DURÁNTI Sugundu Géra na Mundu Interu, un trópa nazista grita pa un grupu di Tistimunhas di Jeová: “Si algun di nhos nega bai pa géra kóntra Fransa ô Inglatéra, nhos tudu debe matadu!” Nbóra kes trópa staba prontu pa aji, ninhun di nos irmons ka nega ses fé. Es mostra txeu koraji! Kel izénplu li ta mostra klaru modi ki Tistimunhas di Jeová ta pensa. Nu ta nega bai géra di kel mundu li. Sikrê nu amiasadu di mórti, nu ka ta partisipa na géras di kel mundu li.

1. POVU DI DEUS INTERU TA FAZEBA PÁRTI DI UN NASON

Na pasadu, Jeová djunta se povu na un nason, ki éra nason di Israel. El txoma kes israelita di se ‘propriadadi spesial na meiu di tudu povu’. (Êxo. 19:5) Tanbê Deus da-s un téra sô pa es. Nton, kantu Deus ta flaba israelitas pa bai géra kóntra otus nason, es ka staba ta géra kóntra ses kunpanheru di adorason ô ta mata-s. a

Oji, kes algen ki ta adora Jeová é ‘di tudu nason, tribu, povu i língua’. (Apo. 7:9) Si povu di Deus ta partisipaba na géra, es podia sta ta luta kóntra kunpanheru ô ti mésmu ta mata ses kunpanheru di adorason.

 2. JEOVÁ FLA KES ISRAELITA PA BAI GÉRA

Na pasadu, Jeová ta disidiba na ki ténpu i pamodi ki kes israelita meste baba géra. Pur izénplu, Deus fla Israel pa faze julgamentu kóntra kes kananeu, ki éra un povu txeu konxedu pamodi es ta adoraba dimónis, es ta fazeba konportamentu seksual mariadu sen vergónha i es ta fazeba sakrifisiu di mininus. Jeová fla kes israelita pa es distruíba kes algen ki staba ta faze kes kuza mariadu na kel téra ki el prometeba es. (Lev. 18:24, 25) Dipôs ki kes israelita entra na kel téra ki Deus prometeba es, alvês Deus ta flaba es ma es tinha ki difendeba Israel di kes inimigu. (2 Sam. 5:17-25) Má na ninhun situason Jeová ka fla kes israelita ma es debe disidiba di es pa es si es ta baba géra. Óras ki es ta baba géra di es pa es, es ta tinha maus rezultadu. — Núm. 14:41-45; 2 Cró. 35:20-24.

Oji, Jeová ka ta fla algen pa bai pa géra. Nasons ta bai géra pa difende ses própi interesi, envês di kel di Deus. Talvês es ta bai géra pamodi es ta krê toma otus país, ganha mutu más dinheru ô pamodi pulítika. Má i kes ki ta fla ma es ta bai géra na nómi di Deus pa proteje ses relijion ô pa mata inimigus di Deus? Jeová ta ben proteje se sérvus i el ta ben distrui se inimigus na un géra na futuru ki txoma Armajedon. (Apo. 16:14, 16) Kenha ki ta ben briga é kes anju na séu, envês di kes algen ki ta adora Jeová li na téra. — Apo. 19:11-15.

3. ISRAELITAS KA TA MATABA KES ALGEN KI TA MOSTRABA FÉ NA JEOVÁ

Na pasadu, kes trópa di Israel txeu bês ta mostraba mizerikórdia pa kes algen ki ta mostraba fé na Deus i es ta mataba sô kes ki Jeová disidi ma debe moreba. Odja dôs izénplu. Nbóra Jeová manda israelitas pa distrui Jerikó, es ka mata Raabi  ku se família pamodi se fé. (Jos. 2:9-16; 6:16, 17) Dipôs, kes israelita ka mata kes algen di sidadi di Jibion pamodi kes jibionita mostra ruspetu pa Deus. — Jos. 9:3-9, 17-19.

Oji, kes trópa ki sta na géra ta mata kes algen ki ta mostra ma es ten fé ô ti kes algen ki é ka trópa.

4. KES ISRAELITA TINHA KI SIGIBA LEIS DI DEUS SOBRI GÉRA

Na pasadu, Jeová ta izijiba pa kes trópa di Israel fazeba géra di akordu ku kuzê ki el flaba es. Pur izénplu, alvês Deus ta pidiba pa es flaba kes sidadi ki staba kóntra es ‘modi ki es ta fazeba pas.’ (Deut. 20:10) Tanbê, Jeová ta speraba ma kes trópa di Israel ta kontinuaba linpu i ma es ta sigiba kes lei di Jeová sobri konportamentu. (Deut. 23:9-14) Kes trópa di kes otu nason txeu bês ta violaba kes mudjer di kes lugar ki es ta tomaba. Má Jeová ka dexa kes israelita faze kel-la. Na verdadi, sô es pode kazaba ku un mudjer ki es tomaba na géra dipôs di un mês ki es tomaba se sidadi. — Deut. 21:10-13.

Oji, maioria di país dja konkorda na faze géra di akordu ku leis ki es kria. Nbóra ses obijetivu é proteje kes algen ki é ka trópa, txeu bês kes nason ka ta sigi kes lei li.

5. DEUS LUTA PA SE POVU

Na pasadu, Jeová luta pa israelitas i txeu bês el faze milagris pa es pode venseba géra. Pur izénplu, modi ki Jeová djuda israelitas toma sidadi di Jerikó? Sima Jeová dja flaba, kantu kes israelita ‘da un gritu di géra riju, kel muralha kai’, i asi fika más fásil pa es tomaba kel sidadi. (Jos. 6:20) I modi ki es ganha géra kóntra kes amoreu? ‘Jeová bota la di séu pédras grandi di granizu riba di es i es móre. Na verdadi, móre más algen pamodi granizu di ki pa spada di israelitas.’ — Jos. 10:6-11.

KRISTONS VERDADERU TA NPENHA PA PAS

Sima dja nu odja, nos situason oji é diferenti di povu di Israel na ténpu antigu. Má, é ka sô kes diferénsa li ki ta pô-nu ka ta bai géra. Ten otus motivu. Pur izénplu, Deus dja flaba ma na ténpu di fin, kes algen ki el ta inxina ‘ka ta prende géra más.’ (Isa. 2:2-4) Nton ta fika klaru ma es ka ta partisipa na géra. Tanbê Jizus fla ma se disiplus ‘ka ta faze párti di mundu’, nton es ka ta mete na géra di mundu. — João 15:19.

Tanbê Jizus fla se disiplus pa faze más di ki kel-li. El fla-s pa es ivita kes kuza ki ta poi algen ta guarda rankor, ta xinti ódiu i ta bai géra. (Mat. 5:21, 22) I el fla se disiplus pa es ser di ‘kes ki ta poi pas’ i pa es ama ses inimigu. — Mat. 5:9, 44.

Modi ki kada un di nos pode faze kel-li? Talvês, nu ka ta krê partisipa na un géra, má algun bês dja nu xinti ma un algen na kongregason é nos inimigu? Nu krê kontinua ta sforsa pa tra kes tipu di sentimentu li. — Tia. 4:1, 11.

Nu ka ta partisipa na géras di nasons, envês di kel-li nu ta sforsa pa ten pas i amor entri nos. (João 13:34, 35) Pa nos tudu sta disididu na ka mete na asuntus di mundu timenti nu tene gana pa txiga kel dia ki Jeová ta ben kaba ku tudu géra pa tudu ténpu. — Sal. 46:9.