1. Kuzê ki ta poi txeu algen ku dúvida?

OJI ten milharis di relijion ki ta fla ma es é kriston i ma es ta adora Deus sima el ta krê. É ka atoa ki txeu algen tene dúvida. Es ta pergunta: “Ten sô un relijion verdaderu ô Deus ta seta tudu tipu di relijion?” I nos? Nu ten tudu sertéza ma nu sta ta inxina verdadi? Nu ten sertéza ma oji Tistimunhas di Jeová sta adora Deus sima el ta krê? Nu ta konsigi ten sertéza di tudu kes kuza li? Nu ben odja alguns próva.

2. Sima sta na 1 Tessalonicenses 1:5, pamodi ki apóstlu Polu tinha sertéza ma kel ki el ta kriditaba na el éra verdadi?

² Apóstlu Polu tinha sertéza ma el tinha verdadi. (Lé 1 Tessalonicenses 1:5.) El ka ta kriditaba na kel-li sô pamodi el gostaba di kes verdadi. El ta kriditaba ma ‘tudu ki sta na Skritura ben di Deus’. (2 Tim. 3:16) Kuzê ki Polu prende na se studu? Polu atxa txeu próva na Skrituras ki ta mostra ma Jizus éra kel Misías ki prometedu. Má kes xéfi di relijion di judeus ka liga kes próva. Es éra finjidu. Es ta flaba ma es ta inxinaba povu sobri Deus, má es ta fazeba kes kuza ki Deus ta odiaba. (Tito 1:16) Má Polu ka éra sima kes xéfi di relijion. El ka ta skodjeba ki párti di Palavra di Deus ki el ta kriditaba na el. El staba prontu pa inxina i vive di akordu ku ‘tudu kel ki é vontadi di Deus.’ — Atos 20:27.

3. Nu meste sabe respósta di tudu nos perguntas pa nu pode ten sertéza ma nu tene verdadi? (Tanbê odja kuadru “ Kes kuza ki Jeová faze i se pensamentus é ‘txeu dimás pa konta’”.)

³ Alguns algen ta atxa ma relijion verdaderu debe ser kapás di responde tudu pergunta, ti mésmu di kes ki nu  ka ta atxa respósta na Bíblia. Má nu debe spéra kel-li? Odja izénplu di apóstlu Polu. El insentiva kes kriston pa es ‘konfirma tudu kuza’, má tanbê el seta ma tinha txeu kuza ki el ka ta ntendeba. (1 Tes. 5:21) El skrebe: ‘Konhisimentu ki nu ten é sô un párti, nu ta odja imaji fusku na un spedju di metal’. (1 Cor. 13:9, 12) Polu ka sabia di tudu kuza i nen nos tanbê. Má Polu ta ntendeba kes verdadi prinsipal sobri vontadi di Jeová. Kes kuza ki el sabia dja txigaba pa daba el sertéza ma kuzê ki el ta kriditaba na el éra verdadi!

4. Modi ki nu pode ten más sertéza ma dja nu atxa verdadi i kuzê ki nu sta ben odja sobri kristons verdaderu?

⁴ Nu meste ten más sertéza ma nu tene verdadi. Un manera di faze kel-li é óras ki nu ta konpara kel manera di adora Deus ki Jizus inxina ku kel ki Tistimunhas di Jeová ta faze oji. Na kel studu li, nu sta ben odja ma kristons verdaderu (1) ka ta faze idolatria, (2) ta ruspeta nómi di Jeová, (3) ta ama verdadi, i (4) es ten txeu amor pa kunpanheru.

5. Kuzê ki nu ta prende ku Jizus sobri adora Deus di manera ki el ta seta i modi ki nu pode imita-l?

⁵ Jizus sénpri tevi un amor fórti pa se Deus, pur isu el adora sô Jeová kantu ki el staba na Séu i kantu ki el staba li na Téra. (Luc. 4:8) Jizus inxina se disiplus pa faze mésmu kuza. Jizus ku se disiplus fiel nunka ka uza imaji na adorason. Dja ki Deus é Spritu, ka ten ninhun imaji ki ómis ta faze ki ta parse ku el! (Isa. 46:5) Má i sobri kes imaji ki ta txomadu santu i ki algen ta ora pa es? Na kel sugundu di kes 10 mandamentu, Jeová fla: ‘Ka bu  faze ninhun imaji na fórma di státua pa bo, nen ninhun fórma di algun kuza ki ten di riba na séu, ô dibaxu na Téra. Ka bu nbaxa ses dianti’. (Êxo. 20:4, 5) Kes algen ki krê agrada Deus ta ntende klaru ma el ka krê pa nu adora imaji.

6. Ki izénplu di adorason ki Tistimunhas di Jeová ta sigi oji?

⁶ Kes algen ki ta studa stória ta fla ma na ténpu di apóstlus, kristons ta adoraba sô Deus. Pur izénplu, un livru di stória * ta fla ma kes primeru kriston ta “xintiba ódiu” sô di kel ideia di ten imajis na kes lugar ki es ta adoraba Deus. Oji, Tistimunhas di Jeová ta sigi mésmu izénplu di kes kriston di ténpu di apóstlus. Nu ka ta faze orason pa imaji di “santus” ô di anjus; nen nu ka ta faze orason pa Jizus. I tanbê, nu ka ta faze nada ki ta poi otus algen ta pensa ma nu sta adora nos país. Ka ta nporta kuzê ki kontise, nu sta disididu na obi kes palavra di Jizus: ‘É Jeová, bu Deus, ki bu debe adora’. — Mat. 4:10.

7. Kal ki é diferénsa klaru ki ten entri Tistimunhas di Jeová i kes otu relijion?

⁷ Oji txeu algen gosta di sigi kes xéfi di relijion famozu. Alvês es ta dimira-s txeu dimás, ti ki es ta kaba pa adora-s. Txeu algen ta bai ses igreja, ta kunpra ses livru i es ta da txeu dinheru pa kes xéfi di relijion ô pa kes organizason ki es ta trabadja pa el. Alguns algen ta kridita na tudu palavra ki es ta fla. I ti mésmu é difísil di imajina si kes algen li ta tinha mésmu dimirason pa Jizus si el parseba pa es! Má kes algen ki ta adora Jeová di verdadi ka ta sigi ómi. É klaru ki nu ta ruspeta kes algen ki ta toma kónta di nos, má sénpri nu ta lenbra klaru di kuzê ki Jizus inxina: ‘Nhos tudu é irmon.’ (Mat. 23:8-10) Nu ka ta adora ninhun ómi, ka ta nporta si es é xéfi di relijion ô pulítiku. I nen nu ka ta apoia ses ideia ô kuza ki es sta ta faze. Envês di kel-li, nu ka ta faze párti di mundu. Kel-li ta mostra klaru ma na tudu kes kuza li, anos é diferenti di kes otu relijion ki ta fla ma es é kriston. — João 18:36.

8. Modi ki nu sabe ma Jeová krê pa se nómi dadu glória i pa otus algen konxe-l?

⁸ Na un orason ki Jizus faze, el fla: ‘Nha Pai, glorifika bu nómi.’ Dipôs própi Jeová responde kel orason la di Séu, ku vós altu i el promete ma el ta glorifika se nómi. (João 12:28) Duránti tudu se trabadju di pregason, Jizus da glória pa nómi di se Pai. (João 17:26) Pur isu, nu debe spéra ma kes kriston verdaderu ta xinti orgulhu di uza nómi di Deus i djuda otus algen konxe-l.

9. Modi ki kes kriston na ténpu di apóstlus prova ma es ta ruspetaba nómi di Deus?

⁹ Poku dipôs ki formadu kel primeru kongregason na ténpu di apóstlus, Jeová ‘volta se atenson pa nasons, pa el tra di ses meiu un povu pa Se nómi.’ (Atos 15:14) Kes kriston di kel ténpu tinha orgulhu di uzaba kel nómi di Deus i di djudaba otus algen konxe-l. Es ta uzaba nómi di Deus óras ki es ta pregaba i óras ki es ta skrebeba livrus di Bíblia. * Asi, es mostra ma es éra úniku povu ki staba ta djuda otus algen konxe nómi di Deus. — Atos 2:14, 21.

10. Ki próvas ki ta mostra ma Tistimunhas di Jeová é un povu pa nómi di Jeová?

 ¹⁰ Tistimunhas di Jeová é un povu pa nómi di Jeová? Odja próvas. Ten txeu xéfi di relijion ki ta faze tudu ki es pode pa sukundi nómi di Deus. I ti mésmu es tra nómi di Deus di ses traduson di Bíblia. I na alguns situason ti es proíbi algen pa uza nómi di Deus na kes serimónia di relijion. * Má ten algun dúvida ma Tistimunhas di Jeová é kes úniku algen ki ta da nómi di Deus ruspetu i ónra ki el merese? Ka ten ninhun otu relijion ki sta djuda pesoas konxe nómi di Deus sima Tistimunhas di Jeová! Na kel asuntu li, nu sta faze nos midjór pa onra kel nómi ki nu resebe, ki é Tistimunhas di Jeová! (Isa. 43:10-12) Dja nu faze más di 240 milhon di Tradução do Novo Mundo da Bíblia Sagrada, ki ta uza nómi di Deus na tudu kes lugar ki otus tradutor di Bíblia tra. Tanbê dja nu faze publikason ku bazi na Bíblia ki ta inxina nómi di Deus na más di 1.000 língua!

11. Modi ki kes kriston na ténpu di apóstlus mostra ma es ta amaba verdadi?

¹¹ Jizus ta amaba kes verdadi sobri Deus i sobri Se vontadi. Jizus vive di akordu ku verdadi i el djuda otus algen konxe verdadi. (João 18:37) Kes sigidor  verdaderu di Jizus tanbê tinha txeu amor pa verdadi. (João 4:23, 24) É pur isu ki apóstlu Pedru fla ma relijion di kriston é ‘kaminhu di verdadi.’ (2 Ped. 2:2) Kes primeru kriston tinha amor fórti pa verdadi, pur isu es ka seta ninhun di kes ideia di relijion, di tradison di ses kultura ô kes opinion di algen ki ka staba di akordu ku verdadi. (Col. 2:8) Kes sigidor verdaderu di Jizus ta faze mésmu kuza oji. Tanbê es ta sforsa pa es ‘kontinua ta anda na verdadi’. Tudu kuza ki es ta kridita na el i ses manera di vive sta di akordu ku Palavra di Deus. — 3 João 3, 4.

12. Óras ki nu meste muda nos ntendimentu, kuzê ki irmons di Grupu Enkaregadu di Óbra ta faze i pamodi?

¹² Tistimunhas di Jeová ka ta fla ma es ten konhisimentu perfetu ô konplétu di verdadi. Alvês es pode fadja óras ki es ta splika un testu di Bíblia ô na da orientason sobri modi ki kongregason debe funsiona. Kel-li ka debe spanta-nu. Bíblia ta mostra klaru ma pesoas ta ntende verdadi más midjór sima ténpu ta ba ta pasa. (Col. 1:9, 10) Jeová ta mostra verdadi poku-poku i nu debe spéra ku paxénxa pa lus di verdadi fika más klaru. (Pro. 4:18) Óras ki irmons di Grupu Enkaregadu di Óbra odja ma nu meste muda nos ntendimentu ô manera ki nu ta faze un kuza, es ta faze kel mudansa lógu. Kel-li é diferenti di kel ki relijions falsu ta faze. Txeu bês es ta faze mudansas sô pa agrada kes algen di ses igreja ô pa es bira famozu na mundu. Má organizason di Jeová ta faze mudansa pamodi nu krê bira más amigu di Jeová i nu krê adora-l di kel manera ki Jizus ta fazeba. (Tia. 4:4) Óras ki nu ta faze mudansas é ka pamodi opinion di pesoas na mundu muda, má é pamodi nu bira ta ntende Bíblia más midjór. Nu ta ama verdadi! — 1 Tes. 2:3, 4.

13. Kal ki é kualidadi más inportanti ki kristons debe ten i modi ki Tistimunhas di Jeová ta mostra kel kualidadi li?

¹³ Kes kriston di ténpu di apóstlus tinha txeu kualidadi bunitu, má kel más inportanti éra amor. Jizus fla: ‘Através di kel-li tudu algen ta fika ta sabe ma nhos é nha disiplus: si nhos ten amor pa kunpanheru.’ (João 13:34, 35) Oji Tistimunhas di Jeová na mundu interu ta xinti kel amor di verdadi i union ki ten entri es. Nos é diferenti di tudu relijion, pamodi anos é sima un família sikrê nos é di país i di kultura diferenti. Nu pode odja próva di kel amor verdaderu na nos runions, asenbleias i kongrésus. Kes próva li ta da-nu más sertéza ma nu sta adora Jeová sima el ta krê.

14. Sima sta na Colossenses 3:12-14, kal ki é un manera inportanti di nu mostra amor fórti pa kunpanheru?

¹⁴ Bíblia ta fla pa nu ‘ten un amor fórti pa kunpanheru’. (1 Ped. 4:8) Un manera di nu mostra kel amor li é óras ki nu ta púrdua otus i suporta inperfeson di kunpanheru. Tanbê nu krê djobe maneras di mostra ma nu gosta di da i di resebe otus algen. Nu krê faze kel-li ku tudu irmon na kongregason, ti mésmu ku kes ki ofende-nu. (Lé Colossenses 3:12-14.) Óras ki nu ta mostra amor fórti pa kunpanheru, nu ta prova ma nos é kristons verdaderu.

15. Di ki otus manera nu sta adora Jeová sima kes kriston di ténpu di apóstlus?

¹⁵ Ten txeu kuza ki ta mostra ma nu sta ta adora Jeová sima kes kriston na ténpu di apóstlus. Pur izénplu, nos organizason ten enkaregadus di grupu di kongregason, ansions i ajudantis di kongregason. Éra si ki kristons di ténpu di apóstlus staba organizadu. (Fil. 1:1; Tito 1:5) Tanbê sima es, nu ta ruspeta leis di Jeová sobri séksu i kazamentu, sobri modi ki sangi debe uzadu i nu ta proteje kongregason di kes algen ki ka krê sigi leis di Deus. — Atos 15:28, 29; 1 Cor. 5:11-13; 6:9, 10; Heb. 13:4.

16. Kuzê ki nu ta prende na Efésios 4:4-6?

¹⁶ Jizus fla ma txeu algen ta ben flaba ma es é se disiplus, má é ka tudu es ki ta sérba se disiplus verdaderu. (Mat. 7:21-23) Bíblia tanbê dja flaba ma na ténpu di fin, ta ben tinha txeu algen ki ‘ta finji ma es ta adora Deus’. (2 Tim. 3:1, 5) Má Bíblia tanbê ta fla ma ten ‘sô un fé’ ki Deus ta seta. — Lé Efésios 4:4-6.

17. Oji ki relijion ki sta ta sigi Jizus i ki sta faze kel úniku adorason verdaderu?

¹⁷ Oji ki relijion sta ta faze kel úniku adorason verdaderu? Dja nu odja próvas. Nu odja kel izénplu di adorason ki Jizus inxina i ma kes kriston di ténpu di apóstlus sigi kel mésmu izénplu. Pur isu respósta é sô un: é Tistimunhas di Jeová. Di sertéza pa nos é un grandi priviléjiu faze párti di povu di Jeová i konxe verdadi sobri el i se vontadi! Nton nu krê faze tudu kel ki nu pode pa nu pega riju na verdadi.