Tudu anu, irmons na mundu interu ki ta sta na sirvisu spesial pa ténpu interu ta konvidadu pa Skóla di Jiliádi di Tori di Vijia, na Patterson, na Nova York. a Na kel skóla li, kes alunu ta trenadu pa kunpri ses diziginason na organizason di Jeová di midjór manera. Kel trenamentu ki es ta resebe ta djuda kongregason i filial na mundu interu bira más fórti.

 Jiliádi é un skóla ki ta forma alunus di mundu interu. Pur izénplu, turma nunbru 147 di 2019, tinha 56 alunu di 29 país. Ki ta konvidadu pa kel skóla, é kes irmon ki ta sirbi di maneras diferenti na sirvisu spesial pa ténpu interu sima betelitas, enkaregadus di grupu di kongregason, misionárius ô pionerus spesial.

 Kuzas pa kel skóla ta kumesa ta priparadu txeu ténpu antis di kel primeru aula. Pur izénplu, Dipartamentu di Viaji di Sédi Mundial ta kunpra kes pasaji di avion pa kes ki konvidadu pa skóla. Gastadu kuazi 100 kontu na kes viaji di bai ku ben di kada alunu di turma 147 di Jiliádi ki ben di otus país. Kes alunu ki ben di Ilhas Salumon tevi ki panha kuatu avion pa es txiga na Patterson i dipôs más três avion pa es volta pa kaza. Pa tudu, es viaja más di 35.400 kilómetru! Kes viaji kusta más di 200 kontu pa kada alunu. Pa gasta ménus dinheru, Dipartamentu di Viaji ta uza un prugrama di konputador pa atxa pasaji más baratu. I mésmu dipôs ki es faze rezérva di un pasaji, kel prugrama ta kontinua ta djobe duránti simanas ô alguns mês si présu di pasaji ta dixi más txeu inda. Dipartamentu di Viaji tanbê ta uza kes milha ki es ta ganha pa kunpra pasaji.

 Txeu alunu meste di vistu pa entra na Mérka. Pur isu, Dipartamentu di Lei di Sédi Mundial ta djuda kes alunu konsigi vistu. Ta gastadu kuazi 50 kontu ku vistu i ku otus taxa ku kada alunu.

 Modi ki nu ta tra pruvetu di trenamentu ki kes alunu ta resebe? Un ansion, ki txoma Hendra Gunawan, ki ta mora na Ázia i ki ta sirbi na un kongregason ki ten un kazal ki forma na Skóla di Jiliádi, fla: “Antis nos kongregason ka tinha ninhun pioneru fíksu. Má dipôs ki kel kazal ben di Jiliádi, ses bon atitudi i ses zelu poi txeu di nos irmon ta bira pioneru. Dipôs, un irman di nos kongregason bai Skóla pa Pregadoris di Reinu!”

 Un irmon, ki txoma Sergio Panjaitan, ki ta trabadja na un Betel na Ázia djuntu ku irmons ki forma na Skóla di Jiliádi, fla: “Kel trenamentu ki es resebe ka foi un benson sô pa es, má tanbê pa nos. Es prende txeu kuza! Má envês di es uza kes kuza pa txoma atenson pa ses kabésa, es ta pâpia ku otus algen di kuzê ki es prende. Kel-li ta nkoraja-nu i ta pô-nu ta nkoraja otus tanbê.”

 Modi ki organizason ta paga kes dispéza pa kel skóla li? Através di kontribuisons ki ta fazedu pa trabadju na mundu interu. Txeu di kes kontribuison li ta fazedu através di site donate.dan124.com. Obrigadu pa kontribuison ki nhos ta faze di korason, pa djuda kes skóla na mundu interu kontinua ta fazedu.