UN ALGEN ki ta trabadja na lugar ki ta faze previzon di ténpu, sta odja un imaji ta omenta na ekran di un radar. El ta odja ma un tenpistadi prigozu sta kuazi ta txiga na un zóna undi ta mora un monti di algen. El ta preokupa ku kes algen, pur isu el ta faze di tudu pa el aviza-s antis di ser tardi dimás.

Di mésmu manera, Jeová sta ta aviza tudu algen oji sobri un ‘tenpistadi’ ki sta ta txiga. El é más prigozu di ki kalker otu tenpistadi ki un otu algen pode aviza. Modi ki Jeová sta ta da kel avizu li? I pamodi ki nu pode ten sertéza ma el sta ta da pesoas ténpu ki es meste pa aji? Antis di responde kes pergunta li, nu sta ben odja alguns avizu ki Jeová daba na pasadu.

Na ténpu ki Bíblia skrebedu, Jeová da txeu avizu sobri ‘tenpistadi’ ô julgamentus ki el ta ben trazeba kóntra kes algen ki ka kria obiba ku el. (Pro. 10:25; Jer. 30:23) Má, sénpri el ta avizaba kes algen un ténpu antis, i el ta flaba kuzê ki es podia fazeba pa es obiba ku el. (2 Reis 17:12-15 ; Nee. 9:29, 30) Jeová sénpri uza se sérvus fiel li na Téra pa aviza se julgamentus i djuda kes algen ntende ma es meste ajiba lógu. — Amós 3:7.

Nué é un izénplu di algen ki Deus uza pa aviza se julgamentus. Duránti txeu anu, el prega ku koraji pa kes algen ki tinha konportamentu mariadu i violéntu di se ténpu, i el aviza-s sobri kel Dilúviu ki staba ta binha. (Gén. 6:9-13, 17) Tanbê el fla-s kuzê ki es meste fazeba pa salva di kel Dilúviu. É pur isu ki más tardi, Nué txomadu di ‘pregador di justisa’. — 2 Ped. 2:5.

Sikrê ku tudu sforsu ki Nué faze, kes algen di se ténpu ka liga kel mensaji di Deus. Es mostra ma es tinha txeu falta di fé. I pamodi kel-li, es kaba pa móre kantu Dilúviu ‘txiga i kaba ku tudu es’. (Mat. 24:39; Heb. 11:7) Es ka podia flaba ma Deus ka avizaba es.

Na otus situason, Jeová aviza pesoas poku ténpu antis di traze se julgamentu. Má simé, el da ténpu ki meste, pa kes algen mudaba ses manera di aji. Kantu Jeová manda kes 10 praga sobri Ijitu, el aviza un ténpu antis. Pur izénplu, el manda Muizes ku Aron pa aviza Faraó ku se sérvus ma kel sétimu praga, ki éra un tenpistadi di granizu, ta binha lógu na kel otu dia i ta fazeba txeu stragu. Má, sô un dia ta txigaba pa es atxa un lugar pa proteje i skapa di kel tenpistadi? Bíblia ta fla: ‘Entri kes sérvu di Faraó, tudu kes ki ta ruspetaba palavra di Jeová traze lógu ses própi sérvus i ses animal pa kaza, má tudu kes ki ka obi ku palavra di Jeová, dexa ses sérvu i ses animal na kanpu.’ (Êxo. 9:18-21) Ta fika klaru ma Jeová da-s ténpu pa es pripara. Kes ki aji lógu ka sufri txeu sima kes otu.

Faraó ku se sérvus tanbê avizadu antis di kel últimu praga. Má, pamodi ses tolisi, es ka obi ku kel avizu. (Êxo. 4:22, 23) Kal ki foi rezultadu? Es odja ses primeru fidju ta móre. Fórti kuza tristi! (Êxo. 11:4-10; 12:29) Es podia obiba ku kel avizu antis di sérba tardi dimás? Sin! Muizes aviza lógu kes israelita sobri kel désimu praga i el splika-s modi ki es ta salvaba ses família. (Êxo. 12:21-28) Kantu algen ki obi ku kel avizu di Muizes? Di akordu ku alguns kónta ki fazedu, uns 3 milhon di algen konsigi  skapa di kel julgamentu di Deus i sai di Ijitu. Kel-la ta inklui kes israelita, i ‘un grandi nunbru’ di kes ki ka éra israelitas i kes algen di Ijitu. — Êxo. 12:38; nóta di rodapé.

Kes izénplu li ta mostra ma Jeová sénpri da pesoas ténpu ki meste pa obi ku se avizus. (Deut. 32:4) Pamodi ki Deus faze kel-li? Apóstlu Pedru splika ma Jeová ‘ka krê pa ningen ser distruídu, má el krê pa tudu algen rapende.’ (2 Ped. 3:9) Sin, Jeová ta preokupaba ku kes algen. El kreba pa es rapendeba i pa es mudaba ses konportamentu antis di se julgamentu txiga. — Isa. 48:17, 18; Rom. 2:4.

Oji tanbê, tudu algen sta ta obi un avizu urjenti ki sta dadu na mundu interu, i es meste aji. Kantu Jizus staba na Téra, el aviza ma es mundu ta sérba distruídu duránti un ‘grandi tribulason’. (Mat. 24:21) El faze un profesia ki ta mostra tintin pa tintin kuzê ki se sigidoris ta ben odjaba i ki situason es ta ben pasaba pa el óras ki kel dia txiga. Na kel profesia, el ta pâpia di kuzas ki sta ta kontise oji na mundu interu. — Mat. 24:3-12; Luc. 21:10-13.

Dja ki nu sta ta vive na ténpu ki kel profesia sta ta kunpri, Jeová sta ta aviza tudu algen. El krê pa tudu algen skodje sirbi-l i obi ku el, pamodi kes ki ta faze si ta ten un vida midjór gósi i na futuru es ta resebe txeu benson na kel mundu novu. (2 Ped. 3:13) Jeová krê djuda pesoas ten fé na se promésas. El ta djuda-s faze kel-li óras ki el ta da-s un mensaji ki ta salva vida. Kel mensaji li é kes ‘notísia sábi di Reinu’ ki Jizus fla ma ‘ta ben ser pregadu na mundu interu, pa sirbi di tistimunhu pa tudu nasons’. (Mat. 24:14) Deus sta ta organiza se adoradoris verdaderu pa da kel ‘tistimunhu’, ô pa prega kel mensaji di Deus, na uns 240 país. Jeová krê pa tudu algen obi kel avizu i skapa di kel ‘tenpistadi’ di julgamentu ki sta pa ben. — Sof. 1:14, 15; 2:2, 3.

Má, prubléma é ka si Jeová ta da pesoas ténpu ki es meste pa obi ku se avizus. Sima nu odja, sénpri el ta da avizus. Má, un pergunta inportanti é: Pesoas ta ben obi avizu di Deus timenti inda sta na ténpu? Jeová da-nu priviléjiu di leba se mensaji. Pur isu, nu faze nos midjór pa djuda tudu kes ki nu ta pode pa salva óras ki fin di kel sistéma li ben.