TUDU anu, un monti ovelha ki ten txeu valor pa Jeová ta readimitidu na kongregason. Imajina modi ki ta ten txeu ‘alegria na Séu’ óras ki un di es ta volta pa Jeová! (Luc. 15:7, 10) Si bu readimitidu ka dura li, bu pode ten sertéza ma Jizus, anjus i ti mésmu Jeová sta txeu kontenti di odja-u ta volta pa verdadi. Má sima bu ta ba ta rekupera bu amizadi ku Jeová, pode parse alguns dizafiu. Kal ki é alguns di es? Kuzê ki bu pode faze pa vense-s?

Txeu irmon ku irmans kontinua ta xinti dizanimadu mésmu dipôs ki es volta pa kongregason. Talvês bu sta xinti sima Rei Davidi. Mésmu dipôs ki el purduadu, el fla: ‘Nhas éru toma kónta mi’. (Sal. 40:12; 65:3) Dipôs ki alguns volta pa Jeová, es kontinua ta luta kóntra sentimentus di kulpa ô vergónha duránti anus. Izabel, ki staba dizasosiadu pa más di 20 anu *, fla: “Pa mi éra txeu difísil kridita ma Jeová podia purduaba mi.” Si bu fika dizanimadu, bu amizadi ku Jeová ta torna bira fraku. (Pro. 24:10) Ka bu dexa kel-li kontise ku bo.

Otus ta atxa ma es ka ta konsigi faze tudu kel ki es meste pa es rekupera ses amizadi ku Jeová. Dipôs ki Antóniu readimitidu, el fla: “N skese txeu kuza ki N prende ô ki N faze kantu mi éra Tistimunha di Jeová.” Dja ki alguns ta xinti di kel manera li, es ka ta faze tudu kel ki es pode na sirvisu di Jeová.

Imajina ma un furakon faze txeu stragu na un kaza. Óras ki dónu di kel kaza odja modi ki se kaza fika, el pode fika dizanimadu sô di pensa na tudu trabadju ki el ten ki faze pa  torna konpo-l. Ta kontise mésmu kuza óras ki un algen ta faze un pekadu gravi ki ta faze txeu stragu na se amizadi ku Jeová. Bu pode fika preokupadu ku tudu kel trabadju ki bu meste faze pa rekupera bu amizadi ku Jeová. Má bu ka meste faze kel-li bo sô.

Jeová ta konvida-nu: ‘Nhos ben i nu rezolve kuzas entri nos.’ (Isa. 1:18) Dja bu faze txeu sforsu pa bu rezolve kuzas ku Jeová i el ta ama-u txeu pamodi kel-li. Para i bu pensa: dja ki bu volta pa Jeová, el pode uza bu izénplu pa prova ma Satanás é un mintirozu! — Pro. 27:11.

Kantu bu volta pa Jeová, bu bira se amigu otu bês i Jeová promete ma el ta bira bu amigu tanbê. (Tia. 4:8) Má ka bu fika kontenti sô pamodi otus algen dja odja ma bu volta pa kongregason. Bu meste kontinua ta bira bu amor pa Jeová más fórti. El é bu Pai i bu Amigu. Modi ki bu pode faze kel-li?

Tenta poi métas ki bu ta konsigi alkansa. Talvês ti inda bu ta lenbra di kes kuza prinsipal ki bu prende sobri Jeová i se promésa di un paraízu. Má gósi bu meste ten un bon prugrama. Pur izénplu, sai na pregason sénpri, bai tudu runion i pasa más ténpu ku bus irmon ku irmans. Odja alguns méta ki bu pode ten.

Pâpia sénpri ku Jeová. Jeová sabe ma si bu kontinua ta xinti kulpadu pa kuza mariadu ki bu faze, bu pode atxa difísil faze orason. (Rom. 8:26) Má, ka bu para di faze orason. Fla Jeová ma bu tene gana di ser se amigu otu bês. (Rom. 12:12) André fla: “N ta xintiba txeu kulpadu i ku txeu vergónha. Má sénpri ki N ta fazeba orason, N ta xintiba midjór i ku pas déntu di mi.” Si bu ka sabe sobri kuzê ki bu pode ora, studa Salmo 51 i 65, ki ta mostra kes orason ki Rei Davidi faze kantu el rapende.

Studa Bíblia sénpri. Kel-li ta djuda bu fé i bu amor pa Jeová bira más fórti. (Sal. 19:7-11) Filipi fla: “Dja ki N ka tinha un bon prugrama di lé i studa Bíblia, nha amizadi ku Jeová bira fraku i N faze kuza ki mágua Jeová. N ka krê fazeba kel mésmu éru dôs bês. Nton N disidi faze nha studu pesoal sénpri.” Bu pode faze mésmu kuza. Si bu ka sabe ki asuntu bu pode skodje pa faze bu studu pesoal, pidi ajuda di un amigu ki ten amizadi fórti ku Jeová.

Rekupera bu amizadi ku irmons i irmans. Alguns di kes ki volta pa kongregason fika ku medu pa irmons ka xinti raiba di es. Larisa fla: “N ta xintiba txeu vergónha. N xinti ma N traíba kongregason. Kes sentimentu li dura pa txeu ténpu.” Bu pode ten sertéza ma ansions i otus irmon maduru tene gana di djuda-u rekupera bu amizadi ku Jeová. (Odja kuadru “ Kuzê ki ansions pode faze?”.) Ansions i kes otu irmon sta txeu kontenti pamodi bu volta pa Jeová i es krê pa bu ser filís! — Pro. 17:17.

Kuzê ki pode djuda-u ten amor más fórti pa irmons ku irmans di bu kongregason? Sisti tudu runion i partisipa na pregason sénpri djuntu ku irmons i irmans. Modi ki kel-li pode djuda-u? Felix fla: “Kongregason tinha gana pa N volta. I N odja ma irmons ta amaba mi. Tudu es djuda-m torna xinti párti di kel família. N xinti ma Jeová dja purduaba mi i ma N pode kontinuaba ta sirbi-l.” — Odja kuadru “ Kuzê ki bu pode faze?”.

Timenti bu sta luta pa bu rekupera bu amizadi ku Jeová, bu pode ten sertéza ma Satanás ta kontinua ta poi prublémas na bu kaminhu pa dizanima-u. (Luc. 4:13) Nton pripara i bira bu fé más fórti.

Repara kuzê ki Jeová fla sobri se ovelhas: ‘N ta ben djobe kel ki sta perdedu N ta torna traze kel ki sta afastadu, N ta poi liga na kel ki da pankada i N ta da forsa pa kel ki sta fraku’. (Eze. 34:16) Jeová dja djuda txeu algen rekupera se amizadi ku el. Bu pode ten sertéza tanbê ma el krê djuda-u rekupera i ten un amizadi mutu más fórti ku el.