Na dumingu, dia 20 di novénbru di 2022, tirmina kel Runion di Nasons Unidu sobri mudansas di klima (COP27). Na kel runion es faze un akordu pa da dinheru pa kes país más póbri pa djuda-s lida ku kes dizastri ki ta kontise pamodi mudansas di klima. Má txeu algen ta atxa ma kel-li ka ta ben rezolve kes prubléma di mudansas di klima.

•   Na dia 19 di novénbru di 2022, António Guterres, ki é sekretáriu jeral di Nasons Unidu, fla: “N sta kontenti pamodi nu disidi djunta un dinheru pa djuda kes ki sta ta sufri pamodi mudansas di klima. Má, nu sabe ma sô kel-li ka ta txiga. . . Nos planéta sta na un situason gravi.”

•   Na dia 20 di novénbru di 2022, Mary Robinson, ki éra prizidenti di Irlanda i ki éra un reprizentanti di Nasons Unidu pa Direitus Umanu, fla: “Ka ta dura, téra ta ben pasa pa un grandi mudansa di klima ki ta ben afeta tudu algen.”

 Jóvens é kes ki sta más preokupadu ku futuru di nos planéta. Má, govérnus ta konsigi trabadja djuntu i kunpri ses promésa di faze algun kuza pa ivita kes dizastri pamodi mudansas di klima? Kuzê ki Bíblia ta fla?

 Bíblia ta fla-nu ma sikrê govérnus faze algun kuza pa midjora kes dizastri ki ta kontise pamodi mudansas di klima, es ka ta konsigi rezolve tudu prubléma. Odja dôs motivu ki ta mostra pamodi ki es ka ta konsigi:

•   ‘Kuzê ki é tórtu ka ta da pa bira-l rétu’. — Eclesiastes 1:15.

   Kuzê ki kel testu li krê fla: Govérnus ka ta konsigi faze tudu kuza ki es krê pamodi ómis ka kriadu pa governa ses kabésa. (Jeremias 10:23) Sikrê govérnus djunta, es ka ta konsigi rezolve prublémas di mundu, ka ta inporta ki sforsu ki es faze.

•   ‘Pamodi ómis ta ba ama sô ses kabésa, ta ama dinheru, ka ta krê djobe pas ku kunpanheru’. — 2 Timóteo 3:2, 3.

   Kuzê ki kel testu li krê fla: Bíblia dja flaba klaru ma txeu algen na nos ténpu ta preokupaba sô ku ses kabésa i ma es ka ta trabadjaba djuntu pa midjora vida di tudu algen.

 Futuru di nos planéta ka ta dipende di promésas ki govérnus ta faze. Deus dja ranja-nu un bon Governanti, ki é Jizus Kristu. Bíblia ta fla kel-li sobri el:

•   ‘Kel govérnu ta ben sta riba di se onbru. El ta ben txomadu di Grandi Konsedjeru, Deus Poderozu, Pai pa Tudu Ténpu, Prínsipi di Pas.’ — Isaías 9:6, nóta di rodapé.

 Jizus é Rei di Reinu di Deus, ô kel govérnu ki sta na séu. (Mateus 6:10) El ten puder i sabedoria, i el ten vontadi di ben kuida di nos planéta i di kes algen ki ta vive na el. (Salmo 72:12, 16) Jizus ta ben uza kel govérnu li na séu, pa ben kaba ku ‘kes ki sta distrui téra’ i tanbê el ta ben faze kuzas pa midjora nos planéta. — Apocalipse 11:18; Isaías 35:1, 7.

 Pa bu sabe más sobri kuzê ki ta ben rezolve kes prubléma ki ta kontise pamodi mudansas di klima, lé artigu “Kuzê ki Bíblia ta fla sobri mudansas di klima, futuru di téra i di tudu algen na mundu?”.