Désdi dia 1 di abril di 2022, Tistimunhas di Jeová torna volta ta sisti runions na Salon di Reinu. Kalker preokupason ki nos irmons ku irmans xinti, muda lógu pa kontentamentu, txoru di alegria i tanbê alegria di kanta kántikus di Reinu.

Pa alguns algen, kel-li foi kel primeru bês ki es bai pa Salon di Reinu.

Irmon Krzysztof Hoszowski, di Pulónia, fla: “Kel-li foi kel primeru runion ki N sisti na Salon di Reinu. N prende verdadi duránti koronavírus i irmons odja nha batismu na Zoom. Dja N sabia modi ki éra runion na Salon di Reinu pamodi dja N odjaba txeu vídiu sobri kel-li. N fika rei di sábi di xinti kel amor, alegria i bondadi ki irmons ta mostra.”

Na marsu di 2020, dipôs ki koronavírus kumesa, Tistimunhas di Jeová kumesa ta faze runion pa internet. Kes ki ka ta konsigi sisti runions na Salon di Reinu pode kontinua ta sisti pa internet.

Irmon Neil Campbell, di Edinburgu, na Skósia, fla: “Kantu N obi múzika i N kumesa ta kanta kel primeru kántiku, N fika txeu kontenti di sta djuntu ku nhas irmon otu bês. Kel-li foi primeru bês na dôs anu.”

Nu ta agradese Jeová pa kel prezenti bunitu ki el da-nu di torna volta ta sisti runions na Salon di Reinu. — Salmo 84:10.