N nase i N kria pértu di sidadi di Roma, na un zóna póbri. Nha vida éra difísil. N ka konxeba nha mai i mi ku nha pai nu ka ta daba dretu. N kria na rua.

Ku 10 anu N kumesa ta furta i ku 12 anu, N sai di kaza pa primeru bês. Nha pai bai buska-m alguns bês na skuadra di pulísia i el leba-m pa kaza. Ami éra un algen violéntu i tudu kuza ta xatiaba mi. N ta staba sénpri ta diskutiba ku pesoas. Ku 14 anu N sai di kaza i N ka volta más. N kumesa ta uza dróga i ta vive na rua. Dja ki N ka tinha lugar di durmi, N ta abriba kalker karu ki N atxaba i N ta durmiba la déntu. Dipôs di palmanhan, N ta djobeba algun lugar ki tinha agu pa N lababa.

N bira bon na furta. N ta furtaba algen ses bólsa, i di noti N ta furtaba na kalker kaza. N bira konxedu pa kuzas mariadu ki N ta fazeba. Pur isu, un grupu violéntu konvida-m pa N djunta ku es i N kumesa ta furta na banku. Dja ki mi éra violéntu, kes otu algen na grupu kumesa ta ruspeta-m. N ka ta baba ninhun lugar sen nha pistóla i ti N ta durmiba ku el dibaxu di nha trabiseru. Nha vida éra violénsia, dróga, furta, maus palavra i konportamentu seksual mariadu. Pulísia ta staba sénpri nha tras. N podu prézu txeu bês, i N fika ta entra i ta sai di kadia.

Un bês kantu N sai di kadia, N disidi ba vizita un di nhas tia. Má, N ka sabia ma el ku dôs di nhas primu bira Tistimunhas di Jeová. Es konvida-m pa N ba sisti ses runion. N disidi bai sô pa N odja éra modi. Kantu nu txiga na Salon di  Reinu, N fla-s ma N krê xintaba pértu di pórta, asi pa N pode odjaba tudu kenha ki sta ta entraba i saíba. I é klaru ki N staba ku nha pistóla.

Kel runion muda nha vida. É sima ki N staba na otu mundu. Kes algen ben kunprimenta-m ku róstu kontenti i es trata-m ku amor. Inda N ta lenbra klaru di ses bondadi i N odja ma es éra algen dretu. Kel-li éra un kuza diferenti di kel ki N staba abituadu!

N kumesa ta studa Bíblia ku Tistimunhas di Jeová. I kantu más N ba ta prende, más N odja ma N tinha ki mudaba nha vida. N sigi kel konsedju ki sta na Provérbios 13:20: ‘Ken ki ta anda ku algen ki ten sabedoria, ta ganha sabedoria, má ken ki ta sta djuntu ku algen ki ka ten juís, ta ten prublémas.’ N da kónta ma N tinha ki saíba di kel grupu violéntu. Ka foi fásil, má ku ajuda di Jeová N konsigi.

Tanbê N muda nha aparénsia. Ku txeu sforsu, N para di fuma sigaru i di uza dróga. N korta nha kabélu ki N tinha kunpridu, N dexa di uza brinku i di da maus palavra. Pa primeru bês, N kumesa ta kontrola nha vida.

N ka gostaba di lé, pur isu pa mi éra difísil studa Bíblia. Má sima N ba ta sforsa, N kumesa ta ama Jeová, i N xinti algun kuza ta muda déntu mi i nha konsénsia kumesa ta inkomoda-m. Txeu bês N ta pensaba kuzas mariadu sobri nha kabésa i N ta atxaba ma Jeová nunka ka ta purduaba mi pa tudu kes kuza mariadu ki N faze. Na kes óra la, kuzê ki ta konsolaba mi éra lé modi ki Jeová púrdua Rei Davidi kantu el faze pekadus gravi. — 2 Samuel 11:1–12:13.

Un otu kuza ki éra difísil pa mi éra pregason di kaza en kaza. (Mateus 28:19, 20) N tinha medu di atxaba algun algen ki N prujudikaba ô ki N fazeba algun kuza mariadu. Má poku-poku N ba ta perde kel medu. N kumesa ta xinti kel alegria di verdadi na djuda otus prende sobri nos Pai na Séu, ki sta prontu pa púrdua.

Konxe Jeová salva-m nha vida! Kuazi tudu kes koléga ki N tinha antis, sta mortu ô prézu. Má ami, N ten un vida rei di sábi i un speransa pa futuru. N prende ser umildi, obidienti i kontrola nha manera di ser, pur isu N konsigi ten bons amizadi. N ten un kazamentu filís ku Carmen, nha mudjer ki N krê txeu. I djuntu, nu ten txeu alegria na djuda otus prende sobri Bíblia.

Gósi N ten un trabadju onéstu, ki é faze linpéza. Alvês N ta trabadja na banku, má envês di furta N ta linpa!