Se mudjer diskubri se segredu. El pidi se mudjer diskulpa di korason. El promete ma el ka ta fazeba kel-li más i el ka faze-l duránti un ténpu, má dipôs el torna faze-l.

 Bu sta na un situason sima kel-li? Si kel-li sta ta kontise ku bo, bu meste intende modi ki bu ábitu di odja pornografia sta ta afeta bu mudjer i modi ki bu pode bandona kel ábitu li. a

Na kel artigu li

•  Kuzê ki bu debe sabe

•  Kuzê ki bu pode faze

•  Si bu maridu sta ta odja pornografia

 Pornografia pode kaba ku kazamentu. El pode poi kel mudjer, ki se maridu ta odja pornografia, ta xinti maguadu i dexa di kunfia na se maridu. b

 Un mudjer ki se maridu ta odja pornografia pode xinti kes kuza li:

•   Traison. Un mudjer ki txoma Sara fla: “É sima si nha maridu staba tudu óra ta faze adultériu.”

•   Sen valor. Un mudjer fla ma ábitu ki se maridu ten di odja pornografia ta pô-l ta xinti “feia i ku vergónha.”

•   Falta di kunfiansa. Un mudjer ki txoma Elena fla: “N ta diskunfia di kada pasu ki nha maridu ta da.”

•   Preokupason. Un mudjer ki txoma Katarina fla: “Preokupason ki N ten ku kel ábitu mariadu di nha maridu, ta toma kónta di nha vida.”

 Pensa na kel-li: Bíblia ta fla ma maridu debe ama se mudjer. (Efézius 5:25) El sta ta poi kel prinsípiu di Bíblia li na prátika, si el poi se mudjer ta xinti di un di kes manera ki dja nu pâpia di el?

 É ka fásil dexa di odja pornografia. Un mudjer ki txoma Steisi fla: “Nha maridu larga sigaru, dróga i bebida. Má ti inda el ka konsigi para di odja pornografia.”

 Si kel-li sta ta kontise ku bo, kes sujiston li pode djuda-u para ku kel ábitu li pa tudu ténpu.

•   Intende pamodi ki pornografia é mariadu. Pornografia pode poi un algen ta faze sô kel ki el ta atxa ma ta da-l prazer i el ta kaba ku amor, kunfiansa i lialdadi ki mestedu pa un kazamentu ser filís. Tanbê, el ta mostra falta di ruspetu pa Kriador di kazamentu, ki é Jeová Deus.

   Prinsípiu di Bíblia: “Tudu algen debe ruspeta kazamentu”. — Ebreus 13:4.

•   Ka bu kulpa otus pa kuzas ki bu ta faze. Ka bu fla: ‘Si nha mudjer ta daba mi más karinhu, N ka ta odjaba pornografia.’ É ka justu poi kulpa na bu mudjer i kel-li sô ta sirbi di diskulpa pa bu torna odja pornografia óras ki bu mudjer diziludi-u.

   Prinsípiu di Bíblia: “Má, kada un ta provadu óras ki se própi dizeju ta atrai-l i ta ingoda-l.” — Tiagu 1:14.

•   Pâpia di manera klaru ku bu mudjer. Un maridu ki txoma Kevin fla: “N ta pâpia ku nha mudjer tudu dia sobri modi ki N ta lida ku tentason. Kel-li ta djuda nha mudjer ka xinti ma N sta ta sukundi-l algun kuza.”

   Prinsípiu di Bíblia: “Nu krê konporta ku onestidadi na tudu kuza.” — Ebreus 13:18.

•   Mante sienti. Sikrê dja ten alguns anu ki bu ka sta faze kel-li más, bu pode ten un rekaída. Kevin, ki dja nu papiaba di el antis, fla: “N konsigi fika 10 anu sen odja pornografia i N staba konvensidu ma dja N largaba kel vísiu. Má kel prubléma inda staba la ta durmi, ta spera óra sértu pa ataka.”

   Prinsípiu di Bíblia: “Ken ki pensa ma el sta di pé pa el toma kuidadu pa el ka kai.” — 1 Koríntius 10:12.

•   Óras ki bu xinti tentadu, para i pensa. Enbóra bu ka ta konsigi ivita xinti un dizeju mariadu, bu pode skodje si bu ta faze-l ô nau. Kel dizeju ta pasa, talvês ti más rápidu, si bu prende pensa na otus kuza.

   Prinsípiu di Bíblia: ‘Kada un di nhos debe sabe modi ki el ta kontrola se própi korpu di manera santu i ku ónra. Nhos ka debe sigi paxon seksual diskontroladu.’ — 1 Tesalonisensis 4:4, 5.

•   Ivita situasons ki pode pô-u ta ten un rekaída. Un livru c fla: “Óras ki bu sta na un situason ki bu ka ta pode rezisti, é sima si bu sta sende un fós.”

   Prinsípiu di Bíblia: ‘Pa ninhun kuza mariadu ka toma kónta di mi.’ — Salmo 119:133.

•   Ka bu perde speransa. Pode leba algun ténpu, talvês ti alguns anu, pa bu ganha kunfiansa di bu maridu ô mudjer otu bês. Má txeu kazal konsigi faze kel-li.

   Prinsípiu di Bíblia: “Amor ten paxénxa”. — 1 Koríntius 13:4.