1-2. Modi ki kes palavra di Jeová ki sta na Isaías 65:16, 17, ta djuda-nu aguenta firmi?

“KA BU DIZISTI!” Kel-li éra téma di kongrésu di 2017. Na kel prugrama, nu prende modi ki nu pode aguenta firmi sikrê ku prublémas. Dja pasa kuatu anu i ti inda nu sta li ta kontinua ta aguenta firmi na kel mundu li.

² Ki prublémas ki bu tevi ki lida ku el ka dura li? Mórti di un família ô di un amigu ki bu krê txeu? Un prubléma di saúdi ki poi bu vida na prigu? Prublémas ki ta kontise pamodi bedjisa? Dizastri na naturéza, violénsia ô pirsigison? Bu sta ta sufri pamodi algun duénsa, sima COVID-19? Nu tene gana pa tudu kes prubléma li dexa di izisti i pa txiga kel dia ki nu ka ta ben lenbra di ninhun di es! — Lé Isaías 65:16, 17.

3. Kuzê ki nu debe faze gósi i pamodi?

³ Vida na kel mundu li é difísil. I na futuru, nu ta ben pasa pa prublémas más difísil inda. (Mat. 24:21) Kel-li ta mostra klaru ma nu meste kontinua ta bira nos kapasidadi di aguenta firmi más fórti. Pamodi? Jizus fla: ‘Pamodi nhos kapasidadi di aguenta firmi, nhos ta salva nhos vida.’ (Lucas 21:19) Pensa na modi ki otus sta ta aguenta firmi ku prublémas sima di nos, ta djuda-nu aguenta firmi tanbê.

4. Pamodi ki nu pode fla ma Jeová é kel midjór izénplu na aguenta firmi?

⁴ Kenha ki é kel midjór izénplu na aguenta firmi? Jeová nos Deus. Bu ta fika spantadu di obi kel-li? Para i bu pensa un bokadinhu. Kel mundu li sta na puder di Diabu i pur isu el sta xeiu di prubléma. Jeová ten puder di kaba ku kes prubléma li kalker óra. Má, el sta ta spéra pa txiga kel dia sértu pa faze kel-li. (Rom. 9:22) Timenti kel dia ka txiga,  kuzê ki el sta ta faze? El sta kontinua ta aguenta firmi. Nu ben odja 9 di kes prubléma ki Jeová sta ta aguenta.

5. Désdi jardin di Éden, modi ki pesoas sta ta suja nómi di Deus i modi ki kel-li ta pô-u ta xinti?

⁵ Kuzas ki ta suja se nómi. Jeová ta ama se nómi i el krê pa tudu algen ruspeta se nómi. (Isa. 42:8) Má dja ten uns 6 mil anu ki pesoas sta ta suja kel bon nómi di Deus. (Sal. 74:10, 18, 23) Kel-li kumesa na jardin di Éden kantu ki Diabu (ki siginifika “Kaluniador”) faze un akuzason falsu kóntra Jeová. El fla ma Jeová ka krê daba Adon ku Eva un kuza ki es mesteba pa es sérba filís. (Gén. 3:1-5) Désdi kel ténpu sta ta fazedu akuzason falsu kóntra Jeová. Es ta fla ma el ka krê da-nu kuzê ki nu meste pa nu ser filís. Jizus fika preokupadu kantu el odja pesoas ta suja kel bon nómi di se Pai di kel manera li. Pur isu, el inxina se disiplus pa ora: ‘Nos Pai ki sta na Séu, pa bu nómi ser santifikadu.’ — Mat. 6:9.

6. Pamodi ki Jeová sta ta dexa txeu ténpu pasa antis di el rezolve kel asuntu di se direitu di governa?

⁶ Kes algen ki é kóntra se direitu di governa. Jeová ten tudu direitu di governa Séu ku Téra, i é sô el ki sabe kel midjór manera di governa. (Apo. 4:11) Má, Diabu tenta ngana anjus ku algen pa pô-s ta pensa ma Deus ka ten kel direitu li. Kel asuntu sobri direitu ki Jeová ten di governa, ka pode rezolvedu di un dia pa kel otu. Má dja ki Jeová é un Deus ki ten sabedoria, el sta ta dexa ómis governa ti gósi. Asi pa es pode odja ma es ka ta konsigi governa ses kabésa dretu si es ka obi ku ses Kriador. (Jer. 10:23) Pamodi se paxénxa, kel asuntu li ta ben fika rezolvidu pa tudu ténpu. Ka ta fika ninhun dúvida ma é Deus ki ten direitu di governa i ma é el ki sabe kel midjór manera di faze kel-li. Tanbê, tudu algen ta ben sabe ma é sô Reinu di Deus ki ta traze pas i suguransa di verdadi pa Téra interu.

7. Ken ki rabela kóntra Jeová, i kuzê ki el ta ben faze ku es?

⁷ Alguns di se fidjus ki rabela. Jeová kria anjus i algen perfetu. Má dipôs, un anju rabela i el bira Satanás (ki siginifika “Algen ki é kóntra otu”). Nton, Satanás poi Adon ku Eva, ki éra algen perfetu, ta bira kóntra Deus. Otus anju i otus algen tanbê djunta ku es na kel rebelion. (Jud. 6) Dipôs, kes algen di nason di Israel, ki éra kel povu ki Deus skodje, bira kóntra Jeová i es kumesa ta adora kes deus falsu. (Isa. 63:8, 10) Jeová tinha razon di xintiba traídu. Má simé, Jeová ti inda sta ta aguenta tudu kel situason li, ti kel dia ki el ta ben distrui tudu kes rebéldi. Óras ki kel-li kontise, Jeová i tudu kes algen lial ki sta aguenta maldadi di kel mundu li djuntu ku el, ta ben fika kontenti!

8-9. Kal ki é alguns di kes mintira ki Diabu konta sobri Jeová, i modi ki nu pode lida ku es?

⁸ Kes mintira ki Diabu ta konta. Satanás fla ma Jó i tudu kes otu sérvu lial di Jeová ta sirbi-l sô pa interesi. (Jó 1:8-11; 2:3-5) Ti gósi, el ta fla ma algen ta sirbi Deus sô pa interesi. (Apo. 12:10) Nu pode faze nos párti pa prova ma el é mintirozu. Nu ta faze kel-li, óras ki nu ta aguenta firmi na kes prubléma ki nu ta pasa pa el, óras ki nu ta mante lial pa Jeová i óras ki nu ta mostra tudu amor ki nu ten pa El. Si nu aguenta firmi sima Jó, nos tanbê nu ta resebe bensons di Jeová. — Tia. 5:11.

⁹ Satanás ta uza kes xéfi di relijion falsu pa fla ma Jeová é mau i ma é el ki ta pô-nu ta sufri. Óras ki un mininu ta móre,  alguns algen ta fla ma é Deus ki toma-l pamodi el sta mesteba un anjinhu na Séu. Kel-li é un grandi falta di ruspetu pa Jeová! Anos nu konxe-l dretu. Óras ki nu tene un prubléma gravi di saúdi ô óras ki un algen ki nu ta ama móre, nunka nu ka ta poi kulpa na nos Deus. Envês di kel-li, nu ten fé ma un dia el ta ben kaba ku tudu duénsa i mórti. Nu pode fla tudu kes algen ki krê obi-nu ma Jeová é un Deus ki ten txeu amor pa nos. Asi, nu ta djuda Jeová da un bon respósta pa kel ki ta dizafia-l. — Pro. 27:11.

10. Kuzê ki Salmo 22:23, 24, ta inxina-nu sobri Jeová?

¹⁰ Sufrimentu di se sérvus ki el krê txeu. Jeová ta xinti konpaxon pa se sérvus. El ta fika txeu tristi di odja-nu ta sufri, talvês pamodi pirsigison, duénsas ô pamodi nos inperfeson. (Lé Salmo 22:23, 24.) Jeová ta ntende nos dór. El krê kaba ku nos sufrimentu i el ta ben faze kel-li. (Konpara ku Êxodo 3:7, 8; Isaías 63:9.) Ka ta dura, ‘el ta linpa di [nos] odju tudu lágua, i ka ta ten más mórti, nen ka ta ten más tristéza, nen txoru, nen dór.’ — Apo. 21:4.

11. Modi ki Jeová ta xinti ku mórti di se sérvus lial?

¹¹ Mórti di se amigus. Modi ki Jeová ta xinti ku mórti di ómis ku mudjeris lial? El tene gana di torna odja-s! (Jó 14:15) Imajina modi ki Jeová tene gana di odja se amigu Abraon otu bês. (Tia. 2:23) Ô imajina modi ki Jeová tene gana di odja Muizés otu bês, ki es ta kustumaba pâpia ‘róstu ku róstu’. (Êxo. 33:11) I imajina modi ki el tene vontadi di obi Davidi i kes otu skritor di Salmo ta kanta kes kántiku di lovor sábi! (Sal. 104:33) Nbóra kes amigu li di Jeová sta ta durmi na mórti, nunka el ka ta skese di es. (Isa. 49:15) Jeová ta lenbra dretu modi ki éra ses manera di ser.  Bíblia ta fla ma ‘pa el, tudu es sta bibu.’ (Luc. 20:38, nóta di rodapé.) Un dia Jeová ta ben da-s vida otu bês, el ta ben obi ses orason di korason i el ta ben seta ses adorason. Si algen ki bu ta ama móre, lenbra di tudu kes kuza li pode konsola bu korason.

12. Na es ténpu di fin, kuzê ki sta ta dexa Jeová txeu tristi?

¹² Kes algen mau ki sta ta maltrata otus. Kantu kumesa rebelion na Éden, Jeová sabia ma antis di tudu kuza midjora, situason ta ben pioraba. Jeová ta ôdia kel mundu li ki sta xeiu di maldadi, injustisa i violénsia. Sénpri el preokupa ku kes más fraku i ki ka ta konsigi difende ses kabésa, sima órfus i viúvas. (Zac. 7:9, 10) Un kuza ki ta dexa Jeová txeu tristi oji é odja se sérvus fiel ta sufri i ta podu na kadia. Nu pode ten sertéza ma Jeová ta ama tudu kes ki sima el ta kontinua ta aguenta firmi.

13. Na ki situason nojéntu ki mundu sta i kuzê ki Jeová ta ben faze?

¹³ Konportamentu seksual mariadu ki sta ta bira kada bês más txeu. Satanás sabe ma pesoas fazedu sima imaji di Deus. Pur isu, el gosta di rabaxa algen. Kantu Jeová odja ma ‘maldadi di ómis éra txeu’ na ténpu di Nué, el ‘rapende ki el faze ómis na Téra i el xinti tristi na se korason.’ (Gén. 6:5, 6, nóta di rodapé, 11) Kuzas sta diferenti oji? Klaru ki nau! Satanás debe sta kontenti di odja ma situason na mundu sta nojéntu. Tudu tipu di konportamentu seksual mariadu bira normal, sima séksu entri ómi ku ómi i mudjer ku mudjer! (Efé. 4:18, 19) El ta fika más sábi inda, óras ki el ta odja un sérvu di Jeová ta faze un pekadu gravi. Má paxénxa di Jeová ten limiti. Ka ta dura, Jeová ta ben mostra ódiu ki el ten pa konportamentu seksual mariadu, óras ki el distrui tudu kes algen ki ta konporta di kel manera li i ki ka krê muda.

14. Kuzê ki pesoas sta ta faze ku Téra i ku animal?

¹⁴ Kes algen ki sta ta distrui se kriason. Deus da-nu responsabilidadi di kuida di tudu kuza ki el kria. Má ‘ómi sta manda na ómi pa se disgrasa’ i pa disgrasa di Téra ku animal. (Ecl. 8:9; Gén. 1:28) Pamodi konportamentu di algen, alguns sientista ta fla ma un milhon di tipus * di animal sta kóre risku di dizaparse di li uns anu. Ta da pa ntende pamodi ki pesoas sta txeu preokupadu ku anbienti! Fórti nu ta fika kontenti di sabe ma Jeová ta ben ‘distrui kes ki sta distrui Téra’ i el ta ben pô-l bira un paraízu bunitu. — Apo. 11:18; Isa. 35:1.

15-16. Kuzê ki ta pô-nu ta krê aguenta firmi sima Jeová? Da un izénplu.

¹⁵ Pensa na tudu kuza ki nos Pai na Séu dja aguenta na tudu kes milhar di anu li. (Odja kuadru “ Kuzê ki Jeová sta ta aguenta”.) Si Jeová kreba, dja el kababa ku kel mundu li. Má se paxénxa sta ta ser un benson pa nos! Nu odja un izénplu. Imajina ma un kazal sta pa ten un fidju i ses dotor ta da-s kel notísia li: ‘Nhos bebé ten prublémas gravi di saúdi. Se vida ka sta ben ser fásil i el ka ta dura txeu.’ Kuida di kel bebé ka ta ben ser fásil, má simé se pai ku se mai ta resebe-l ku tudu amor. I é kel amor li ki ta pô-s ta aguenta kalker difikuldadi pa es pode da ses bebé kel midjór vida ki es ta pode.

 ¹⁶ Sima kel bebé, kes disendenti di Adon ku Eva nase inperfetu. Má simé, Jeová ta kuida di es ku txeu amor. (1 João 4:19) Má, ten un diferénsa entri kel pai ku kel mai di kel izénplu i ku Jeová. Jeová pode kaba ku sufrimentu di se fidjus i pamodi amor ki el ten pa es, dja el ten un ténpu markadu pa ben faze kel-li. (Mat. 24:36) Kel amor di Jeová li ta motiva-nu txeu pa nu aguenta firmi djuntu ku el, ka ta nporta kantu ténpu.

17. Modi ki izénplu di Jizus ki sta na Hebreus 12:2, 3, ta nkoraja-nu pa nu kontinua ta aguenta firmi?

¹⁷ Jeová é kel izénplu perfetu na aguenta firmi i Jizus imita-l rei di dretu. Amor ki Jizus ten pa nos, pô-l ta aguenta kuzas mariadu ki es ta flaba kóntra el, vergónha i un staka di tortura kantu el staba na Téra. (Lé Hebreus 12:2, 3.) É klaru ki izénplu di Jeová na aguenta firmi, da Jizus forsa pa aguenta firmi tanbê. I ses izénplu pode da-nu forsa tanbê.

18. Sima sta na 2 Pedro 3:9, modi ki paxénxa di Jeová ta djuda-nu?

¹⁸ Lé 2 Pedro 3:9. Jeová sabe kel óra sértu pa kaba ku kel mundu mau li. Pamodi paxénxa di nos Pai na Séu, txeu algen tevi xansi di nase, di prende sobri Jeová i di da ses vida pa El duránti tudu kes anu li. Oji, kes algen li sta kontenti pamodi Deus kontinua ta aguenta firmi ti gósi! Óras ki Jeová ben abênsua kes milhon di algen ki aguenta firmi ti fin, ta fika klaru ma el toma kel midjór disizon!

19. Nu debe sta disididu na faze kuzê i ki rekonpénsa nu ta ben resebe?

¹⁹ Izénplu di Jeová ta inxina-nu aguenta firmi ku alegria. Nbóra Satanás dja poi txeu dór i sufrimentu ta kontise, Jeová kontinua ta ser ‘kel Deus filís.’ (1 Tim. 1:11) Ti inda nu sta ta spéra ku paxénxa pa kel dia ki Jeová ta ben santifika se nómi, difende direitu ki el ten di governa i kaba ku tudu maldadi i ku tudu prubléma ki nu ta pasa pa el oji. Má timenti kel dia li ka txiga, nu ta kontinua ku nos alegria. Nu sta disididu na aguenta firmi i nunka ka nu skese ma nos Pai na Séu tanbê sta ta aguenta firmi. Si nu faze kel-li, kada un di nos ta xinti ma kel ki sta na Tiago 1:12 é verdadi. La ta fla: ‘Filís é kel ki kontinua ta aguenta firmi na provason, pamodi óras ki el aprovadu el ta resebe kel koroa di vida, ki Jeová promete pa kes ki kontinua ta ama-l.’