JIZUS pâpia txeu bês sobri orason. Na se ténpu, kes xéfi di relijion judeu ta fazeba orason ‘na skina di ruas prinsipal’. Pamodi? Asi ‘pa ómis pode odjaba es.’ Es ta fazeba kel-li pamodi es kreba pa otus algen dimiraba es. Txeu di es ta fazeba orason kunpridu i ripitidu, sima si pa Deus obi nos orason nu meste ‘uza txeu palavra.’ (Mateus 6:5-8) Jizus djuda kes algen ki ten bon korason ntende ma kes tipu di orason li ka ta sirbi pa nada. Má tanbê el inxina-s modi ki es debe ora.

Jizus inxina ma nu debe ora pa nómi di Deus santifikadu, pa Se Reinu ben, i pa Se vontadi fazedu. Jizus tanbê inxina-nu ma nu pode pidi Deus pa el djuda-nu ku kuzas di dia-dia ki ta preokupa-nu. (Mateus 6:9-13; Lucas 11:2-4) Jizus uza ilustrasons pa inxina ma nu meste kontinua ta ora, ten fé i ser umildi, si nu krê pa Jeová obi nos orason. (Lucas 11:5-13; 18:1-14) I tanbê el inxina-nu através di se própi izénplu. — Mateus 14:23; Marcos 1:35.

Di sertéza kes instruson ki el da se disiplus djuda-s midjora kualidadi di ses orason. Má na kel últimu noti di Jizus na Téra, el inxina se disiplus kel lison más inportanti sobri orason.

Jizus pasa maior párti di se ténpu na se últimu noti li na Téra ta nkoraja se apóstlus fiel. Foi un bon oportunidadi pa el inxina-s un kuza novu sobri orason. El fla: ‘Ami é kaminhu, verdadi i vida. Ningen ka ta txiga na nha Pai si ka é através di mi.’ Más tardi Jizus faze-s un promésa ki nkoraja-s: ‘Tudu kuza ki nhos pidi na nha nómi, N ta ben faze-l, asi pa Pai dadu glória através di Fidju. Kalker kuza ki nhos pidi na nha nómi, N ta faze-l.’ Kuazi na fin di kel konbérsu el fla-s: ‘Ti gósi nhos ka pidi ninhun kuza na nha nómi. Nhos pidi i nhos ta dadu, asi pa nhos alegria ser konplétu.’ — João 14:6, 13, 14; 16:24.

Kes palavra li éra rei di inportanti. Un disionáriu di Bíblia fla ma kel-li “éra un mudansa grandi na nos manera di faze orason.” Jizus ka staba ta fla pa nu para di faze orason pa Deus i pa nu bira ta faze orason pa el. Envês di kel-li, el staba ta inxina un manera novu di faze orason pa Jeová.

Nu sabe ma Deus sénpri obi orason di se sérvus fiel. (1 Samuel 1:9-19; Salmo 65:2) Má, kantu Deus skodje israelitas pa ser se povu, kes ki krê pa Deus obiba ses orason tinha ki rekonhese ma Israel éra kel povu skodjedu di Deus. I más tardi na ténpu di Salumon, es tinha ki rekonhese ma ténplu éra kel lugar ki Deus skodje pa faze sakrifisiu. (Deuteronómio 9:29; 2 Crónicas 6:32, 33) Má simé, kel fórma di adorason li ka ta duraba pa tudu ténpu. Sima apóstlu Polu fla, kel Lei ki Israel dadu i kes sakrifisiu ki es ta fazeba na ténplu éra ‘un sónbra di bons kuza ki staba pa ben, envês di própi rialidadi di kes kuza’. (Hebreus 10:1, 2) Kel ki é rialidadi tinha ki fikaba na lugar di kel sónbra. (Colossenses 2:17) Dipôs di anu 33 D.J., un algen ka mesteba obi ku Lei di Muizés más pa el ser amigu di Deus. Envês di kel-li, pa algen ser amigu di Deus el tinha ki obi ku Jizus Kristu, ki éra kel ki Lei ta papiaba di el. — João 15:14-16; Gálatas 3:24, 25.

Jizus inxina-nu un manera midjór di ora pa Jeová. Gósi nu ten ki ora na nómi di Jizus pa Deus obi nos orason. Modi ki Jizus pode faze kel-li pa nos?

 Dja ki nos tudu nase pekador, ka ta nporta kuzê ki nu faze, nu ka ta konsigi di nos pa nos ser amigu di Deus. (Romanos 3:20, 24; Hebreus 1:3, 4) Má, Jizus da se vida perfetu pa el paga nos pekadu, asi pa kes ki mostra fé na se sakrifisiu pode ten un bon amizadi ku Deus. (Romanos 5:12, 18, 19) Nton, tudu kes ki krê ten un bon amizadi ku Jeová i ki krê ‘ten liberdadi pa pâpia’ ku el na orason, pode faze kel-li si es mostra fé na sakrifisiu di Jizus i es ora na se nómi. — Efésios 3:11, 12.

Nton, óras ki nu ta ora na nómi di Jizus, nu sta ta mostra fé peloménus di três manera: (1) El é ‘korderu di Deus’ i pamodi se sakrifisiu Deus ta púrdua nos pekadu. (2) Jeová resusita-l i oji el é ‘saserdóti prinsipal’ i el ta faze di tudu pa se sakrifisiu djuda-nu. (3) El é úniku ‘kaminhu’ ki ten pa nu txiga na Jeová através di orason. — João 1:29; 14:6; Hebreus 4:14, 15.

Óras ki nu ta ora na nómi di Jizus nu ta mostra ma nu ta ruspeta-l. I Jeová krê pa nu faze kel-li pamodi se Palavra ta fla pa ‘tudu duedju dobra dianti di nómi di Jizus. . .  i pa tudu língua rekonhese klaru dianti di tudu algen, ma Jizus Kristu é Sinhor, pa glória di Deus, ki é Pai.’ (Filipenses 2:10, 11) Má más inportanti inda, é ki ora na nómi di Jizus ta da glória pa Jeová, pamodi é el ki da se Fidju pa móre pa nos. — João 3:16.

Pa djuda-nu ntende modi ki papel di Jizus é inportanti, Bíblia ta uza txeu titlu i nómi pa pâpia di el. Kes titlu li ta djuda-nu ntende tudu kes kuza bon ki Jizus dja faze, ki el sta ta faze gósi i ki el ta ben faze na futuru. (Odja kuadru “ Kel papel inportanti di Jizus”) Na verdadi, Jizus dadu ‘kel nómi ki sta riba di tudu kes otu nómi’. * El dadu tudu autoridadi na Séu i na Téra. — Filipenses 2:9; Mateus 28:18.

Si nu krê pa Jeová obi nos orason nu ten ki faze-l na nómi di  Jizus. (João 14:13, 14) Má óras ki nu ta faze kel-li nu debe pensa na kuzê ki ora ‘na nómi di Jizus’ siginifika pa nos. Pamodi?

Pensa na kel izénplu li: Óras ki un algen di un inpréza ta manda un karta, normalmenti el ta skrebe un palavra ki ta mostra idukason ô ruspetu na fin. Sikrê kel algen tirmina se karta ku bondadi, kel-li ka krê fla ma el ta preokupa ku bo, el sta sô ta ser idukadu. Óras ki nu ta uza nómi di Jizus na orason, nu debe faze kel-li di korason, envês di uza-l sima un algen di un inpréza ta tirmina un karta. É simé ki nu ten ki ‘ora sénpri’ má nu ka debe ora sô pa ora, nu debe faze kel-li di ‘tudu korason.’ — 1 Tessalonicenses 5:17; Salmo 119:145.

Modi ki bu pode ivita fla kel frazi ‘na nómi di Jizus’ sô pa fla? Un di kes manera é pensa na kes kualidadi bunitu di Jizus. I pensa na kuzê ki dja el faze i inda el ta ben faze pa bo. Óras ki bu ora, agradese i lova Jeová pa kel manera spetakular ki el sta ta uza se Fidju. Sima bu ta ba ta faze kel-li, bu ta ten más kunfiansa na kel promésa ki Jizus faze: ‘Si nhos pidi nha Pai kalker kuza na nha nómi, el ta da nhos el.’ — João 16:23.