Óras ki bu ta abri Bíblia, bu ta repara ma el ten txeu palavra. Má ka bu dexa kel-li pô-u ta perde vontadi di lé Bíblia! Envês di kel-li, pensa ma Bíblia é sima un méza ki tene txeu tipu di kumida riba di el. Bu ka ta konsigi kume tudu kel ki bu sta odja. Má, bu pode skodje alguns kuza i kume ti ki bu fika satisfetu.

 Pa bu leitura di Bíblia djuda-u más txeu, bu meste konsentra na kuzê ki bu sta lé. Kel artigu li ta ben djuda-u faze kel-li.

Na kel artigu li

•  Pamodi ki bu meste konsentra na kuzê ki bu sta lé na Bíblia?

•  Modi ki bu pode faze bu leitura di Bíblia di un manera ki ta djuda-u más txeu?

•  Kuzê ki otus jóven ta fla

 Kantu más bu sforsa pa bu konsentra na bu leitura di Bíblia, más el ta djuda-u. Pensa na kel konparason li: si bu poi un sakinhu di xá déntu di agu kenti i bu tra-l faxi, kel xá ta fika fraku. Má si bu dexa-l más ténpu, kel xá ta fika más fórti.

 Mésmu kuza ta kontise tanbê ku leitura di Bíblia. Envês di bu lé Bíblia faxi, tra ténpu pa bu pensa na kuzê ki bu sta lé. É kel-li ki kel skritor di Salmo 119 faze. El fla si sobri lei di Deus: ‘N ta pensa txeu na el dia interu.’ — Salmo 119:97.

 É klaru ki kel-li ka krê fla ma bu meste tra un dia interu pa bu lé i pensa na Bíblia. Kuzê ki nu ta prende é kel-li: Kel salmista tra ténpu pa el pensa na Palavra di Deus. Faze kel-li djuda-l toma bons disizon. — Salmo 119:98-100.

 “Un bês nha mai fla-m: ‘Bu ten 7 dia pa simana, i duránti un simana bu ta faze txeu kuza pa bo. Pamodi ki bu ka ta tra algun ténpu pa Jeová? Bu ka ta atxa ma kel-li é justu?’” — Melanie.

 Óras ki bu ta pensa na prinsípius di Bíblia, bu ta sta más priparadu pa bu toma bons disizon. Pur izénplu, el ta djuda-u óras ki bu sta skodje bus amigu ô óras ki bu sta pasa pa un tentason pa bu faze un kuza mariadu.

•   Faze un planu. Un jóven ki txoma Júlia fla: “Faze un prugrama di leitura di Bíblia. Disidi kuzê ki bu ta lé, ki óra ki bu ta lé i na undi ki bu ta lé.”

•   Djobe un bon anbienti. Un jóven ki txoma Gianna fla: “Djobe un lugar kalmu. Tanbê, pâpia ku bus família sobri bu prugrama di leitura di Bíblia, asi pa es ka inkomoda-u óras ki bu ta lé.”

   Si bu sta uza un aparelhu iletróniku, pô-l di un manera ki bu ka ta odja kes mensájen ta entra. Bu pode ti uza Bíblia na papel. Na verdadi, alguns piskiza ta mostra ma lé un publikason na papel pode djuda-u intende más faxi kuzê ki bu sta lé. Má, pode ser más difísil konsentra óras ki bu ta lé na un aparelhu iletróniku.

   “N ta atxa ma bu ta distrai txeu óras ki bu ta lé na un aparelhu iletróniku. Mensájen ta fika ta entra, bataria ta fika fraku ô internet ta para di funsiona. Má ku livru na papel, N ka ta preokupa ku kes kuza li. Úniku kuza ki N ta meste é lus pa N odja klaru.” — Elena.

•   Faze orason antis. Pidi Jeová pa djuda-u intende, lenbra i tra pruvetu di kel párti di Bíblia ki bu sta ben lé. — Tiago 1:5.

   Pa bu mostra Jeová ma bu krê faze sima bu pidi na orason, faze txeu piskiza sobri kel stória ki bu sta lé. Modi ki bu pode faze kel-li? Si bu sta uza aplikativu JW Library ô bu sta lé Bíblia na internet, bu pode klika na un versíklu pa bu atxa otus piskiza i artigus sobri el.

•   Faze perguntas. Pur izénplu: ‘Kuzê ki kel-li ta inxina-m sobri Jeová? El ta mostra-m un kualidadi di Jeová ki N pode imita?’ (Efésios 5:1) ‘Ki lison ki N ta prende ku kel stória li i modi ki N pode aplika-l na nha vida?’ (Salmo 119:105) ‘N pode uza kel kuza ki N lé pa N djuda otus di algun manera?’ — Romanus 1:11.

   Tanbê pergunta bu kabésa: ‘Modi ki kel ki N lé sta ligadu ku téma di Bíblia?’ Kel pergunta li é rei di inportanti. Pamodi? Pamodi tudu kuza ki sta na Bíblia, di Génesis ti Apocalipse, sta ligadu ku kel téma prinsipal di Bíblia, ki é: modi ki Jeová ta ben santifika se nómi através di se Reinu ki sta na séu i prova ma é el ki ten direitu di governa i ma se manera di governa é kel midjór ki ten.