1-2. Sima sta na Salmo 40:5, ki prezentis Jeová da-nu i pamodi ki nu sta ben pâpia di es na kel studu li?

JEOVÁ é un Deus ki gosta di da. Pensa na alguns prezenti ki el da-nu, sima Téra, ki é un lugar bunitu ki ka ten konparason. Tanbê, pensa na nos sérbru, ki fazedu di un manera spetakular; i na se Palavra ki é Bíblia. Através di kes três prezenti li, Jeová da-nu un lugar di vive, kapasidadi di pensa i di pâpia, i respóstas pa perguntas más inportanti di vida. — Lé Salmo 40:5.

² Na kel studu li, nu sta ben pâpia di kes três prezenti. Óras ki nu ta pensa txeu na es, nu ta da-s más valor, i nu ta krê faze kuzas ki ta dexa nos Kriador Jeová, kontenti. (Apo. 4:11) Tanbê, nu ta sta más priparadu pa djuda kes ki ta kridita na ensinu falsu di ivoluson.

3. Pamodi ki sima Téra ka ten?

³ Nu ta odja sabedoria di Deus na manera ki el faze Téra, ki é nos kaza. (Rom. 1:20; Heb. 3:4) Ten otus planéta ki ta jira na vólta di sól, má sima Téra ka ten. É sô el ki ten tudu kes kuza ki nu meste pa sustenta nos vida.

4. Pamodi ki nu pode fla ma Téra é mutu más midjór di ki kalker barku ki ómi faze?

⁴ Nu pode fla ma Téra é sima un barku ki sta na meiu di mar. Má, ten un diferénsa grandi entri un barku ki ómi faze, ki sta xeiu di algen, ku nos Téra. Pur izénplu, imajina si pesoas na un barku tinha ki ranjaba ses própi  ar, kumida i agu, má es ka ta podia traba fóra di barku kes lixu ki es ta fazeba. Kantu ténpu bu ta atxa ma es ta fikaba bibu? É klaru ki es ta moreba na poku ténpu. Má, Téra pode sustenta bilhons di algen i animal. El ta da ar, kumida i agu ki nu meste, i kes kuza li ta txiga pa tudu algen i animal. Kes lixu ki ta kria na Téra ka ta sai fóra di el, má simé Téra ta kontinua linpu i un lugar ki ta da pa vive. Má modi ki kel-li ta kontise? Jeová faze Téra di un manera ki el ta transforma lixu na un otu kuza ki ta sirbi pa uza otu bês. Nu ben odja sabedoria di Jeová na manera ki el faze dôs kuza: siklu di oksijéniu i siklu di agu.

5. Pamodi ki nunka ka ta falta oksijéniu, i kuzê ki kel-li ta prova?

⁵ Oksijéniu é un gas ki tudu algen ku animal meste pa pode vive. Sientistas ta fla ma na un anu kriaturas ta respira 100 bilhon di tonelada di oksijéniu. Dipôs ki kes kriatura respira oksijéniu, es ta liberta un gas ki txoma dióksidu di karbonu. Má simé, nunka ka ta falta oksijéniu pa kes kriatura na Téra, i nos séu nunka ka ta fika xeiu di dióksidu di karbonu. Pamodi? Pamodi Jeová kria txeu tipu di planta di tudu tamanhu, ki ta toma kel dióksidu di karbonu i es ta da oksijéniu. Tudu kel-li ta prova kel ki sta na Bíblia: ‘É Deus ki ta da tudu algen bida i folgu.’ — Atus 17:24, 25, Bíblia Na Prugrésu Di Traduson Pa Lingua Kabuverdianu, BPK.

6. Pamodi ki nu ka ta fika sen agu i kuzê ki kel-li ta prova? (Tanbê odja kuadru “ Agu é un prezenti di Jeová”.)

⁶ Téra ten agu, pamodi el ta fika na un distánsia sértu di sól. Si el ta fikaba un bokadinhu más pértu di sól, tudu agu ta sekaba, i nos planéta ta sérba un rótxa kenti i sen vida. Tanbê, si Téra ta fikaba un bokadinhu más lonji di sól, tudu agu ta konjelaba i el ta biraba un bóla grandi di jélu. Má, Jeová poi Téra na lugar sértu, pa pode ten agu ki ta sustenta vida. Modi ki kel-li ta kontise? Kalor di sól ta ivapora agu di mar i di Téra ki ta forma núven. Sientistas ta fla ma tudu anu sól ta ivapora agu ki ta txiga pa intxi un tanki ki ten uns 80 km di largura, altura i fundura. Tudu kel agu ki ivapora ta fika uns 10 dia na séu, dipôs el ta kai na fórma di txuba ô névi. Kel agu ki kai ta torna volta pa mar i pa kes otu lugar na Téra ki ten agu, i kel siklu li ta kontinua ta ripiti. Jeová faze kel-li, pa nu pode ten agu sénpri. Kel-li ta prova ma el ten sabedoria i puder. — Jó 36:27, 28; Ecl. 1:7.

7. Kal ki é alguns manera ki nu ta mostra ma nu ta da valor pa kel prezenti ki sta na Salmo 115:16 ?

⁷ Kuzê ki pode djuda-nu da valor pa nos planéta ki é spetakular i pa tudu kes kuza ki el ta da-nu? (Lé Salmo 115:16.) Un manera é óras ki nu ta pensa na tudu kes kuza ki Jeová dja faze. Kel-li ta pô-nu ta agradese Jeová tudu dia pa kes bon kuza ki el ta da-nu. I nu ta mostra ma nu ta da valor pa Téra, óras ki nu ta faze tudu kel ki nu pode pa mante lugar undi ki nu ta mora linpu.

8. Pamodi ki nu pode fla ma nos sérbru fazedu di manera spetakular?

⁸ Nos sérbru fazedu di manera spetakular. Kantu bu staba na bariga di bu mai, bu sérbru ba ta forma di un manera organizadu, i milharis di otus sélula di sérbru ba ta dizenvolve kada minutu!  Kes algen ki ta faze piskiza, ta fla ma sérbru di un algen grandi, ten uns 100 bilhon di sélula ki ta txomadu di neuróniu. Tudu kes sélula ta forma nos sérbru ki ta peza un kilu i meiu. Odja sô alguns di kes kapasidadi spetakular ki nos sérbru ten.

9. Kuzê ki ta mostra-u klaru ma kapasidadi di pâpia é un prezenti di Deus?

⁹ Nos kapasidadi di pâpia é un milagri. Pensa un poku na kuzê ki ta kontise óras ki nu ta pâpia. Na kada palavra ki bu ta fla, bu sérbru ta kontrola movimentu di uns 100 musklu na bu língua, garganta, bexu, kexada i petu. Tudu kes musklu ten ki movimenta na ténpu sértu pa bu pode pâpia di manera ki algen ta ntende. Un studu ki fazedu na anu di 2019, sobri kapasidadi ki nu ten di pâpia línguas, ta mostra ma lógu ki un mininu nase, el ta konsigi ntende i reaji óras ki el ta obi kada palavra. Kel studu ta konfirma kuzê ki txeu algen ki ta faze piskiza ta kridita: ma nu nase ku kapasidadi di ntende i prende língua. Di sertéza, nos kapasidadi di pâpia é un prezenti di Deus. — Êxo. 4:11.

10. Modi ki nu pode mostra ma nu ta da valor pa kapasidadi ki Deus da-nu di pâpia?

¹⁰ Un manera ki nu ta mostra ma nu ta da valor pa nos kapasidadi di pâpia, é óras ki nu ta splika kes algen ki ta kridita na ivoluson pamodi ki nu ta kridita na Deus. (Sal. 9:1; 1 Ped. 3:15) Kes ki ta difende ivoluson krê pa nu kridita ma Téra i tudu vida ki ten na el parse el sô. Nu pode uza Bíblia i alguns párti di kel artigu li, pa nu difende nos Pai ki sta na Séu. Tanbê, nu pode uza-s pa splika kes algen ki krê obi, pamodi ki nu ten sertéza ma Jeová é Kriador di Séu ku Téra. — Sal. 102:25; Isa. 40:25, 26.

11. Kuzê ki ta mostra ma nos sérbru é spetakular?

¹¹ Nos kapasidadi di lenbra é spetakular. Na ténpu antigu, un skritor fla ma nos sérbru ten kapasidadi di lenbra informasons ki ta kebeba na uns 20 milhon di livru. Má oji, pesoas ta kridita ma nos mimória ten kapasidadi di lenbra informasons mutu más txeu inda. É pur isu ki nu ten un kapasidadi ki otus kriatura na Téra ka ten. Má é kal?

12. Di ki manera ki nos kapasidadi di prende modi ki nu debe vive, ta pô-nu ser diferenti di animal?

¹² Di tudu kriaturas na Téra é sô nos ki ten kapasidadi di prende modi ki nu debe vive. Nu ta konsigi lenbra kuzê ki kontiseba ku nos antis i pensa na el. Óras ki nu pensa na kuzas ki nu fazeba antis, kel-la ta djuda-nu sabe kal ki é midjór orientason ki nu debe sigi, i muda nos manera di pensa i di vive. (1 Cor. 6:9-11; Col. 3:9, 10) Na verdadi nu pode trena nos konsénsia pa nu sabe diferénsa entri kuza dretu i kuza mariadu. (Heb. 5:14)  Nu pode prende mostra amor, konpaxon i mizerikórdia. I nu pode prende imita justisa di Jeová.

13. Sima sta na Salmo 77:11, 12, modi ki nu pode uza nos mimória?

¹³ Mimória é un prezenti di Jeová. Un manera ki nu ta mostra ma nu ta da valor pa mimória, é óras ki nu ta tenta lenbra di tudu bês ki Jeová dja djuda-nu i konsola-nu. Kel-li ta da-nu sertéza ma tanbê el ta ben djuda-nu na futuru. (Lé Salmo 77:11, 12; 78:4, 7 ) Otu manera, é óras ki nu ta lenbra di kes kuza sábi ki otus algen faze pa nos i agradese-s pa kes kuza. Kes algen ki ta faze piskiza da kónta ma kes algen ki ta agradese é más filís. Má tanbê, é bon nu imita Jeová ki ta skodje skese di alguns kuza. Pur izénplu, mimória di Jeová é perfetu. Má, si nu rapende el ta skodje purdua-nu i skese di nos éru. (Sal. 25:7; 130:3, 4) I el krê pa nu faze mésmu kuza óras ki otus ta magua-nu. — Mat. 6:14; Luc. 17:3, 4.

14. Modi ki nu pode mostra ma nu ta da valor pa sérbru ki é un prezenti spetakular?

¹⁴ Nu pode mostra ma nu ta da valor pa nos sérbru ki é un prezenti spetakular, óras ki nu ta uza-l pa onra Kel ki da-nu el. Alguns ta skodje uza ses sérbru pa disidi pa es mê kuzê ki é dretu i mariadu. Má dja ki é Jeová ki faze-nu, é mutu más midjór nu sigi se lei di ki sigi di nos. (Rom. 12:1, 2) Óras ki nu ta obi ku Jeová, nu ta vive na pas. (Isa. 48:17, 18) I nu ta prende kuzê ki Jeová krê pa nu faze timenti nu sta bibu. Asi nu ta onra nos Kriador i Pai, i el ta fika kontenti ku nos. — Pro. 27:11.

15. Modi ki Bíblia ta prova ma Jeová ta ama-nu?

¹⁵ Bíblia é un prezenti ki ta prova ma Jeová ta ama-nu. Nos Pai na Séu da-nu Bíblia, pamodi el ta preokupa txeu ku se fidjus li na Téra. Jeová ta uza Bíblia pa responde kes pergunta más inportanti ki  nu ta faze, sima: Di undi ki nu ben? Pamodi ki nu sta li? Kuzê ki ta ben kontise na futuru? Jeová krê pa tudu se fidjus sabe respósta pa kes pergunta li. Nton, duránti un monti ténpu, el poi ómis ta traduzi Bíblia na monti língua. Oji, nu ta atxa Bíblia interu ô párti di el na más di 3 mil língua! Bíblia é livru más traduzidu i distribuidu na mundu. Ka ta nporta undi ki pesoas ta vive ô ki língua ki es ta pâpia, kuazi tudu algen ten xansi di prende mensaji di Bíblia na ses própi língua. — Odja kuadru “ Bíblia na alguns língua di Áfrika”.

16. Ku bazi na Mateus 28:19, 20, i ku informason ki sta na parágrafu, modi ki nu pode mostra ma nu ta da valor pa Bíblia?

¹⁶ Nu pode mostra ma nu ta da valor pa Bíblia, óras ki nu ta le-l tudu dia, pensa txeu na kuzê ki el ta inxina i sforsa pa nu faze sima nu prende. Tanbê, nu ta mostra nos gratidon pa Deus, óras ki nu ta sforsa pa nu pâpia ku tudu algen ki nu konsigi. — Sal. 1:1-3; Mat. 24:14; lé Mateus 28:19, 20.

17. Ki tipu di prezentis nu odja na kel studu li, i kuzê ki nu ta ben odja na kel otu studu?

¹⁷ Na kel studu li, dja nu odja alguns prezenti ki Jeová da-nu, sima Téra ki é nos kaza, nos sérbru ki é spetakular i Bíblia ki é Palavra di Deus. Má, ten otus prezenti ki Jeová da-nu ki nu ka ta konsigi odja. Nu ta ben pâpia di kes tizoru na kel otu studu.