Pamodi koronavírus sta ta afeta mundu interu i Tistimunhas di Jeová ta omenta ses atividadi na ténpu di Komemorason, kada bês más txeu algen sta ta bai pa nos site jw.org pa es atxa konsolu, informasons di Bíblia i notísias. Na mês di marsu, mutu más algen vizita nos site di ki na febreru, i nunbru di pididu di studu di Bíblia txiga na kel pontu más altu.

Kel nunbru di algen ki ta vizita nos site tanbê kumesa ta omenta kantu ki koronavírus kumesa ta spadja na mundu. Na febreru, tudu dia ta tinha uns dôs milhon di algen ta vizita site, má kel-la é un nunbru normal na kes otu mês. Na marsu, kel nunbru omenta pa más di três milhon di algen tudu dia i na kes dia ki podu notísias novu sobri koronavírus kel nunbru omenta pa más di kuatu milhon i meiu. Na dia 7 di abril di 2020, ki éra dia di Komemorason, más di 7 milhon di algen vizita nos site. Maioria di kes algen li odja prugrama di adorason di palmanhan i diskursu di Komemorason.

Irmon Clive Martin, ki é enkaregadu di Dipartamentu di prugramason di MEPS na Sédi Mundial di Tistimunhas di Jeová na Warwick, Nova York, fla: “Na ténpu di Komemorason txeu algen ta vizita jw.org pa es sabe dia di Komemorason i na undi ki el ta fazedu. Kel anu li, dja ki txeu algen ki ta mostra interesi ka ta konsigiba sta djuntu ku kongregason, nu poi diskursu spesial di 2020 i diskursu di Komemorason na más di 500 língua na site. Kes prugrama li odjadu ô diskaregadu milhons di bês. Kel nunbru grandi li di algen ki sta ta vizita site duránti es situason difísil na mundu interu, ta mostra papel inportanti ki jw.org ten na konsola i na da instruson di Bíblia ka sô pa Tistimunhas di Jeová, má tanbê pa un monti di otus algen.”

Ta da pa ntende pamodi ki txeu algen ki ta vizita nos site ta djobe informasons sobri saúdi i modi ki es pode ivita un duénsa i tanbê informasons sobri preokupason i fadiga. Kada bês más algen sta ta djobe kuzê ki Bíblia ta fla sobri kuzê ki ta kontise na ténpu di fin i sobri kes kuatu kabalu ki Apocalipse kapítlu 6 ta pâpia di es.

Otu kuza interesanti é ki nunbru di pididu di studu di Bíblia na internet omenta txeu. Na kes mês antis di marsu, uns 250 algen ta pidiba studu di Bíblia tudu dia. Duránti mês di marsu kes pididu omenta pa 350 tudu dia, ki ta da kuazi 11 mil pa mês. Na dia di Komemorason i na kel dia dipôs, pididu más di mil studu di Bíblia.

Jizus fla ma kes algen ki ten konsénsia di ses nisisidadi spritual ta sérba filís. (Mateus 5:3) Nu ta fika kontenti pamodi txeu algen sta ta djobe konsolu i ajuda spritual na Jeová i se organizason na es ténpu difísil ki nu sta vive. — 2 Coríntios 1:3, 4.