Perguntas ki leitoris ta faze

Di akordu ku kes lei klaru ki sta na Bíblia sobri sangi, kuzê ki Tistimunhas di Jeová ta atxa sobri tratamentus di saúdi ki ta uza ses própi sangi?

Envês di un sérvu di Deus disidi sô ku bazi na kuzê ki el ta atxa ma é midjór ô na kuzê ki dotoris ta fla, el debe pensa dretu na kuzê ki Bíblia ta fla. Kel-li é un asuntu entri el ku Jeová.

Jeová é kel ki da-nu vida. Pur isu, el disidi modi ki nu debe uza sangi. (Génesis 9:3, 4) Na kel Lei ki Jeová daba Israel na ténpu antigu, el mostra modi ki es debe uzaba sangi, pamodi el ta reprizenta vida. El fla: ‘Vida di un kriatura sta na se sangi, i é mi própi ki da nhos el pa nhos faze spiason pa nhos kabésa na altar.’ I si un ómi mataba un animal pa el pode kumeba el? Deus fla: ‘El debe lansa kel sangi i kubri-l ku téra.’ * (Levítico 17:11, 13) Jeová ripiti kel órdi li txeu bês. (Deuteronómio 12:16, 24; 15:23) Un livru * ki ta pâpia sobri Lei di Muizés ta fla: “Sangi ka debe guardadu, má el debe bazadu na txon asi pa ningen ka kume-l.” Ninhun israelita ka devia uzaba, guardaba i nen fikaba ku sangi di un otu kriatura. Dja ki kel vida é di Deus.

Kel obrigason di kunpri Lei di Muizés kaba kantu Misías móre. Má, kuzê ki Deus ta pensa sobri sangi ka muda. Spritu santu di Deus djuda apóstlus orienta kes kriston pa ‘ka uza sangi’. Es devia lebaba kel órdi li asériu. El éra inportanti sima ka faze konportamentu seksual mariadu ô adora imaji. (Atos 15:28, 29; 21:25) Dipôs di Sugundu Géra na Mundu Interu, bira normal da i toma sangi. Má, Tistimunhas di Jeová ntende ma faze kel-la ta baba kóntra kuzê ki Palavra di Deus ta fla. *

Alvês, un dotor ta insentiva un algen pa guarda se própi sangi uns simana antis di operason (doação autóloga pré-operatória, ô DAPO), asi si meste, el pode da kel algen kel sangi ki sta guardadu. Má, tra sangi pa guarda, da sangi i toma sangi ta bai kóntra kel ki Bíblia ta fla na Levítico i Deuteronómio. Nu ka debe guarda sangi, má nu debe baza-l, ki é sima ntrega Deus el. É verdadi ki gósi nu ka sta dibaxu di Lei di Muizés más. Má, Tistimunhas di Jeová ta ruspeta kes prinsípiu di Deus ki sta na kes lei i es sta disididu na ‘ka uza sangi’. Pur isu, nu ka ta da ningen nos sangi i nen nu ka ta guarda nos própi sangi pa dipôs es ben pô-nu el, pamodi el debe ‘bazadu’. Faze kel-li ta bai kóntra lei di Deus.

Otus tratamentu ô izamis ki ta nvolve sangi di kel própi algen pode ka bai kóntra kes prinsípiu di Deus. Pur izénplu, txeu kriston ta dexa pa es uza ses sangi pa faze análizi i dipôs kel sangi ta botadu. Tanbê, dotoris pode rekumenda otus tratamentu más konplikadu ki ta nvolve sangi.

Pur izénplu, ten un tratamentu ki txoma hemodiluição. Duránti un operason, un párti di sangi di kel algen ta bai pa un mákina. Omésmu ténpu, kel sangi ki fika na korpu di kel algen ta misturadu ku un líkidu. Dipôs, kel sangi ki sta na mákina ta torna podu na korpu di kel algen. Ten un otu tratamentu ki txoma recuperação intra-operatória de células. Duránti un operason, sangi ki kel algen perde ta podu na un mákina pa labadu i dipôs ta torna podu na kel algen. Na un otu tipu di tratamentu, sangi di kel algen ta mandadu pa un mákina, ki ta funsiona sima korason, pulmon ô rin. Dipôs, kel sangi ki sta na mákina ta torna podu na korpu di kel algen. Na un otu tipu di tratamentu, sangi ta mandadu pa un mákina ki txoma centrífuga, ki ta sipara pártis di sangi i ki ta tra kes párti ki ka sta dretu ô ki ta prujudika kel algen. Ô sangi ta siparadu, asi pa el podu na otu párti di korpu. Ten tanbê izamis, ki dotor ta tra un poku di sangi i el ta mistura ramedi ô algun otu kuza na el i dipôs el ta torna pô-l na korpu di kel algen.

Ten txeu tipu di tratamentu, i tanbê dotoris sta sénpri ta dizenvolve novus tipu di tratamentu. É ka nos responsabilidadi fla otus algen kuzê ki es debe faze na kada situason. Kada un di nos ten ki disidi modi ki nos sangi ta uzadu óras ki nu ta faze un operason, un análizi ô un otu tratamentu. Antis di nu seta un tratamentu, nu debe pergunta dotor kuzê ki sta ba kontise ku nos sangi duránti kel tratamentu. Dipôs, nu debe disidi kuzê ki nu ta faze di akordu ku nos konsénsia. (Odja kuadru.)

Nu debe lenbra ma nu promete Deus ma nu ta sirbi-l i ma nu ta ‘ama-l di tudu korason, di tudu alma, di tudu forsa i di tudu menti’. (Lucas 10:27) Pa Tistimunhas di Jeová é txeu inportanti obi ku Deus i mante un bon amizadi ku el. Nos Kriador ta fla-nu pa nu ten fé na sangi di Jizus. Bíblia ta fla: ‘Através di el [Jizus Kristu], nu ten salvason pamodi resgati, através di se sangi, sin, perdon di nos fadja’. — Efésios 1:7.

[Nótas di rodapé]

 [Kuadru/Fotus na pájina 31]

PENSA NA KES PERGUNTA LI

Si N ligadu na un mákina ki párti di nha sangi tradu fóra di nha korpu i fitxadu kel mákina duránti un ténpu pa kel sangi para di kóre, nha konsénsia ta atxa ma kel sangi inda ta faze párti di mi ô ma el debe ‘bazadu na txon’?

Si na algun tratamentu nha sangi tradu di nha korpu, fazedu algun kuza na el i dipôs el ta torna podu na nha korpu, nha konsénsia ta seta kel tipu tratamentu li?