1-2. Kuzê ki kontise timenti dôs disiplu di Jizus staba na kaminhu pa Emaús?

 ÉRA dia 16 di nizan, di anu 33, i disiplus di Jizus staba tristi i ku medu. Dôs di es sai di Jiruzalen i es bai pa Emaús, ki é un vila pikinoti ki ta fikaba uns 11 kilómetru (ô 7 milha) di Jiruzalen. Kes ómi staba txeu tristi pamodi Jizus, ki éra kel ómi ki es ta sigiba, matadu dja tinha poku ténpu. Es tinha speransa ma Misías ta ben fazeba txeu kuza sábi pa judeus. Má gósi el staba mortu. Dipôs, kontise un kuza ki es ka staba ta spera.

² Un ómi txiga pértu di es na strada i el bai djuntu ku es. Kes disiplu fla-l sobri kes kuza orível ki kontise ku Jizus. Kel ómi kumesa ta pâpia di kuzas ki nunka es ka ta ba skeseba. El pâpia di “kes kuza ki Muizés skrebe i tudu kes Proféta”, i el splika pamodi ki Misías tinha ki sufreba i moreba. Kantu kes três ómi txiga na Emaús, kes dôs disiplu da kónta ma kel ómi ki es staba ta pâpia ku el éra Jizus ki Deus resusitaba! Imajina modi ki es fika txeu kontenti di sabe ma Misías staba bibu! — Luk. 24:13-35.

3-4. Kuzê ki kontise ku disiplus di Jizus, i kuzê ki nu sta ben prende na kel studu li? (Atus 1:3)

³ Jizus parse pa se disiplus txeu bês duránti kes últimu 40 dia ki el tevi na téra. (Lé Atus 1:3.) Duránti kel ténpu, Jizus da se disiplus ki staba tristi i ku medu koraji. Es fika  kontenti i es ganha koraji pa bai prega i inxina sobri notísias sábi di Reinu. a

⁴ Nu pode tra txeu pruvetu si nu studa sobri kuzê ki Jizus faze duránti kel ténpu la. Na kel studu li, nu sta ben odja modi ki Jizus uza kel ténpu (1) pa da se disiplus koraji, (2) pa djuda-s intende Skrituras midjór, i (3) pa trena-s pa kel trabadju ki es ta ba fazeba na futuru. Na kada un di kes situason li, nu ta ben odja modi ki nu pode imita izénplu di Jizus.

DA OTUS ALGEN KORAJI

5. Pamodi ki disiplus di Jizus mesteba di koraji?

⁵ Disiplus di Jizus mesteba di koraji. Pamodi? Alguns di es dexaba kaza, família i nogósiu pa sigiba Jizus pa ténpu interu. (Mat. 19:27) Otus staba ta tratadu mariadu pamodi es bira disiplus di Jizus. (Juan 9:22) Es fazeba kel sakrifisiu li pamodi es ta kriditaba ma Jizus éra kel Misías ki staba pa binha. (Mat. 16:16) Má kantu Jizus matadu, es fika txeu tristi i dizanimadu pamodi es ka sabia kuzê ki ta ba kontiseba.

6. Kuzê ki Jizus faze dipôs ki el resusitadu?

⁶ Jizus ta intendeba ma éra normal pa se disiplus xintiba tristi óras ki el moreba. Tanbê, el sabia ma kel motivu ki ta poba es ta fikaba tristi é ka pamodi es ka tinha fé. Nton, na kel mésmu dia ki el resusitadu, el kumesa ta da se amigus koraji. Pur izénplu, timenti Maria Madalena staba ta txora pértu di sipultura di Jizus, el parse pa el. (Juan 20:11, 16) Tanbê, el parse pa kes dôs disiplu ki staba ta viaja pa Emaús. I el parse pa apóstlu Pedru. (Luk. 24:34) Kuzê ki nu pode prende ku izénplu di Jizus? Nu ben odja kuzê ki kontise kantu el parse pa Maria Madalena.

7. Kuzê ki Jizus odja Maria ta faze, i kuzê ki el faze pa Maria? (Juan 20:11-16) (Odja dizenhu.)

⁷ Lé Juan 20:11-16. Sédu palmanhan, na dia 16 di nizan, alguns mudjer bai pa  kel sipultura undi ki Jizus podu. (Luk. 24:1, 10) Un di kes mudjer éra Maria Madalena. Kantu Maria txiga na sipultura, el atxa-l vaziu i el kóre pa ba fla Pedru ku Juan. Kes dôs ómi li, kóre pa sipultura i Maria sigi-s. Dipôs ki kes dôs ómi odja ma sipultura staba vaziu, es volta pa kaza, má Maria fika la ta txora. El ka da kónta ma Jizus staba la ta odja-l. Jizus odja kel mudjer fiel ta txora i kel-la toka-l txeu. Nton, el parse pa Maria i el faze un kuza sinplis ki da Maria txeu koraji. Jizus pâpia ku el i el da-l un diziginason inportanti, ki éra pa Maria ba flaba irmons di Jizus, ma Jizus dja resusitaba. — Juan 20:17, 18.

8. Modi ki nu pode imita Jizus?

⁸ Modi ki nu pode imita Jizus? Nu ta imita Jizus óras ki nu ta da nos irmons ku irmans koraji pa es kontinua ta sirbi Jeová. Sima Jizus, nu meste presta atenson na difikuldadis ki otus algen ta pasa pa el, tenta intende modi ki es sta ta xinti i konsola-s. Odja spiriénsia di un irman ki txoma Josiline. Se irman móre na un asidenti orível. El fla: “Duránti txeu mês, N xinti tristi di más.” Má, un irmon ku se mudjer konvida-l pa ses kaza, i es dexa-l pâpia sobri se sentimentus. Es obi-l ku atenson, es trata-l ku bondadi i es fla-l modi ki Jeová ta da-l txeu valor. Josiline fla: “N xinti sima si Jeová uza-s pa tra-m di un tenpistadi i pô-m na un boti di salva-vida. Es djuda-m rekupera nha dizeju di kontinua ta sirbi Jeová.” Nos tanbê, nu pode da otus algen koraji si nu dexa-s pâpia sobri ses sentimentu i nu obi-s ku atenson. Di kel manera li, nu pode konsola-s i djuda-s kontinua ta sirbi Jeová. — Rom. 12:15.

DJUDA OTUS ALGEN INTENDE PALAVRA DI DEUS

9. Ki prublémas disiplus di Jizus pasa pa el, i modi ki Jizus djuda-s?

⁹ Kes disiplu di Jizus kridita na Palavra di Deus i es faze ses midjór pa obi ku Jeová. (Juan 17:6) Má simé, kantu Jizus móre sima un kriminozu na un staka di tortura es fika konfuzu. Jizus sabia ma es tinha dúvidas, ka pamodi es tinha un mau korason, má pamodi es mesteba más intendimentu. (Luk. 9:44, 45; Juan 20:9) Nton, el djuda-s intende kuzê ki es lé na Skrituras. Odja modi ki el faze kel-li kantu el parse pa kes dôs disiplu na strada pa Emaús.

10. Modi ki Jizus djuda se disiplus intende ma el éra própi Misías? (Lukas 24:18-27)

¹⁰ Lé Lukas 24:18-27. Repara ma Jizus ka fla-s lógu kenha ki el éra. Envês di kel-li, el faze-s perguntas. Pamodi ki el faze kel-li? Talvês, el kreba pa es kontaba el kuzê ki es staba ta pensa i modi ki es staba ta xinti. I foi kel-la ki es faze. Es fla-l ma es pensaba ma Jizus ta ba biraba rei na Israel, i ma el ta ba governaba es envês di kes romanu. Dipôs ki Jizus dexa-s pâpia sobri kuzê ki es staba ta xinti, el uza Skrituras pa djuda kes ómi intende ma txeu profesia dja kunpriba. b Más tardi, na kel noti, Jizus inkontra ku kes otu disiplu i tanbê el splika-s siginifikadu di kes profesia. (Luk. 24:33-48) Kuzê ki nu ta prende ku kel-li?

11-12. (a) Kuzê ki nu pode prende di manera ki Jizus inxina verdadis di Bíblia? (Odja fotus.) (b) Modi ki instrutor di Nortey djuda-l?

¹¹ Modi ki nu pode imita Jizus? Primeru, óras ki nu ta inxina nos studanti di Bíblia,  nu debe faze-s pergunta ku jetu ki ta djuda-s fla modi ki es sta ta xinti. (Pro. 20:5) Dipôs ki bu intende modi ki es sta ta xinti, mostra-s modi ki es pode atxa versíklus di Bíblia ki pode djuda-s na ses situason. Ka bu fla-s kuzê ki es debe faze. Envês di kel-li, faze-s pergunta sobri testus di Bíblia. Insentiva-s pa es pensa sobri kuzê ki es sta ta lé i modi ki es pode faze sima es prende. Odja spiriénsia di un irmon di Gana ki txoma Nortey.

¹² Kantu Nortey tinha 16 anu, el kumesa ta studa Bíblia. Má lógu se família kumesa ta faze-l opozison. Kuzê ki djuda-l kontinua ta studa Bíblia? Kel irmon ki ta studaba Bíblia ku el dja papiaba ku el sobri Mateus kapítlu 10 i el mostraba el ma kristons verdaderu ta sérba pirsigidu. Nortey fla: “Pamodi kel-li, kantu pirsigison kumesa, N tinha serteza ma dja-m atxaba verdadi.” Se instrutor tanbê mostraba el Mateus 10:16 ki ta fla ma nu debe ten kautéla. Dipôs, es pâpia sobri modi ki kel versíklu li pode djudaba Nortey splika se família se krénsas ku ruspetu. Dipôs ki Nortey batiza, el krê sérba pioneru, má se pai krê pa el baba pa universidadi. Envês di se instrutor fla-l kuzê ki el debe fazeba, el faze-l perguntas pa djuda-l pensa na prinsípius di Bíblia i modi ki el pode tomaba kel disizon sértu. Kal ki foi rezultadu? Nortey disidi bira pioneru. Se pai pô-l fóra di kaza. Modi ki Nortey xinti ku kes kuza ki kontise? El fla: “N ten serteza ma N toma kel midjór disizon.” Óras ki nu ta djuda otus algen midita na testus di Bíblia, nu ta djuda-s bira ses fé más fórti i kontinua ta sirbi Jeová. — Efé. 3:16-19.

TRENA IRMONS PA ES SER SIMA “PREZENTI”

13. Kuzê ki Jizus faze pa ten serteza ma trabadju di pregason ta kontinuaba ta fazedu dipôs ki el baba pa séu? (Efézius 4:8)

¹³ Kantu Jizus staba na téra, el faze tudu kel ki se Pai pidi-l pa el faze. (Juan 17:4) Má, Jizus ka ta pensaba ma el éra úniku algen ki pode fazeba kuzê ki Jeová kreba. Duránti kes três anu i meiu ki el prega li na téra, tanbê el trena otus algen pa faze kel trabadju. Jizus kunfia na se disiplus. El da-s responsabilidadi di prega i inxina notísias sábi i di kuida di  povu di Jeová ki ten txeu valor. Alguns di se disiplus ki fika ta toma kónta di kel trabadju, talvês tinha ménus ki 30 anu. (Lé Efézius 4:8.) Kes ómi dja trabadjaba txeu ku Jizus i es éra lial pa el. Má antis di Jizus bai pa séu, el trena-s inda más, asi pa es pode sérba “sima prezenti”. Modi ki el trena-s?

14. Kuzê ki Jizus inxina se disiplus duránti kes últimu 40 dia ki el vive li na téra? (Odja dizenhu.)

¹⁴ Jizus da se disiplus konsedju ki es meste obiba, má el faze kel-li ku bondadi. Pur izénplu, el da kónta ma alguns di se disiplus ka ta kriditaba ma el moreba i el resusitadu. Nton, pa djuda-s konxe verdadi el da-s konsedjus. (Luk. 24:25-27; Juan 20:27) Tanbê, el fla-s pa es konsentra más na kuida di povu di Jeová di ki na ses nogósiu. (Juan 21:15) I el lenbra-s ma es ka debe konparaba kuzê ki es ta faze na ses sirvisu pa Jeová ku kuzê ki otus algen pode faze. (Juan 21:20-22) El koriji alguns ideia mariadu ki es tinha sobri Reinu i el djuda-s konsentra na prega notísias sábi. (Atus 1:6-8) Kuzê ki ansions pode prende ku Jizus?

15-16. (a) Di ki maneras ansions pode imita Jizus? Splika. (b) Modi ki un konsedju ki Patrick resebe djuda-l?

¹⁵ Modi ki ansions pode imita Jizus? Es meste trena irmons, ti mésmu kes jóven, pa es kuida di más responsabilidadis na kongregason. c Ansions ka ta spera ma kes algen ki es trena ta ser perfeitu. Es meste da irmons jóven konsedju ku amor asi pa es prende ser umildi, di kunfiansa, i pa es sta prontu pa djuda otus. — 1 Tim. 3:1; 2 Tim. 2:2; 1 Ped. 5:5.

¹⁶ Odja modi ki un konsedju djuda un irmon ki txoma Patrick. Kantu el éra jóven, el ta kustuma papiaba di manera duru i el ka ta mostraba bondadi, nen mésmu pa irmans. Un ansion repara ma Patrick meste fazeba mudansas i el da-l konsedjus klaru, má ku bondadi. Patrick  fla: “N fika kontenti pamodi el faze kel-li. N ta kustuma fikaba dizanimadu óras ki N ta odjaba otus irmon ta resebe priviléjius ki N ta gostaba di ten. Má konsedju ki kel ansion da-m, djuda-m odja ma N meste sérba umildi i mostra amor pa nhas irmons ku irmans envês di konsentra na resebe priviléjius.” Pamodi kel-li, Patrick diziginadu pa ser ansion kantu el tinha 23 anu. — Pro. 27:9.

17. Modi ki Jizus mostra ma el ta kunfiaba na se disiplus?

¹⁷ Jizus da se disiplus responsabilidadi ka sô di prega má tanbê di inxina. (Mateus 28:20.) Talvês kes disiplu xinti ma es ka staba kualifikadu pa kel diziginason. Má, Jizus ka tinha dúvida ma es pode fazeba kel trabadju. El tinha tantu serteza ki el fla-s: “Sima nha Pai manda-m, N sta manda nhos tanbê.” — Juan 20:21.

18. Modi ki ansions pode imita Jizus?

¹⁸ Modi ki ansions pode imita Jizus? Ansions ku spiriénsia ta trena otus irmon óras ki es ta dexa-s kuida di alguns responsabilidadi. (Flp. 2:19-22) Pur izénplu, ansions pode pidi jóvens pa djuda na linpa i na kuida di Salons di Reinu. Ansions pode da irmons un trabadju pa faze, mostra-s modi ki es ta faze-l i dipôs kunfia ma es ta faze kel trabadju. Un irmon ki txoma Mateus ki ka dura li bira ansion, ten txeu gratidon pa kes ansion ki ten spiriénsia ki trena-l pa faze txeu tipu di trabadju na kongregason. Tanbê, kes ansion kunfia ma el ta fazeba kes trabadju dretu. Mateus fla: “Óras ki N ka ta fazeba un kuza dretu es ta djudaba mi odja modi ki N pode prende ku nhas éru i modi ki N pode fazeba midjór di otu bês.” d

19. Kuzê ki nu debe sta disididu na faze?

¹⁹ Jizus uza kes últimu 40 dia ki el vive li na téra pa da otus algen koraji, inxina-s i trena-s. Nu debe sta disididu na sigi se izénplu. (1 Ped. 2:21) El ta djuda-nu faze kel-li. El promete: “N sta ku nhos tudu dia, ti fin di es mundu.” — Mat. 28:20.