Na dia 24 di maiu di 2022, kontise un disgrasa na un sidadi pikinoti ki txoma Uvalde, ki ta fika na Texas, na Mérka. Di akordu ku jornal The New York Times, “un ómi armadu mata 19 mininu i dôs profesor . . . na skóla primária Robb.”

 Infilismenti, kes disgrasa li ta kontise txeu bês. Un jornal ki txoma USA Today fla ma sô na Mérka, “kontise uns 249 tiroteiu na skólas, na anu ki pasa. Désdi 1970 kel-li foi anu ki tevi más tiroteiu.”

 Pamodi ki kes disgrasa li ta kontise? Modi ki nu pode lida ku kes kuza li? Ten algun speransa ma violénsia ta ben kaba un dia? Bíblia ta da-nu respósta.

•    Bíblia ta txoma kel ténpu ki nu sta vive na el di ‘ténpu di fin’, undi ki txeu algen ka ta tinha ‘amor pa família’ i ta sérba ‘runhu’, ta faze kuzas kruel i violéntu. Kes algen li ta ben biraba ‘kada bês más piór’. (2 Timóteo 3:1-5, 13) Pa bu sabe más, lé artigu “Bíblia dja flaba modi ki pesoas ta ben pensaba i konportaba na nos ténpu?”

 Txeu algen ta pergunta: ‘Pamodi ki Deus ta dexa kuzas mariadu kontise, sima tiroteiu na skólas?’ Pa bu sabe respósta di Bíblia, lé artigu “Pessoas boas sofrem — por quê?”

•    ‘Kes kuza ki skrebedu antis, skrebedu pa nos instruson, asi, pa nu pode ten speransa através di konsolu ki nu ta resebe di Skrituras.’ — Romanos 15:4.

 Prinsípius di Bíblia pode djuda-u lida ku kel mundu violéntu li. Pa bu sabe más djobe revista Nhos korda! ku téma “A violência vai acabar algum dia?”.

 Alguns sujiston di modi ki pai ku mai pode djuda ses fidju lida ku kes notísia ki ta da algen medu sta na artigu “O impacto das notícias em seus filhos”.

•    ‘El ta libra-s di abuzu i di violénsia’. — Salmo 72:14.

•    ‘Es ta ben transforma ses spada na aradu, i ses lansa na kuzas pa poda. Nason ka ta labanta spada kóntra otu nason, nen es ka ta prende géra más.’ — Miqueias 4:3.

 Deus ta ben faze kel ki umanus ka ta konsigi faze. Se Reinu na séu ta ben kaba ku tudu arma i ku tudu violénsia. Pa bu sabe más sobri kuzê ki Reinu di Deus ta ben faze, lé artigu “O Reino de Deus vai trazer ‘abundância de paz’”.