TXEU irmon ku irmans ki mudaba pa otus país pa ba buska un vida midjór, disidi volta pa ses país. Pamodi ses amor pa Jeová i pa pesoas, es muda pa undi mestedu más publikadoris di Reinu. (Mat. 22:37-39) Ki sakrifisius es tevi ki faze i ki bensons es resebe? Pa nu sabe respósta, nu ben odja izénplu di alguns irmon di Kamarons, un país ki ta fika na oésti di Áfrika.

Na 1998, un irmon ki txoma Onésime dexa se país, Kamarons, i el pasa 14 anu ta vive fóra. Un dia, na runion el obi un ilustrason sobri trabadju di pregason. Kel algen ki sta ta fazeba diskursu fla: “Dôs amigu sta ta piska na lugar diferenti. Un sta ta pega pexi más txeu ki kel otu. Kuzê ki kel otu amigu ki sta ta pega poku pexi debe faze? É ka midjór el ba piska undi ki kel otu amigu sta?”

Kel ilustrason li poi Onésime ta pensa na xansi di volta pa Kamarons, dja ki txeu algen la ta krê studa Bíblia. Má el fika preokupadu. El ta konsigi viveba otu bês na se país dipôs di txeu ténpu ta vive fóra? Pa el sabe kel-li, Onésime disidi bai Kamarons pa 6 mês. Nton, na 2012, el ba vive la.

Onésime fla: “N tevi ki kustuma otu bês ku kalor i ku situason di vida na nha país. Na Salon di Reinu, N fika ta xinta otu bês na banku riju.” Má el fla ta ri: “Sima N ba ta konsentra más na runion, N ba ta skese di kes kadera almofadadu ki N dexaba pa tras.”

Na 2013, Onésime kaza ku Géraldine, ki volta pa Kamarons dipôs di vive 9 anu na Fransa. Es poi Jeová na primeru lugar na ses vida. Ki bensons es resebe? Onésime fla: “Nu tevi priviléjiu di kursa Skóla pa Pregadoris di Reinu i di sirbi na Betel. Na anu ki pasa, 20 studanti di nos kongregason batiza. Gósi N ta xinti ma N sta ‘piska’ na lugar sértu.” (Mar. 1:17, 18) Géraldine tanbê fla: “N resebe bensons mutu más di ki kel ki N sta imajinaba.”

Judith mudaba pa Mérka, má el ta gostaba txeu di faze más na pregason. El fla: “Tudu bês ki N ta vizitaba nha família na Kamarons, N ta voltaba di la ta txora. Éra difísil dimás dexa pa tras kes studu di Bíblia ki dja N kumesaba.” Má simé, Judith ka tinha sertéza si el devia voltaba pa Kamarons. El tinha un trabadju ki el  ta ganhaba txeu i ki ta djudaba el pagaba tratamentu di se pai na Kamarons. Simé, el kunfia na Jeová i Judith disidi volta. El fla ma el ta xintiba sodadi di kes kuza sábi ki el tinha na Mérka. El faze orason ta pidi Jeová pa djuda-l lida ku kel mudansa, i un enkaregadu di grupu di kongregason ku se mudjer nkoraja-l.

Judith ta lenbra: “Na três anu, N tevi alegria na djuda kuatu studanti bira disiplu.” Judith bira pionera spesial, i oji el ku se maridu, Sam-Castel, ta vizita kongregasons. Má kuzê ki kontise ku pai di Judith? Judith ku se família atxa un ospital na un otu país ki disidi paga operason di se pai. Es fika kontenti pamodi operason kóre tudu dretu.

Un irmon ki txoma Victor mudaba pa Kanadá. Dipôs ki el lé un artigu di Sentinéla sobri faze kursu, el kumesa ta pensa na se situason. El disidi larga kel kursu ki el sta fazeba na universidadi i el faze un kursu tékiniku. Victor fla: “Kel-li djuda-m ranja trabadju faxi i faze kel kuza ki más N kreba, ki éra ser pioneru.” Más tardi, Victor kaza ku Caroline, i es dôs ba vizita Kamarons. La, duránti vizita ki es faze na Betel, es insentivadu pa es pensa na xansi di sirbi na Kamarons. Victor fla: “Nu ka tinha ninhun razon pa flaba nau. I dja ki nos vida éra sinplis, nu podia setaba kel konviti.” Caroline ten alguns prubléma di saúdi, má simé es disidi muda.

Victor ku Caroline kumesa sirvisu di pioneru fíksu pa djuda kes monti algen ki kria studaba Bíblia. Duránti un ténpu, es konsigi sustenta pamodi es tinha algun dinheru guardadu. Má, pa es kontinuaba ta ser pioneru na Kamarons, es tinha ki voltaba pa Kanadá i trabadjaba la pa alguns mês. Ki bensons es resebe? Es bai pa Skóla pa Pregadoris di Reinu, es sirbi di pioneru spesial i gósi es é sérvus di konstruson. Victor fla: “Dexa kel vida sábi ki nu tinha da-nu xansi di xinti ajuda di Jeová.”

Na 2002, Alain, ki staba na un universidadi na Alimanha, lé kel folhetu Jovens — Como Usarão Sua Vida?. Es folhetu djuda-l ten otus obijetivu. Na 2006, el bai pa Escola de Treinamento Ministerial i el diziginadu pa Kamarons, ki é se país.

Na Kamarons, Alain konsigi un trabadju di meiu piriúdu. Más tardi, el atxa un otu trabadju ki el ta ganhaba dretu. Má, el fika preokupadu pamodi kel trabadju podia trapadjaba se pregason. Pur isu, kantu el konvidadu pa ser pioneru spesial, el ka pensa dôs bês. Se patron oferese-l más dinheru, má Alain kontinua ku se disizon. Más tardi, Alain kaza ku Stéphanie, ki viveba txeu anu na Fransa. Ki prublémas el tevi ki lida ku el na Kamarons?

Stéphanie fla: “N tevi alguns prubléma di saúdi i alerjia, má N konsigi faze un tratamentu i N midjora.” Jeová abensua-s pamodi es aguenta firmi. Alain fla: “Kantu nu bai prega na un lugar izoladu ki txoma Katé, nu atxa txeu algen ki krê studaba Bíblia. Más tardi, nu konsigi faze kes studu  pa tilifóni. Dôs di kes studanti batiza, i kriadu un grupu la.” Tanbê Stéphanie fla: “Kuzê ki ta da-nu más alegria é djuda otus da ses vida pa Jeová. Sirbi li, da-nu es alegria txeu bês.” Oji Alain i Stéphanie ta vizita kongregasons.

Gisèle batiza timenti el staba ta studa medisina na un universidadi na Itália. Dja el studaba ku un kazal pioneru i el fikaba dimiradu pamodi es tinha un vida sinplis. Ses izénplu pô-l ta krê faze más na pregason. Nton Gisèle bira pioneru fíksu timenti el staba ta tirmina universidadi.

Gisèle kria voltaba pa Kamarons pa faze más na sirvisu pa Jeová. Má alguns kuza ta preokupaba el. El fla: “N tinha ki abriba mô di nha direitu di mora na Itália i fika lonji di nhas amigu i família ki ta moraba la.” Má simé, na maiu di 2016, Gisèle volta pa Kamarons. Un ténpu dipôs, Gisèle kaza ku Léonce. Betel di Kamarons fla-s ma es podia mudaba pa Ayos, un sidadi ki mesteba más publikadoris di Reinu.

Modi ki éra vida na Ayos? Gisèle fla: “Txeu bês nu ta fikaba simanas sen lus i nu ka ta podia karegaba nos telemóvel. Kuazi sénpri es ta staba disligadu. N prende kuzinha na lenha i nu ta panhaba agu na un posu, má el ta staba sénpri xeiu di algen. Pur isu, nu ta baba la di noti i nu ta uzaba un karinhu ku un lanterna.” Modi ki es konsigi lida ku kes prubléma li? Gisèle fla: “Spritu di Jeová djuda-nu aguenta firmi. Mi ku Léonce sénpri nu ta djuda kunpanheru. Tanbê, nos família i amigus ta nkoraja-nu i alvês es ta da-nu dinheru.”

Gisèle sta kontenti pamodi el volta pa se país? El fla: “Sin! Klaru ki sin! Na komésu, nu pasa pa alguns prubléma i nu fika dizanimadu. Má, kantu nu vense kes prubléma, mi ku Léonce, nu xinti ma nu faze kel ki nu devia fazeba.” Léonce ku Gisèle kursa Skóla pa Pregadoris di Reinu, i gósi es sta pioneru spesial pa un ténpu.

Un piskador ten koraji di pasa pa situasons difísil pa el pode pega txeu pexi. Di mésmu manera, kes ki ta volta pa ses país sta dispostu na faze sakrifisius pa djuda kes ki krê obi mensaji di Reinu. Di sertéza, Jeová ta lenbra di tudu sforsu ki kes publikador ta faze i di amor ki es ta mostra pa se nómi. (Nee. 5:19; Heb. 6:10) Si bu ta mora na otu país i bu país sta meste di más publikador, bu ta atxa ma bu ta pode voltaba pa la? Si bu faze si, Jeová ta da-u txeu benson. — Pro. 10:22.