1. Pamodi ki nu sta kontenti i nu ta xinti orgulhu di ser Tistimunhas di Jeová?

NU STA txeu kontenti i nu ta xinti orgulhu di ser Tistimunhas di Jeová! Nu ta leba nómi di Deus i nu ta mostra ma nos é se Tistimunhas pamodi nu ta partisipa na trabadju di prega i di faze disiplus. Nu ta fika txeu kontenti óras ki nu ta djuda un algen ki ten ‘bon inklinason pa vive pa tudu ténpu’, bira sérvu di Jeová. (Atos 13:48) Nu ta xinti sima Jizus kantu se disiplus konta-l kes bon spiriénsa ki es tevi na pregason. — Luc. 10:1, 17, 21.

2. Modi ki nu ta mostra ma nu ta leba asériu nos trabadju di pregason?

² Nu ta leba asériu nos trabadju di pregason. Apóstlu Polu fla Timótiu: ‘Presta txeu atenson na bu kabésa i na bu manera di inxina.’ Tanbê el fla-l: ‘Óras ki bu faze si, bu ta salva bu kabésa i kes ki ta obi-u.’ (1 Tim. 4:16) Txeu vida sta na prigu. Dja ki nu krê pa Reinu di Deus governa-nu, sénpri nu ta presta atenson na nos kabésa. Nu ta faze kel-li, óras ki nu ta konporta di un manera ki ta da ónra pa Jeová i ki sta di akordu ku kes notísia sábi ki nu ta prega. (Fil. 1:27) Nu ta mostra ma nu ta ‘presta atenson na nos manera di inxina’, óras ki nu ta pripara dretu pa nos pregason i óras ki nu ta pidi Jeová pa djuda-nu antis di nu kumesa ta prega.

3. Tudu algen ta mostra interesi na mensaji di Reinu? Da un izénplu.

³ Mésmu óras ki nu ta faze nos midjór na pregason, txeu algen na nos tiritóriu pode ka mostra interesi na notísias sábi di Reinu. Odja izénplu di irmon Georg Lindal, ki prega el sô na txeu lugar na Islándia di anu 1929 ti anu 1947. El da milharis di publikason, má ningen ka seta verdadi. El skrebe: “Alguns algen é kóntra verdadi, má maioria sta kontinua ka ta mostra interesi.” Alguns misionáriu ki forma na Jiliádi mandadu pa la, má simé pesoas kontinua  ka ta mostra interesi na verdadi. Sô dipôs di 9 anu ki alguns algen na Islándia da ses vida pa Jeová i batiza. *

4. Modi ki nu pode xinti óras ki pesoas ka ta mostra interesi na mensaji ki nu ta prega?

⁴ Nu pode fika tristi óras ki pesoas ka ta mostra interesi na mensaji ki nu ta prega. Nu pode fika sima Polu, ki xinti ‘un tristéza grandi i un dór ki ka ta kaba’ pamodi maioria di judeus ka krê kriditaba ma Jizus éra Misías. (Rom. 9:1-3) Talvês bu sta ta sforsa i ta faze txeu orason pa un studanti di Bíblia, má el ka sta faze prugrésu i pamodi kel-li talvês bu meste para se studu. Ô pode ser ki nunka bu ka konsigi djuda un algen faze prugrésu i batiza. Má bu debe xinti kulpadu ta pensa ma Jeová ka sta abênsua bu trabadju di pregason? Na kel studu li, nu sta ben odja respósta di dôs pergunta: (1) Kuzê ki ta mostra ma nu sta ta ten bon rezultadu na pregason? (2) Kuzê ki nu debe spéra óras ki nu ta prega pa otus algen?

5. Pamodi ki nen sénpri nu ka ta ten kel rezultadu ki nu ta krê na pregason?

⁵ Bíblia ta fla kel-li sobri kel algen ki ta faze vontadi di Deus: ‘Tudu kuza ki el faze ta ten bon rezultadu.’ (Sal. 1:3) Má kel-li ka krê fla ma tudu kuza ki nu ta faze pa Jeová ta ten kel rezultadu ki nu ta krê. Nos vida é ‘xeiu di preokupason’ pamodi nos tudu é inperfetu. (Jó 14:1) Alén di kel-li, kes algen ki é kóntra nos pode ka dexa-nu faze trabadju di pregason sima nu ta kustuma faze, duránti un ténpu. (1 Cor. 16:9; 1 Tes. 2:18) Nton, kuzê ki ta mostra ma un algen sta ten bon rezultadu na pregason? Nu ben odja alguns prinsípiu di Bíblia ki pode djuda-nu responde kel pergunta li.

6. Kuzê ki ta poi Jeová ta atxa ma nu sta ten bon rezultadu na pregason?

⁶ Jeová ta odja sforsu ki nu sta faze i ma nu ka sta dizisti. Jeová ta atxa ma nu sta ta ten bon rezultadu na pregason óras ki nu ta trabadja ku npenhu i ku amor, ka ta nporta modi ki otus algen reaji. Polu skrebe: ‘Deus é ka injustu pa skese di nhos óbra i di amor ki nhos mostra pa se nómi, pamodi nhos sirbi kes santu i nhos kontinua ta sirbi-s.’ (Heb. 6:10) Jeová ta lenbra di nos sforsu i di nos amor, sikrê nu ka ten un studanti di Bíblia ki batiza. Pur isu, kuzê ki Polu fla kes kriston na Korintu tanbê ta sirbi pa nos. El skrebe: ‘Nhos trabadju duru pa Sinhor é ka atoa.’ Kel-li ta mostra ma Jeová ta kontinua ta da valor pa nos trabadju, ka ta nporta si kel sforsu ki nu faze tevi kel rezultadu ki nu staba ta spéra ô nau. — 1 Cor. 15:58.

7. Kuzê ki nu ta prende di kuza ki apóstlu Polu fla sobri se trabadju di pregason?

 ⁷ Apóstlu Polu éra un bon misionáriu. El djuda forma novus kongregason na txeu sidadi. Má alguns algen kritika-l i es fla ma el ka éra un bon instrutor. Pa difende se kabésa, Polu ka fla kantu algen ki el djuda bira kriston. Má envês di kel-li, el skrebe: ‘N trabadja más txeu’. (2 Cor. 11:23) Sima Polu, nu debe lenbra ma pa Jeová kuzê ki é más inportanti é sforsu ki nu ta faze i ma nu ka sta dizisti.

8. Di kuzê ki nu debe lenbra sobri nos trabadju di pregason?

⁸ Nos trabadju di pregason ta poi Jeová kontenti. Jizus manda 70 disiplu pa un kanpanha di pregason. Na fin di kel kanpanha, es ‘volta kontenti’. Kuzê ki poi kes disiplu ta fika kontenti? Es fla: ‘Ti dimónis ta obi ku nos óras ki nu ta uza bu nómi.’ Má Jizus koriji ses manera di pensa. El fla-s: ‘Ka nhos fika kontenti pamodi kes spritu sta ta obi ku nhos, má nhos fika kontenti pamodi nhos nómi sta skrebedu na Séu.’ (Luc. 10:17-20) Jizus sabia ma é ka sénpri ki se disiplus ta tinha bons spiriénsa na pregason. Na verdadi, nu ka sabe kantu di kes algen ki disiplus di Jizus pâpia ku el ki bira kriston. Kes disiplu meste ntendeba ma es ka debe fikaba kontenti sô pamodi pesoas staba ta obi-s. Má es devia fikaba más kontenti inda di sabe ma Jeová staba kontenti ku sforsu ki es faze.

9. Sima sta na Gálatas 6:7-9, kal ki ta ben ser rezultadu si nu ka dizisti di nos trabadju di pregason?

⁹ Si nu ka dizisti di nos trabadju di pregason, nu ta ganha vida pa tudu ténpu. Óras ki nu ta trabadja di tudu korason pa prega i inxina notísias sábi, na verdadi nu sta ta ‘símia ta pensa na spritu’. Kel-li krê fla ma nu sta dexa spritu di Deus orienta nos vida. Si nu ‘ka dizisti’ i nen nu ‘ka dizanima’, Jeová promete ma el ta da-nu vida pa tudu ténpu, sikrê nu ka djuda ningen batiza. — Lé Gálatas 6:7-9.

10. Pamodi ki alguns algen ta obi óras ki nu ta prega i otus nau?

¹⁰ Manera ki pesoas ta reaji óras ki nu ta prega notísias sábi ta dipende di kuzê ki es ten na korason. Jizus splika kel-li na un ilustrason ki el konta sobri un ómi ki símia na txon diferenti, má é sô un di kes txon ki da kumida. (Luc. 8:5-8) Jizus fla ma kada un di kes txon ta reprizenta pesoas ku korason diferenti i ki ta reaji di manera diferenti óras ki es ta obi ‘palavra di Deus.’ (Luc. 8:11-15) Sima kel ómi ki símia, nu ka ta pode poi simenti di verdadi ta kria na korason di un algen. Kel-li ta dipende prinsipalmenti di modi ki se korason é. Nos responsabilidadi é kontinua ta lansa simenti di mensaji di Reinu. É sima apóstlu Polu fla: ‘Kada un ta resebe se própi rekonpénsa, di akordu ku se própi trabadju’, ka di akordu ku rezultadu di se trabadju. — 1 Cor. 3:8.

11. Pamodi ki Jeová staba kontenti ku pregason di Nué, nbóra pesoas ka obi ku el? (Odja dizenhu na kapa.)

¹¹ Duránti stória, txeu sérvu di Jeová prega pa pesoas ki ka krê obiba es. Pur izénplu, Nué éra ‘pregador di justisa’. Talvês el faze kel-li pa uns 40 ô 50 anu. (2 Ped. 2:5) Di sertéza, Nué kreba pa pesoas obiba el, má Jeová ka fla-l ma kel-la ta kontiseba. Má kantu Jeová da Nué kes orientason pa el faze arka, el fla-l: ‘Bu debe entra na arka ku bus fidju, bu mudjer  i kes mudjer di bus fidju.’ (Gén. 6:18) I kantu Deus splika Nué kal ki éra tamanhu di arka, Nué talvês da kónta ma é ka txeu algen ki sta ba obiba el, pamodi arka ka ta kebeba tudu es. (Gén. 6:15) Sima nu sabe, ningen ka obi ku el. (Gén. 7:7) Kel-li krê fla ma Jeová atxa ma Nué ka tevi bons rezultadu na se trabadju di pregason? Klaru ki nau! Nué foi fiel i el faze tudu kel ki Jeová manda-l. Pa Jeová, Nué tevi bons rezultadu na se trabadju di pregason. — Gén. 6:22.

12. Modi ki proféta Jeremias konsigi xinti alegria na se trabadju di pregason sikrê pesoas ka krê obiba el i es fika kóntra el?

¹² Proféta Jeremias pasa pa mésmu kuza. Pesoas di se ténpu ka krê obiba el i es fika kóntra el. Má simé Jeremias prega pa más di 40 anu. Pesoas ta insultaba el i es ta fazeba el trósa. Pur isu el fika txeu dizanimadu i el pensa ti na dizisti di se diziginason. (Jer. 20:8, 9) Má Jeremias ka dizisti! Kuzê ki djuda-l lida ku pensamentu negativu i xinti alegria otu bês na se trabadju di pregason? El konsentra na dôs kuza inportanti. Primeru, kel mensaji ki el ta lebaba pesoas ta daba es ‘un futuru i un speransa.’ (Jer. 29:11) Sugundu, Jeremias ta papiaba na nómi di Jeová. (Jer. 15:16) Di mésmu manera, nos tanbê nu ta pâpia ku pesoas sobri un mensaji di speransa i nu ta pâpia ku es sobri nómi di Jeová pamodi nos é se Tistimunhas. Óras ki nu konsentra na kes dôs kuza li, nu ta xinti alegria, ka ta nporta modi ki pesoas reaji.

13. Kuzê ki nu ta prende di kel ilustrason ki Jizus konta na Marcos 4:26-29?

¹³ Ta leba ténpu pa un algen dizenvolve fé. Jizus inxina kel-li na kel ilustrason ki el konta di un ómi ki símia i dipôs el durmi. (Lé Marcos 4:26-29.) Kes simenti kria poku-poku i kel ómi ka ta pode fazeba nada pa poba kes simenti ta kria más faxi. Talvês abo tanbê bu ten ki spéra un bon ténpu pa bu odja bu studanti di Bíblia ta faze kel ki el prende. Un agrikultor ka ta pode obriga un planta pa kria faxi sima el ta krê. Di mésmu manera, nu ka ta pode obriga nos studanti faze prugrésu faxi, sima nu ta krê. Si bu atxa ma bu studanti sta ta dimora na faze prugrésu, ka bu fika dizanimadu i nen ka bu dizisti. Sima na agrikultura, faze disiplus é un trabadju ki ta iziji paxénxa. — Tia. 5:7, 8.

14. Ki izénplu ta mostra ma pode leba txeu ténpu pa pesoas kumesa ta obi nos mensaji?

¹⁴ Na alguns tiritóriu pode leba txeu ténpu pa un algen batiza. Odja izénplu di dôs irman di sangi ki txoma Gladys i Ruby Allen. Na 1959 es diziginadu pionera fíksu na un sidadi pikinoti na Kebéki, na Kanadá. * Pesoas di la tinha medu di ses vizinhus i di kes padri. Pur isu es ka krê obiba mensaji di Reinu. Gladys fla: “Nu bai di pórta en pórta, 8 óra pur dia, duránti dôs anu i ningen ka pâpia ku nos! Kes algen ta binha na pórta, es ta odjaba ma éra nos i es ta baba ses kaminhu. Má nu ka dizisti.” Poku-poku atitudi di kes algen ba ta muda. Es bira más nos amigu i es kumesa ta obi-nu. Oji ten três kongregason na kel sidadi. — Isa. 60:22.

15. Kuzê ki 1 Coríntios 3:6, 7 ta inxina-nu sobri trabadju di faze disiplus?

¹⁵ Nos tudu nu pode djuda na faze disiplus. Nos tudu na kongregason nu pode djuda un algen faze prugrésu i batiza. (Lé 1 Coríntios 3:6, 7.) Pur izénplu, un irmon  pode ntrega un folhetu ô un revista pa un algen ki sta interesadu. Dipôs, el ta da kónta ma el ka ta konsigi faze kel revizita. Pur isu, el ta pidi otu publikador pa revizita kel algen. Kel publikador ta kumesa ta faze kel algen studu. Sima ténpu ta ba ta pasa, el ta konvida txeu irmon ku irmans pa ba sisti kel studu i kada un di es ta djuda kel studanti di manera diferenti. Kada irmon ku irman ta djuda rega kel simenti di verdadi. Pur isu, óras ki un algen batiza, tudu kes ki sforsa pa djuda-l debe fika kontenti. — João 4:35-38.

16. Sikrê bu ka ta konsigi faze txeu na trabadju di pregason, pamodi ki bu debe fika kontenti simé?

¹⁶ Talvês bu ten un saúdi fraku ô bu ka ten txeu forsa pa bu partisipa na trabadju di pregason. Má simé, bu pode xinti alegria ku kel ki bu ta konsigi faze. Odja izénplu di Rei Davidi. El ku se trópas tevi ki luta kóntra amalekitas pa es salvaba ses família i pa es rekuperaba ses kuza di valor ki furtadu. Más di 200 trópa di Davidi staba kansadu dimás pamodi géra i es fika pa tras ta toma kónta di bagaji. Davidi ku se trópas ganha géra i es konsigi toma txeu kuza di valor di ses inimigus. Dipôs, Davidi manda kes ómi ki bai géra pa dividi kes kuza di valor ku kes ómi ki fika ta toma kónta di bagaji. (1 Sam. 30:21-25) Mésmu kuza ta kontise ku nos trabadju di faze disiplus. Tudu algen ki ta faze se midjór na trabadju di pregason debe fika kontenti óras ki un algen ta konxe Jeová i ta batiza.

17. Pa kuzê ki nu debe agradese Jeová?

¹⁷ Nu ta agradese Jeová pamodi el ta da txeu valor pa nos trabadju di pregason. El sabe ma nu ka ta pode obriga un algen pa obi-nu i nen adora-l. Má simé, Jeová ta presta atenson na sforsu ki nu ta faze i amor ki nu ta mostra pa el i el ta rekonpensa-nu pa kel-li. Tanbê el ta inxina-nu fika kontenti ku kel ki nu ta konsigi faze na nos trabadju di pregason. (João 14:12) Nu pode ten sertéza ma si nu ka dizisti, Jeová ta fika kontenti ku nos trabadju!