Bu pai ku bu mai ta dexa-u uza redi sosial? Si es ta dexa-u, kel artigu li ta ben djuda-u na três kuza inportanti.

Na kel artigu li

•  Modi ki redi sosial sta ta afeta nha ténpu?

•  Modi ki redi sosial sta ta afeta nha sónu?

•  Modi ki redi sosial sta ta afeta kuzas ki N ta xinti?

•  Kuzê ki otus jóven ta fla

 Sta na redi sosial é sima monta un kabalu ki ka ta para kétu. Ô bu ta kontrola-l ô é el ki ta kontrola-u.

 “N ta krê pasa ‘sô uns minutu’ na redi sosial, má N ta pasa óras na el! Redi sosial pode poi algen ta fika visiadu i perde monti ténpu.” — Joana

 Bu sabia? Redi sosial ta poi algen visiadu pamodi el fazedu pa kel-la própi. Kes algen ki ta kria redi sosial sabe ma óras ki txeu algen ta uza-l i ta gasta txeu ténpu na el, kes inpréza ta paga más dinheru pa poi publisidadi na el.

 Pensa na kel-li: ‘Txeu bês N ta perde ténpu ta djobe kuzas na redi sosial? N pode uza párti di kel ténpu li pa faze kuzas ki ten más valor?’

 Kuzê ki bu pode faze. Poi limiti na kantu ténpu ki bu ta gasta na redi sosial i ruspeta kel limiti.

 “N ta poi nha telemóvel di manera ki el ta dexa-m uza alguns aplikativu sô duránti kel ténpu ki N marka. N faze kel-li duránti algun ténpu i el djuda-m ser más ikilibradu na kantu ténpu ki N ta gasta na uza redi sosial. Asi, N ka ta perde txeu ténpu na el.” — Tina.

 Konsedju di Bíblia: “Uza ténpu di midjór manera”. — Efézius 5:16.

 Maioria di studiozus ta fla ma jóvens meste durmi peloménus 8 óra di sónu tudu noti. Má txeu jóven sta ta durmi ménus ténpu. Un di kes kuza ki sta ta poi kel-li kontise é uza redi sosial.

 “N ta djobe nha telemóvel antis di N ba deta. Má N ta gasta txeu óra ta djobe kuzas na redi sosial. Kel-li é un ábitu mariadu ki N sta tenta kaba ku el.” — Maria.

 Bu sabia? Óras ki nu ka ta durmi kel ténpu ki nos korpu meste, nu pode fika preokupadu i tristi. Dotora Jean Twenge fla ma un di kes motivu prinsipal ki ta poi algen ka ta xinti dretu i kontenti é pamodi es ka ta durmi kel ténpu ki ses korpu ta meste. Tanbê el fla ma si duránti txeu ténpu, bu ka durmi kel ki bu korpu ta meste “pode ser difísil bu pensa di manera klaru i bu xinti kontenti.” a

 Pensa na kel-li: ‘Kantu ténpu N ta durmi tudu noti?’ ‘N ta fika ta djobe na redi sosial na óra ki N debe tenta relaxa i pripara pa N ba durmi?’

 Kuzê ki bu pode faze. Di noti, dexa bus aparelhu iletróniku lonji di bu kuartu. Sénpri ki ta da, para di djobe na aparelhus iletróniku dôs óra antis di bu ba deta. Si bu meste un alarmi pa djuda-u korda di palmanhan, pensa na ranja un ki ka é na telemóvel ô na tablet.

 “Alvês N ta fika ti más tardi ta mexe na nha telemóvel, má kel-li é un prubléma ki N sta tenta midjora. N krê bira más maduru i kel-li krê fla bira más responsável. N meste ba deta más sédu pa N pode sta dretu na kel otu dia.” — Jeremy.

 Konsedju di Bíblia: “Djobe dretu kuzê ki é más inportanti”. — Filipensis 1:10.

 Na un piskiza ki fazedu, kuazi metadi di mininas na liseu ki partisipa, fla ma “txeu bês es ta xinti tristi i sen speransa.” Un di kes kuza ki talvês ta pô-s ta xinti si é sta na redi sosial. Dotor Leonard Sax fla: “Si bu pasa txeu ténpu na redi sosial ta konpara ku otus algen talvês bu ten más xansi di fika tristi”. b

 “Oji txeu jóven ta konpara ses kabésa ku otus. I ku redi sosial é más fásil faze kel-li. Bu pode pasa óras ta djobe fotus ki otus algen poi i pensa ma es sta ta divirti más ki bo.” — Phoebe.

 Bu sabia? Redi sosial pode djuda-u pâpia ku bus amigu, má é ka mésmu kuza ki pâpia ku es róstu ku róstu. Dotor Nicholas Kardaras fla: “Óras ki nu ta pâpia ku otus algen na nos aparelhu iletróniku, nu ka ta xinti kontenti sima óras ki nu ta pâpia ku es róstu ku róstu. Kel-li ta kontise pamodi nu ta meste sta djuntu ku otus algen.” c

 Pensa na kel-li: ‘N ta xinti mi sô dipôs di odja kuzê ki nhas amigu sta ta faze?’ ‘Nha vida ta parse infadadu óras ki N konpara-l ku fotus ki nhas amigu ta poi na redi sosial ki ta parse ma ses vida é sábi?’ ‘N ta fika dizanimadu óras ki N poi algun kuza na redi sosial i poku algen ô ningen ka mostra ma es gosta?’

 Kuzê ki bu pode faze. Tenta pasa alguns dia, un simana ô ti un mês sen uza redi sosial. Pasa más ténpu djuntu ku bus amigu ô txoma-s pa tilifóni. Djobe si duránti kel ténpu ki bu ka sta uza redi sosial si bu ta xinti ménus preokupadu i más kontenti.

 “Óras ki N ta uza redi sosial, N ta konsentra dimás na kuzê ki otus algen sta ta faze. Dipôs ki N paga nhas kónta na redi sosial, N xinti sima si N tra un pézu di nha onbru i N pasa ta ten ténpu pa faze kuzas di más valor.” — Briana.

 Konsedju di Bíblia: “Pa kada un presta atenson na kuzê ki el ta faze, asi el ta ten motivu pa fika kontenti sô ku se kabésa, sen konpara ku otu algen.” — Gálatas 6:4.