DI SERTÉZA dja bu repara ma kuazi tudu relijion ta da txeu valor pa igrejas ô ténplus bunitu i es ten óra pa faze orason. Má, Bíblia ta fla ma nu debe faze orason sô na alguns lugar i ten un óra sértu pa faze-l?

Bíblia ta mostra ma ten situasons ki nu debe faze orason. Pur izénplu, antis di Jizus kume ku se disiplus, el faze orason pa agradese Deus. (Lucas 22:17) I kantu se disiplus djunta pa adora Deus, es faze orason djuntu. Asi, es kontinua ta sigi un kustumu ki judeus dja tinha txeu ténpu ta fazeba na sinagógas i na ténplu na Jiruzalen. Deus kreba pa ténplu sérba ‘un kaza di orason pa tudu nasons’. — Marcos 11:17.

Óras ki sérvus di Deus ta djunta i es ta faze orason, Deus pode responde ses pididu. Deus ta fika kontenti óras ki kel grupu ta pensa di mésmu manera i ses orason ta mostra ma es ta sigi prinsípius di Bíblia. Kel orason pode ti poi Deus ta faze un kuza ki di otu manera el ka ta fazeba. (Hebreus 13:18, 19) Tistimunhas di Jeová sénpri ta faze orason na ses runion. Bu sta konvidadu pa bai un Salon di Reinu más pértu di bo pa bu obi ses orason.

Má, Bíblia ka ta fla na ki óra i na ki lugar ki nu debe faze orason. Na Bíblia, nu ta atxa izénplus di sérvus di Deus ki faze orason na óra i na lugaris diferenti. Jizus fla: ‘Óras ki bu ta faze orason, entra na bu kuartu, i dipôs ki bu fitxa pórta, faze orason pa bu Pai. Nton, bu Pai, ki ta odja sukundidu, ta rekonpensa-u.’ — Mateus 6:6.

Bu ka ta fika kontenti di sabe kel-li? Na verdadi bu pode pâpia ku kel algen más grandi di Séu ku Téra na kalker óra, bo sô, i ten sertéza ma el ta obi-u. É pur isu ki nu ka ta fika dimiradu kantu Jizus txeu bês ta tenta fikaba el sô pa faze orason. Un bês, el pasa un noti interu ta faze orason, talvês el sta ta djobeba orientason pa toma un disizon inportanti. — Lucas 6:12, 13.

Na Bíblia tanbê nu ta atxa otus ómi ku mudjeris ki faze orason kantu es tinha ki tomaba disizons inportanti i es sta ta pasaba pa prublémas difísil. Alvês es ta fazeba orason ku vós altu i alvês es ta fazeba orason déntu di es. Es ta fazeba orason na grupu i óras ki es staba es sô. Má un kuza inportanti é ki es ka ta dexaba di faze orason. Deus ti konvida se sérvus: ‘Nhos faze orason sénpri.’ (1 Tessalonicenses 5:17) El sta sénpri prontu pa obi orason di kes ki ta faze se vontadi. Kel-li é ka un konviti ki ta mostra ma Deus ta ama-nu?

Na es mundu ki nu sta vive ki pesoas ka ten fé, txeu ta pergunta si bale péna faze orason. Talvês bu pode pergunta: ‘Má orason ta djuda-m mê?’