé di Arimatea mostra koraji?

¹³ Odja izénplu di Juzé di Arimatea. Judeus ta ruspetaba el txeu. El ta fazeba párti di kel Tribunal más altu di judeus. Má duránti trabadju di pregason di Jizus li na téra, Juzé ka tinha koraji. Juan fla ma el éra ‘disiplu di Jizus, má sukundidu, pamodi el tinha medu di judeus’. (João 19:38) Nbóra Juzé tinha interesi na mensaji di Reinu, el sukundi di otus algen ma el tinha fé na Jizus. Talvês el tinha medu ma algen ka ta ruspetaba el más si es fika ta sabeba ma el éra disiplu di Jizus. Má, Bíblia ta fla ma dipôs ki Jizus móre, Juzé ‘intxi di koraji, el bai ti Pilátus i el pidi korpu di Jizus.’ (Mar. 15:42, 43) Juzé ka tenta sukundi más ma el éra disiplu di Jizus.

14. Kuzê ki bu debe faze si bu sta ta luta kóntra medu di ómi?

¹⁴ Dja bu kustuma xinti medu di ómi, sima Juzé xinti? Na skóla ô na trabadju, alvês bu ta xinti vergónha di fla ma bo é Tistimunha di Jeová? Inda bu ka bira un publikador ô inda bu ka batiza pamodi bu sta preokupadu ku kuzê ki otus algen pode atxa di bo? Ka bu dexa kes sentimentu li inpidi-u di faze kel ki bu sabe ma é dretu. Ora pa Jeová di korason. Pidi-l pa el da-u koraji pa bu faze se vontadi. Óras ki bu ta odja modi ki Jeová ta responde bus orason, bu ta bira más fórti i ku más koraji. — Isa. 41:10, 13.

15. Dipôs ki Jizus parse pa se disiplus, kuzê ki alegria pô-s ta faze? (Lucas 24:52, 53)

¹⁵ Disiplus di Jizus fika tristi kantu ki el móre. Imajina modi ki es xinti. Es ka perde sô ses amigu ki es kreba txeu, má tanbê es xinti sima ki es perde ses speransa. (Luc. 24:17-21) Má kantu Jizus parse pa es, el pruveta pa djuda-s ntende modi ki el kunpri profesias di Bíblia.  Tanbê el da-s un trabadju inportanti pa es faze. (Luc. 24:26, 27, 45-48) Dipôs di 40 dia, kantu Jizus subi pa séu, disiplus ka staba tristi más, má es staba kontenti. Es staba kontenti pamodi es sabia ma Jizus staba bibu i ma el ta djudaba es faze kel trabadju ki el da-s pa es faze. Ses alegria pô-s ta lova Jeová ku zelu. — Lé Lucas 24:52, 53; Atos 5:42.

16. Modi ki nu pode imita disiplus di Jizus?

¹⁶ Modi ki nu pode imita disiplus di Jizus? Nu pode xinti alegria na adora Jeová ka sô na kes simana antis i dipôs di Komemorason, má na anu interu. Kel-li ta iziji pa nu poi Reinu di Deus na primeru lugar na nos vida. Pur izénplu, txeu irmon muda ses óra di trabadju pa es pode partisipa na pregason, sisti runion i faze adorason na família sénpri. Alguns irmon disidi ka ten alguns kuza material ki alguns algen ta atxa ma es meste, asi pa es pode djuda más txeu na kongregason ô pa es bai djuda na undi ki ten más nisisidadi. Nbóra nu meste aguenta firmi pa nu kontinua ta sirbi Jeová, el ta promete ma el ta da-nu txeu benson si nu poi Reinu na primeru lugar na nos vida. — Pro. 10:22; Mat. 6:32, 33.

17. Kuzê ki bu sta disididu na faze na kes simana antis i dipôs di Komemorason? (Odja fotu.)

¹⁷ Nu tene gana di faze Komemorason na térsa-fera, dia 4 di abril. Má nu ka meste spéra ti ki txiga kel dia pa nu pensa na vida i na mórti di Jizus i na amor ki el ku Jeová mostra pa nos. Pruveta tudu oportunidadi na kes simana antis i dipôs di Komemorason pa pensa na kes kuza li. Pur izénplu, tra ténpu pa lé i pensa na kes kuza ki kontise ki sta na kel tabéla ‘Últimu simana di Jizus na Téra’ na Folhetu di studu pa runion di abril di 2019, na pájina 4. Óras ki bu ta faze kel-li, djobe kes párti di Bíblia ki ta omenta bu gratidon, amor, koraji i alegria. Dipôs, tenta djobe di ki maneras ki bu pode mostra ma bu ta da valor di korason pa kel ki Jeová i Jizus faze pa bo. Bu pode ten sertéza ma Jizus ta da valor pa tudu kel ki bu ta faze pa lenbra di el na kes simana antis i dipôs di Komemorason. — Apo. 2:19.