1-2. (a) Kal ki éra situason na Judea kantu apóstlu Paulu skrebe kel karta pa ebreus? (b) Pamodi ki nu pode fla ma kel karta txiga déntu di óra?

 DIPÔS ki Jizus móre na anu 33, kristons na Jiruzalen i Judea pasa pa txeu prubléma. Lógu dipôs ki kongregason formadu es pasa pa pirsigison fórti. (Atus 8:1) Uns 20 anu dipôs es sufri pamodi fómi i pobréza. (Atus 11:27-30) Má, pa vólta di anu 61, kristons ka staba ta pirsigidu ku forsa sima antis. Duránti kel ténpu, Jeová poi apóstlu Paulu ta skrebe un karta pa es. Kes konsedju ki staba na kel karta li éra kel ki es staba ta meste pa priparaba es pa kuzê ki staba ta ba kontise.

² Kel karta pa ebreus txiga déntu di óra pamodi kel pas ki kes kristons tinha ka dura txeu. Paulu da kes kriston bons konsedju ki ta ba djudaba es aguentaba kes tribulason ki es staba kuazi ta ba pasaba pa el. Distruison di Jiruzalen, ki Jizus flaba ma ta ba kontiseba, staba kuazi ta txiga. (Luk. 21:20) É klaru ki nen Paulu i nen kes kriston na Judea ka sabia ki ténpu ki kel distruison ta ba kontiseba. Má, kes kriston pode uzaba kel ténpu ki staba ta falta pa es biraba ses fé i ses kapasidadi di aguenta firmi más fórti. — Ebr. 10:25; 12:1, 2.

3. Pamodi ki sérvus di Jeová oji debe presta txeu atenson na kel karta ki skrebedu pa ebreus?

³ Nu sta kuazi ta pasa pa un tribulason más grandi di ki kel ki kes kriston ebreu pasa pa el. (Mat. 24:21; Apo. 16:14, 16) Nton, nu ben odja alguns konsedju ki Jeová  da ki djuda kes kriston i ki ta ben djuda-nu tanbê.

“KONTINUA TA BIRA MADURU”

4. Ki prublémas kes judeu ki bira kriston pasa pa el? (Odja fotu.)

⁴ Kes judeu ki bira kriston tinha ki fazeba mudansas grandi i kel-li ka éra fásil. Duránti txeu ténpu, judeus éra kel povu ki Jeová skodjeba. Jiruzalen éra séntru di Reinu di Deus na téra i kel ténplu éra séntru di adorason verdaderu. Tudu kes judeu fiel ta sigiba Lei di Muizés i kes régra ki kes xéfi di relijion ta inxinaba. Es tinha régra sobri kumida, sirkunsizon i sobri modi ki es ta trataba kes otu algen ki ka éra judeu. Má, dipôs ki Jizus móre, Jeová ka fika ta seta más kes sakrifisiu ki es ta ofereseba na ténplu. Ka éra fásil pa kes judeu ki bira kriston mudaba ses manera di faze adorason. (Ebr. 10:1, 4, 10) Foi difísil ti pa kes kriston ki tinha un fé fórti, sima Pedru, faze kes mudansa. (Atus 10:9-14; Gál. 2:11-14) Pamodi kes krénsa novu di kes kriston, kes xéfi di relijion kumesa ta pirsigi-s.

5. Ku kuzê ki kes kriston meste tomaba kuidadu?

⁵ Kes kriston na Judea pasa pa pirsigison di dôs grupu di algen. Primeru, kes xéfi di relijion ta atxaba ma dja es biraba kóntra relijion di judeus. I alguns kriston ta flaba ma es debe kontinuaba ta sigi lei di Muizés, talvês pamodi es ka krê sérba pirsigidu. (Gál. 6:12) Kuzê ki djuda kes kriston mante lial pa Jeová?

6. Kuzê ki Paulu insentiva se irmons ku irmans pa faze? (Ebreus 5:14–6:1)

⁶ Na kel karta ki Paulu skrebe pa se irmons ku irmans, el insentiva-s pa es studa i midita na Palavra di Deus. (Lé Ebreus 5:14–6:1.) Paulu uza testus di kes livru di Bíblia ki skrebedu na ebraiku pa splika pamodi ki manera ki kristons ta adoraba Jeová éra mutu más midjór di ki manera ki judeus ta  adoraba El. a Paulu insentiva kes kriston pa konxeba i intendeba dretu kes verdadi di Skrituras, asi pa es pode rekonheseba kes ensinu ki ka staba dretu i pa es negaba es.

7. Ki dizafius nu pode pasa pa el oji?

⁷ Sima kes kriston ebreu, oji nu ta atxa pesoas ki ta spadja informasons ô ideias ki ta bai kóntra leis di Jeová. Alguns algen ka ta konkorda ku Tistimunhas di Jeová, pamodi nu ta obi ku kuzê ki Bíblia ta inxina sobri séksu. Manera di pensa i di aji di mundu sta ta bira kada bês más diferenti di manera ki Deus ta pensa. (Pro. 17:15) Pur isu, é txeu inportanti nu rekonhese kes manera di pensa mariadu i ivita-s. Nu ka debe dexa ningen ki ta faze-nu opozison pô-nu ta perde koraji i para di sirbi Jeová. — Ebr. 13:9.

8. Kuzê ki pode djuda-nu kontinua ta bira un sérvu di Jeová maduru?

⁸ Paulu insentiva kes kriston ebreu pa es biraba maduru i nos tanbê nu meste faze mésmu kuza. Kel-li ta inklui studa Bíblia, asi pa nu pode konxe Jeová i se manera di pensa midjór. Nu meste kontinua ta faze kel-li ti mésmu dipôs ki nu da nos vida pa Jeová i nu batiza. Ka ta inporta kantu anu ki dja nu ten ta sirbi Jeová, nu meste kontinua ta lé i studa Bíblia tudu dia. (Sal. 1:2) Un bon rotina spritual ta fortalese nos fé, ki é kel kualidadi ki Paulu fla kes kriston ebreu ma es meste tinha. — Ebr. 11:1, 6.

“NOS É DI KES KI TEN FÉ PA SALVA NOS VIDA”

9. Pamodi ki éra inportanti pa kes kriston ebreu tinha un fé fórti?

⁹ Kes kriston ebreu meste tinha un fé fórti pamodi kel-li ta ba djudaba es salva ses vida óras ki grandi tribulason kumesaba na Judea. (Ebr. 10:37-39) Jizus dja flaba kes kriston ma óras ki trópas serkaba Jiruzalen, es tinha ki fujiba di la i baba pa montanhas. Tudu kes kriston ki ta moraba déntu di Jiruzalen i na kes lugar pértu di Jiruzalen tinha ki obiba ku kel konsedju li. (Luk. 21:20-24) Óras ki trópas ta atakaba kes algen ki ta moraba na kes lugar pértu di Jiruzalen, es ta kustuma baba pa déntu di sidadi pamodi kes muralha ta protejeba es. Fuji pa montanhas ta parseba ma éra un órdi ki ka ta fazeba sentidu. Pur isu, es meste tinha un fé fórti pa es obiba ku kel órdi di Jizus.

10. Kuzê ki un fé fórti ta ba poba kes kriston ta faze? (Ebreus 13:17)

¹⁰ Kes kriston ebreu tanbê meste kunfiaba na kes algen ki Jizus staba ta uza pa da orientason pa kongregason. Kes algen ki ta tomaba kónta di kongregason, talvês da kes kriston orientason sobri ki ténpu ki es debe fujiba i modi ki es debe fazeba kel-la. (Lé Ebreus 13:17.) Kes palavra gregu ki uzadu na Ebreus 13:17 pa “obi ku”, krê fla ma un algen ta xinti vontadi di obi pamodi el ta kunfia na kel algen ki sta ta da kel orientason. Kel-li ta involve más di ki sô obi kel algen ki sta ta da-nu orientason sô pamodi el ten autoridadi. Kes kriston  ebreu meste prende kunfiaba na kes ansion i sigiba ses orientason antis di grandi tribulason kumesaba. Si duránti ténpu di pas kes kriston sigiba orientason di kes ki ta tomaba kónta di kongregason, ta fikaba más fásil pa es fazeba kel-li na ténpus difísil.

11. Pamodi ki oji é inportanti kristons ten un fé fórti?

¹¹ Sima kes kriston ebreu, oji nos tanbê nu meste ten fé. Nu sta ta vive na un ténpu ki maioria di pesoas ka ta kridita ma fin di kel mundu li sta kuazi ta txiga. Ti mésmu es ta faze-nu trosa pamodi nu ta kridita na kel-li. (2 Ped. 3:3, 4) Sikrê Bíblia ta fla-nu alguns kuza ki ta ba kontise na grandi tribulason, ten txeu kuza ki nu ka sabe. Nu meste ten serteza ma fin ta ben na ténpu sértu i óras ki kel-li kontise Jeová ta ba kuida di nos. — Hab. 2:3.

12. Kuzê ki ta ba djuda-nu salva duránti grandi tribulason?

¹² Tanbê, nu meste bira nos kunfiansa más fórti na “skravu fiel i prudenti”, ki Jeová sta ta uza pa gia-nu oji. (Mat. 24:45) Óras ki grandi tribulason kumesa nu pode ben resebe orientasons ki ta ba salva nos vida, sima kes kriston ebreu talvês resebe kantu ki trópas di Roma serka Jiruzalen. Nton, gósi é ténpu di nu bira nos kunfiansa más fórti na orientason di kes algen ki Jeová skodje pa gia-nu. Si nu ka kunfia i obi ku ses orientason gósi, ta ba ser difísil obi ku kes orientason ki nu ta ba resebe duránti grandi tribulason.

13. Pamodi ki kes kriston mesteba di kel konsedju ki sta na Ebreus 13:5?

¹³ Timenti kes kriston ebreu staba ta spera un sinal pa es fuji, es meste ivitaba “amor pa dinheru” i kontinuaba ku un vida sinplis konsentradu na sirbi Jeová. (Lé Ebreus 13:5.) Alguns di es dja sufreba pamodi fómi i pobréza. (Ebr. 10:32-34) Enbóra antis es staba dispostu na infrenta kes difikuldadi pamodi notísias sábi, alguns di es talvês kumesa ta sforsa pa ten más dinheru pa proteje-s di prigu i di pobréza. Má dinheru ka ta salvaba ses vida, óras ki Jiruzalen ba sérba distruídu. (Tia. 5:3) Na verdadi, pode sérba más difísil pa kes algen ki ta amaba kuzas material fujiba i dexaba ses kaza i kuzas ki es tinha pa tras.

14. Modi ki ten un fé fórti ta afeta disizons ki nu ta toma sobri kuzas material?

¹⁴ Si nu ten un fé fórti ma ka ta dura Jeová ta ben distrui kel mundu mau li, nu ka ta atxa ma ten más dinheru ô kuza material é más inportanti. Na grandi tribulason dinheru ka ta ba ten ninhun valor. Bíblia ta fla ma pesoas ta ba ‘lansa ses prata na rua’, pamodi es ta ba da kónta ma ‘nen ses prata, nen ses oru ka ta ben pode salva-s na dia di raiba di Jeová.’ (Eze. 7:19) Envês di nu konsentra na ganha más dinheru nu meste toma disizons ki ta djuda-nu ten un vida sinplis i ikilibradu. Nu ka ta mostra sabedoria si nu gasta dinheru más di ki kel ki nu ten i gasta ténpu dimás ta kuida di kes kuza material ki nu ten. Tanbê, nu ten ki toma kuidadu pa kes kuza material ki nu ten ka bira kes kuza más inportanti na nos vida. (Mat. 6:19, 24) Sima fin di es mundu sta ta fika más pértu nu ten ki skodje si nu ta kunfia na Jeová ô na kes kuza material ki nu ten.

 “NHOS MESTE AGUENTA FIRMI”

15. Pamodi ki éra inportanti pa kes kriston ebreu aguentaba firmi?

¹⁵ Kristons na Judea meste aguentaba firmi na ses sirvisu pa Jeová pamodi situason na Judea sta ba fikaba más piór. (Ebr. 10:36) Enbóra txeu kriston ebreu dja pasaba pa txeu pirsigison na pasadu, txeu di es prende verdadi duránti un ténpu di pas. Paulu lenbra kes kriston ma enbóra dja es sofreba txeu, ti inda es ka sofreba sima Jizus ki sufri ti móre. (Ebr. 12:4) Txeu judeu fika xatiadu i violéntu pamodi txeu algen staba ta bira kriston. Alguns anu antis, un monti di algen ataka Paulu kantu el staba ta prega na Jiruzalen. Más di 40 judeu “jura ta pidi ses kabésa praga, ma es ka ta kumeba nen es ka ta bebeba timenti es ka mataba Paulu.” (Atus 22:22; 23:12-14) Sikrê pesoas ta odiaba kes kriston i ta pirsigiba es, es tinha ki kontinuaba ta adora Jeová djuntu, ta pregaba notísias sábi i es meste kontinuaba ku un fé fórti.

16. Modi ki kel karta pa ebreus pode djuda-nu odja kes bon rezultadu ki nu pode ten óras ki nu ta pasa pa pirsigison? (Ebreus 12:7)

¹⁶ Kuzê ki ta ba djudaba kes kriston ebreu aguentaba kes pirsigison ki es ta ba pasaba pa el? Paulu krê djudaba kes kriston odja kes bon rezultadu ki es ta tinha si es aguentaba kes prubléma. El splika ma kantu kristons pasa pa prublémas, talvês Deus uza kes prubléma pa trena-s. (Lé Ebreus 12:7.) Kes prubléma pode djudaba es dizenvolve ô midjora kes kualidadi ki ta agradaba Jeová. Óras ki kes kriston ebreu ta konsentraba na kes bon rezultadu ki es ta tinha pamodi kes prubléma, éra más fásil pa es aguentaba firmi. — Ebr. 12:11.

17. Kuzê ki Paulu sabia sobri aguenta pirsigison?

¹⁷ Paulu insentiva kristons ebreu pa  ser korajozu i ka dizisti óras ki es ta pasaba pa prublémas. Apóstlu Paulu pode daba es bons konsedju sobri modi ki es ta aguentaba pirsigison. Dja ki antis el ta pirsigiba kristons el sabia kuzê ki es staba ta pasa pa el. Tanbê, el sabia modi ki es pode aguentaba pirsigison pamodi dipôs ki el bira kriston el pasa pa txeu pirsigison. (2 Kor. 11:23-25) Nton, Paulu pode papiaba ku kunfiansa sobri kuzê ki ta djudaba es aguenta firmi. El lenbra kes kriston ma óras ki es pasaba pa prublémas es meste kunfiaba na Jeová, ka na ses kabésa. Paulu pode flaba ku koraji: “Jeová é kel ki ta djuda-m. N ka ta xinti medu.” — Ebr. 13:6.

18. Modi ki sabe kuzê ki ta ben kontise na futuru pode djuda-nu aguenta pirsigison?

¹⁸ Gósi, alguns di nos irmon sta ta pasa pa pirsigison. Nu pode mostra nos amor pa es óras ki nu ta ora pa es. I alvês nu pode djuda-s ku kes kuza ki es ta meste. (Ebr. 10:33) Má, Bíblia ta mostra klaru ma “tudu kes ki krê vive ta sigi Kristu Jizus i ta adora Deus, tanbê ta pirsigidu.” (2 Tim. 3:12) Pamodi kel-li, nos tudu nu meste pripara pa kes prubléma ki nu ta ben pasa pa el. Gósi, nu meste kunfia na Jeová di tudu nos korason i ten serteza ma el ta ben djuda-nu aguenta kualker provason ki nu pode ben pasa pa el. Na ténpu sértu el ta ben traze alíviu pa tudu se sérvus fiel. — 2 Tes. 1:7, 8.

19. Kuzê ki nu pode faze pa nu pripara pa grandi tribulason? (Odja dizenhu.)

¹⁹ Di serteza kel karta di Paulu pa ebreus djuda kes kriston na ténpu di apóstlus pripara pa kel tribulason ki es staba ta ba pasa pa el. Paulu insentiva kes irmon pa studa Palavra di Deus ku kuidadu i intende-l midjór. Faze kel-li pode djudaba es sabe kal ki éra kes ensinu falsu i negaba es, pamodi kes ensinu pode prujudikaba ses fé. El insentiva-s pa es bira ses fé más fórti asi pa es pode sigiba lógu kes orientason di Jizus i di kes algen ki ta tomaba kónta di kongregason. I el djuda kes kriston omenta ses kapasidadi di aguenta firmi i odja ses prubléma sima un oportunidadi ki ses Pai, ki ta ama-s txeu, uza pa trena-s. Nos tanbê nu meste aplika kes konsedju di Bíblia asi nu ta konsigi kontinua ta mante lial ti fin. — Ebr. 3:14.