STUDU 41
Modi ki bu pode djuda bu studanti faze prugrésu i batiza — Párti 1
‘Nhos é un karta di Kristu, ki é nos ki skrebe ku nos trabadju pa Deus’. — 2 CORÍNTIOS 3:3.
KÁNTIKU 78 Nu inxina Palavra di Deus
KUZÊ KI NU STA BEN STUDA *
Ka ten kuza más sábi di ki un kongregason interu odja un studanti di Bíblia ki es gosta txeu ta batiza. (Odja parágrafu 1.)
1. Modi ki 2 Coríntios 3:1-3 ta djuda-nu da valor pa priviléjiu di djuda un algen faze prugrésu i batiza? (Odja fotu na kapa.)
MODI ki bu ta xinti óras ki bu ta odja un studanti di Bíblia di bu kongregason ta batiza? Di sertéza bu ta fika uma kontenti. (Mat. 28:19) I si bo é kel algen ki faze-l studu, bu ta fika mutu más kontenti inda. (1 Tes. 2:19, 20) Kes novu disiplu ki batiza, es é bons ‘karta di rekumendason’, ka sô pa kes algen ki studa Bíblia ku es, má tanbê pa kongregason interu. — Lé 2 Coríntios 3:1-3.
2. (a) Ki pergunta inportanti nu meste faze i pamodi? (b) Kuzê ki é un studu di Bíblia? (Odja nóta di rodapé.)
2 Nu ta fika txeu kontenti di odja ma na kes kuatu anu ki pasa, fazedu uns 10 milhon di studus di Bíblia * tudu mês na mundu interu. I duránti kes anu la, uns 280 mil algen batiza tudu anu. Kuzê ki nu pode faze pa djuda más algen, entri kes milhon di studanti, faze prugrésu i batiza? Jeová ten txeu paxénxa, i inda el sta da tudu algen xansi di bira disiplus di Kristu. Nton, nu krê faze nos midjór pa djuda kes algen txiga na batismu más faxi ki nu pode. Ténpu ki resta sta ta kaba! — 1 Cor. 7:29a; 1 Ped. 4:7.
3. Kuzê ki nu sta ben odja na kel studu li sobri faze studus di Bíblia?
3 É rei di inportanti faze disiplus gósi. Pur isu, Grupu Enkaregadu di Óbra pergunta filial di alguns país, kuzê ki pode fazedu pa djuda studantis di Bíblia batiza. Na kel studu li i na kel otu, nu sta ben odja kuzê ki nu pode prende ku pionerus, misionárius i enkaregadus di grupu di kongregason. * (Pro. 11:14; 15:22) Kes dôs studu, sta ben splika kuzê ki instrutoris i ses studanti pode faze pa kel studu di Bíblia da bons rezultadu. Na kel studu li, nu sta ben odja sinku kuza ki tudu studanti meste faze pa el pode batiza.
STUDA TUDU SIMANA
Pergunta bu studanti si nhos pode xinta djuntu pa faze studu (Odja parágrafus 4 ti 6.)
4. Kuzê ki é bon nu pensa na el sobri faze studu na pórta di studanti?
4 Txeu di nos irmons ku irmans ta faze studus di Bíblia na pórta di kaza di algen. Nbóra kel-li é un bon manera di djuda pesoas kria interesi, kes konbérsu ta kustuma dura poku ténpu i nen sénpri é ka tudu simana. Pa djuda un algen kria más interesi, alguns publikador ta pidi se kontatu. Asi, pa es pode txoma-l ô manda-l un mensaji di Bíblia na dia ki es ka ta bai vizita-l. Kes tipu di konbérsu li, ki é ka sénpri, pode dura alguns mês i nunka el ka ta bira un studu di Bíblia ki ta faze prugrésu. Gósi para i bu pensa: Si é sô kel ténpu li ki studanti ta tra pa studa Bíblia i sô kel sforsu li ki el ta faze, el ta konsigi da se vida pa Deus i batiza? Talvês nau.
5. Sima Jizus fla na Lucas 14:27-33, kuzê ki pode djuda-nu na nos trabadju di faze disiplus?
5 Un bês, Jizus faze un ilustrason pa mostra kuzê ki un algen ten ki faze pa ser se disiplu. Primeru, el pâpia di un algen ki krê faze un tori. Jizus fla ma el meste ‘xinta primeru i faze kónta kantu ki el ta gasta’ pa el odja si el ta konsigi tirmina-l. Dipôs, el pâpia di un rei ki krê ba géra kóntra otu rei. Kel rei li meste ‘xinta primeru i djobe konsedju’ pa el odja si se trópas ta konsigi ganha géra. (Lé Lucas 14:27-33.) Di mésmu manera, Jizus sabia ma un algen ki krê ser se disiplu debe djobe ku kuidadu kuzê ki el meste faze pa sigi-l. Pur isu, nu meste insentiva nos studantis pa studa ku nos tudu simana. Modi ki nu pode faze kel-li?
6. Kuzê ki nu pode faze pa ten studus di Bíblia ki ta faze prugrésu?
6 Primeru, tenta fika más ténpu ta faze studu na pórta di kel algen ki bu sta pâpia ku el. Talvês bu pode tenta mostra-l más di ki un testu di Bíblia tudu bês ki bu ta vizita-l. Óras ki kel algen xinti más avontádi na kes vizita ki bu ta faze-l, bu pode pergunta-l: “Ten algun lugar ki nu pode xinta i pâpia más?” Se respósta ta mostra si se studu di Bíblia é inportanti pa el ô nau. Ku ténpu, pa djuda bu studanti faze prugrésu más faxi, bu pode pergunta-l: “Kuzê ki bu ta atxa di nu studa dôs bês pa simana?” Alén di studa un ô dôs bês pa simana, ten otu kuza ki nu meste faze.
PRIPARA PA KADA STUDU
Pripara dretu pa kada studu i mostra bu studanti modi ki el ta pripara (Odja parágrafus 7 ti 9.)
7. Modi ki un instrutor pode pripara dretu pa kada studu di Bíblia?
7 Abo ki é instrutor, bu meste pripara dretu pa kada studu di Bíblia. Bu pode kumesa ta lé kuzê ki nhos sta ba studa i djobe kes testu di Bíblia. Kes pontu prinsipal debe fika klaru na bu menti. Pensa na téma di lison, na subtéma, na perguntas di studu, na testus ki é pa “lé”, na fotus ô dizenhus i na kalker vídiu ki pode djuda splika kel asuntu. Dipôs, pensa na bu studanti. Djobe modi ki bu ta ba splika-l kel asuntu di un manera sinplis i klaru. Asi, bu studanti ta konsigi ntende dretu i faze sima el prende. — Nee. 8:8; Pro. 15:28a.
8. Kuzê ki Colossenses 1:9, 10, ta inxina-nu sobri faze orason pa nos studantis?
8 Óras ki bu sta pripara, bu debe faze orason pa bu studanti i pa se nisisidadis. Pidi Jeová pa djuda-u inxina Bíblia di un manera ki ta toka se korason. (Lé Colossenses 1:9, 10.) Tenta pensa antis na kes kuza ki bu studanti pode atxa difísil di ntende ô di seta. Ka bu skese ma bu obijetivu é djuda bu studanti faze prugrésu i batiza.
9. Modi ki un instrutor pode djuda studanti pripara pa se studu? Splika.
9 Nu ta spéra ma através di un prugrama di studu di Bíblia, nos studanti ta xinti gratidon pa kuzê ki Jeová i Jizus faze pa el, i ta pô-l ku gana di prende más. (Mat. 5:3, 6) Pa se studu djuda-l más txeu, kel studanti meste konsentra na kuzê ki el sta prende. Pa kel-li, bu meste djuda-l ntende pamodi ki é inportanti pripara pa kada studu. Splika-l ma el debe lé kel lison antis i ma el debe para pa pensa modi ki kel asuntu pode djuda-l na se vida. Modi ki bu pode djuda-l? Pripara un lison djuntu ku studanti pa mostra-l modi ki ta fazedu. * Splika-l modi ki el ta atxa respósta pa kes pergunta di studu. Tanbê mostra-l modi ki el ta sublinha sô kes palavra ô frazi ki ta djuda-l lenbra respósta. Dipôs, pidi-l pa el responde na se própi palavra. Óras ki studanti ta faze kel-li, bu ta konsigi sabe si el ntende dretu kel asuntu. Má, ten otu kuza ki bu debe insentiva bu studanti pa faze.
INXINA STUDANTI PÂPIA KU JEOVÁ TUDU DIA
Inxina bu studanti modi ki el ta pâpia ku Jeová (Odja parágrafus 10 i 11.)
10. Pamodi ki studanti debe lé Bíblia tudu dia? I modi ki el pode tra pruvetu di se leitura di Bíblia?
10 Alén di un studanti studa Bíblia tudu simana ku se instrutor, el debe faze alguns kuza tudu dia di el pa el. El meste obi i pâpia ku Jeová. El pode obi Deus óras ki el ta lé Bíblia tudu dia. (Jos. 1:8; Sal. 1:1-3) Mostra-l modi ki el ta uza kel tabéla “Prugrama di leitura di Bíblia” ki sta na jw.org. * Pa bu djuda un studanti tra pruvetu di se leitura di Bíblia, insentiva-l pa el pensa na kuzê ki el lé. Tanbê, fla-l ma óras ki el ta lé Bíblia el debe pergunta kuzê ki kel-li ta inxina-l sobri Jeová i modi ki kel asuntu pode djuda-l na se vida. — Atos 17:11; Tia. 1:25.
11. Modi ki nu pode inxina un studanti faze orason di manera sértu? Pamodi ki é inportanti el faze orason pa Jeová sénpri?
11 Insentiva bu studanti pa pâpia ku Jeová. Pa kel-li, el debe faze orason tudu dia. Pur isu, na komésu i na fin di kada studu, faze orason di korason i pâpia di bu studanti. Óras ki bu studanti ta obi-u ta faze orason, el ta prende modi ki el pode faze orason di korason pa Jeová na nómi di Jizus Kristu. (Mat. 6:9; João 15:16 ) Imajina modi ki lé Bíblia tudu dia (obi Jeová) i faze orason (pâpia ku Jeová) ta djuda bu studanti bira más amigu di Deus! (Tia. 4:8) Si bu studanti kria kes ábitu li, el sta dizenvolve más un kuza ki ta ben djuda-l da se vida pa Deus i batiza.
DJUDA BU STUDANTI TEN UN AMIZADI KU JEOVÁ
12. Modi ki un instrutor pode djuda un studanti ten un amizadi ku Jeová?
12 Kuzê ki un studanti ta prende di Bíblia, ka debe fika sô na se menti, má tanbê na se korason. Pamodi? Pamodi nos korason, ki ta inklui nos dizejus, intensons i sentimentus, é ki ta pô-nu ta aji. Jizus inxina pesoas txeu kuza i es gostaba di kuzê ki el ta inxinaba. Má kes algen sigi-l pamodi el sabia tokaba ses korason. (Luc. 24:15, 27, 32) Bu studanti meste odja Jeová sima un Algen ki nu pode ten un amizadi ku el. I el meste odja Jeová sima se Pai, se Deus i se Amigu. (Sal. 25:4, 5) Óras ki bu ta faze un studu di Bíblia, txoma atenson pa kes kualidadi bunitu ki nos Deus ten. (Êxo. 34:5, 6; 1 Ped. 5:6, 7) Ka ta nporta kal ki é asuntu ki nhos sta ta studa, djuda bu studanti konsentra na kel tipu di Algen ki Jeová é. Djuda-l da valor pa kes kualidadi bunitu ki Jeová ten, sima amor, bondadi i konpaxon. Jizus fla ma kel ‘mandamentu más inportanti i ki é primeru’ é: ‘Ama Jeová, bu Deus’. (Mat. 22:37, 38) Tenta djuda bu studanti ten un amor fórti pa Jeová.
13. Da un izénplu ki ta mostra modi ki bu pode djuda bu studanti prende sobri kes kualidadi bunitu di Jeová.
13 Splika bu studanti pamodi ki bu ta ama Jeová. Kel-li pode djuda-l ntende ma el tanbê, el meste ten se própi amizadi ku Deus. (Sal. 73:28) Pur izénplu, na kel publikason ki nhos sta ta studa, ten un frazi ô un testu di Bíblia ki ta mostra algun kuza sobri Jeová, sima se amor, sabedoria ô puder ki pode toka se korason? Nton fla bu studanti kel-li. Dexa-l sabe ma kel kualidadi é un di kes txeu motivu ki pô-u ta ama bu Pai na Séu. Má inda ten otu kuza ki tudu studanti meste faze pa el pode faze prugrésu i batiza.
INSENTIVA BU STUDANTI SISTI RUNION
Insentiva bu studanti pa kumesa ta sisti runion lógu ki el ta pode! (Odja parágrafus 14 i 15.)
14. Sima sta na Hebreus 10:24, 25, modi ki runion pode djuda un studanti di Bíblia faze prugrésu?
14 Nos tudu nu krê pa nos studanti faze prugrésu i batiza. Má, un kuza ki pode djuda-s é óras ki nu ta insentiva-s pa es sisti runion. Kes instrutor ki ten spiriénsa ta fla ma kes studanti ki ta kumesa lógu ta sisti runion, ta faze prugrésu más faxi. (Sal. 111:1) Alguns instrutor ta splika ses studanti ma kes kuza ki es ta prende na studu é sô metadi di ses prugrama di studu di Bíblia. I pa es resebe kel otu metadi, es meste bai runion. Lé Hebreus 10:24, 25 ku bu studanti i splika-l modi ki é sábi sta na runion. Mostra-l kel vídiu Kuzê ki ta kontise na un Salon di Reinu? *. Djuda bu studanti ntende ma bai runion tudu simana debe ser un párti inportanti na se vida.
15. Kuzê ki bu pode faze pa insentiva bu studanti sisti tudu runion?
15 Kuzê ki bu pode faze si bu studanti inda ka bai ninhun runion ô si é sô alvês ki el ta bai? Pâpia ku el di manera animadu sobri algun kuza ki bu prende na un runion ka dura li. Kel-li pode pô-l ku más vontadi di bai runion, envês di sô konvida-l. Da-l Sentinéla ô Folhetu di studu ki sta ta uzadu na runion. Mostra-l kuzê ki ta studadu na kel otu runion i pergunta-l kuzê ki el gosta más txeu. Kuzê ki bu studanti ta ba xinti óras ki el bai runion pa primeru bês, ta ser mutu más midjór di ki kalker otu kuza ki el odja i ki el obi na otus relijion. (1 Cor. 14:24, 25) El ta ba konxe pesoas ki ta ba ser bons izénplu pa el i ki pode djuda-l faze prugrésu i batiza.
16. Kuzê ki un studanti meste faze pa el pode batiza? I kuzê ki nu ta ben odja na kel otu studu?
16 Modi ki nu pode djuda nos studantis faze prugrésu i batiza? Nu pode djuda kada studanti odja modi ki el pode da valor pa se studu, óras ki nu ta insentiva-l pa el studa tudu simana i pripara antis di kada studu. Tanbê, nu krê insentiva-l pa el pâpia ku Jeová tudu dia i pa el ten se própi amizadi ku el. Nu krê insentiva-l pa el sisti tudu runion. (Odja kuadru “ Kuzê ki un studanti meste faze pa el pode batiza”.) Má, na kel otu studu nu ta ben odja ma inda ten sinku kuza ki un instrutor meste faze pa djuda se studanti faze prugrésu i batiza.
KÁNTIKU 76 N sta kontenti ti dimás!
^ par. 5 Inxina siginifika djuda un algen “pensa, xinti ô aji di un manera diferenti”. Nos testu di anu pa 2020, Mateus 28:19, lenbra-nu ma é inportanti studa Bíblia ku otus algen i djuda-s bira disiplus batizadu di Jizus Kristu. Kel studu li i kel otu ki nu sta ben studa, ta ben mostra-nu modi ki nu pode midjora na es trabadju ki é rei di inportanti.
^ par. 2 MÁS SPLIKASON: Si bu ta pâpia ku un algen sénpri di Bíblia i bu ta uza un di nos publikasons ô alguns informason ki sta na un publikason, bu sta ta faze un studu di Bíblia. Bu pode marka un studu di Bíblia: (1) si bu mostra kel algen modi ki ta fazedu un studu i nhos studa dôs bês dipôs di kel-la i (2) si bu ten razon pa kridita ma kel studu ta ba kontinua.
^ par. 3 Kes dôs studu li tanbê ten alguns sujiston ki sta na Nosso Ministério do Reino, di julhu di 2004 ti julhu di 2005, ki sta na kes párti “Como Dirigir Estudos Bíblicos Progressivos”.
^ par. 9 Odja vídiu di kuatu minutu Inxina bus studanti pripara studu. Na JW Library®, bai na VÍDIUS > NOS RUNION I TRABADJU DI PREGASON > MIDJORA BU MANERA DI PREGA.
^ par. 10 Bai na ENSINUS DI BÍBLIA > AJUDAS PA STUDA BÍBLIA.
^ par. 14 Na JW Library®, bai na VÍDIUS > NOS RUNION I TRABADJU DI PREGASON > FERAMÉNTAS PA PREGASON.
