Ideia mariadu: Tistimunhas di Jeová ka ta komemora Natal pamodi es ka ta kridita na Jizus.

 Verdadi: Anos é sigidor di Jizus. Nu ta kridita ma nu pode ten salvason sô através di Jizus. — Atus 4:12.

 Ideia mariadu: Nhos ta sipara famílias pamodi nhos ta inxina ma algen ka debe komemora Natal.

 Verdadi: Nu ta preokupa txeu ku famílias, i nu ta uza Bíblia pa djuda famílias bira más unidu ku kunpanheru.

 Ideia mariadu: Nhos ta perde kel “spritu di Natal” pamodi nhos ka ta faze kuzas pa otus i tanbê nhos ta perde kel anbienti di pas i union entri pesoas.

 Verdadi: Nu ta sforsa pa nu ser un algen ki gosta di da i ki ta mante pas ku otus algen tudu dia. (Provérbios 11:25; Romanus 12:18) Pur izénplu, nu ta faze nos runions i trabadju di pregason di akordu ku kel orientason di Jizus ki ta fla: “Nhos resebe di grasa, pur isu nhos da di grasa tanbê.” (Mateus 10:8) Tanbê, nu ta inxina ma Reinu di Deus é kel úniku speransa pa ten pas na téra. — Mateus 10:7.

•   Jizus ka manda-nu pa nu komemora se nasimentu, má se mórti. — Lukas 22:19, 20.

•   Kes apóstlu di Jizus i kes primeru disiplu ka ta komemoraba Natal. Ensiklopédia Barsa ta fla ma “kel bispu di Roma, ki txomaba Libériu, kumesa ta komemora Natal na anu 354”, más di 200 anu dipôs ki kel últimu apóstlu móre.

•   Ka ten nada ki ta prova ma Jizus nase na dia 25 di dizenbru. Bíblia ka ta fla na ki dia ki el nase.

•   Nu ta kridita ma Deus ka ta aprova Natal pamodi el sta ligadu ku relijion falsu. — 2 Coríntios 6:17.

 Txeu algen sabe ma Natal sta ligadu ku relijion falsu i ma el ka sta di akordu ku Bíblia. Má simé, es ta disidi komemora-l. Talvês kes algen li pode pergunta: “Pamodi ki kristons debe ten un atitudi diferenti na kel asuntu li? Kel-li é un kuza inportanti?”

 Bíblia ta insentiva-nu pa nu uza nos “kapasidadi di pensa” i toma nos própi disizons. (Romanus 12:1, 2) El ta inxina-nu da valor pa verdadi. (Juan 4:23, 24) Nton, enbóra nu ta preokupa ku kuzê ki pesoas ta pensa di nos, nu ta disidi sigi kes prinsípiu di Bíblia sikrê otus algen ta atxa ma nos é diferenti.

 Nu ta disidi ka komemora Natal, má simé nu ta ruspeta direitu ki kada algen ten di toma se própi disizon. Nu ka ta inpidi otus algen di komemora Natal.