Modi ki Tistimunhas di Jeová ta trenadu pa es faze ses trabadju di pregason?

TOKA

Tistimunhas di Jeová ta kontinua ta resebe trenu na tudu ária di ses vida, ki ta inklui ses trabadju di pregason. Pregason é kel trabadju ki Jizus manda ses sigidor faze ki é prega i inxina kes notísia sábi di Reinu di Deus. (Mateus 24:14; 28:19, 20) Nu ta resebe trenu na nos runion tudu simana i na nos kongrésu i asenbleia ki nu ta faze tudu anu. Tistimunhas di Jeová ki ten responsabilidadi na kongregason ô na organizason ta resebe más trenu na skólas spesial di Bíblia.

Na kel artigu li nu ta ben odja:

Ki trenu Tistimunhas di Jeová ta resebe?

Runion di kongregason. Tudu simana, nu ta sisti dôs runion na nos lugar di adorason ki ta txomadu Salon di Reinu. Normalmenti ta fazedu un runion na meiu di simana i kel otu na fin di simana. Kalker algen pode sisti i ka meste paga nada.

Runion di meiu di simana. Nu ta prende modi ki nu ta midjora nos leitura, nos manera di pâpia, di faze diskursu, di prega i inxina. Nu ta resebe kel trenu li através di diskursus, pártis ki algen ki ta sisti ta partisipa, dimonstrason i vídiu. Kel trenu li ta djuda-nu midjora nos manera di pâpia ku otus algen sobri Bíblia i di faze studus di Bíblia ku kes algen ki ten interesi. Tudu kes ki ta sisti runion pode tra pruvetu di kel trenu li. Má, kuza más inportanti é ki nos runion ta djuda-nu bira nos fé na Deus más fórti i omenta nos amor pa Deus i pa nos irmons.
Runion di fin di simana. Kel runion li ten dôs párti ki ta kumesa ku un diskursu ku bazi na Bíblia ki é priparadu spesialmenti pa kes algen ki é ka Tistimunha di Jeová. Na kel sugundu párti di runion ta studadu un artigu di revista Sentinéla a ku perguntas i respóstas. Kes artigu ta pâpia i ta splika alguns téma i prinsípius di Bíblia ki ta djuda-nu na nos trabadju di pregason i na nos vida pesoal.

Asenbleia i kongrésus. Tudu anu ten três runion grandi ki Tistimunhas di Jeová di txeu kongregason ta sisti djuntu. Na kes runion li txeu spesial ta fazedu diskursus, dimonstrasons, entrivista i vídius ki ta konsentra na un téma ku bazi na Bíblia. Sima nos runion di kongregason, asenbleia ku kongrésu ta omenta nos konhisimentu di Bíblia, ta djuda-nu midjora nos manera di prega i inxina kes notísia sábi. Na kes runion li tanbê tudu algen ta konvidadu pa sisti i ka ta pididu dinheru.

Skólas di Bíblia pa Tistimunhas di Jeová

Pa resebe más trenu, alguns Tistimunhas di Jeová ta konvidadu pa bai pa alguns skóla ki ten bazi na Bíblia. Kal ki é kes skóla li? Kal ki é obijetivu i kantu ténpu ki es ta dura? Ken ki pode sisti kel skóla?

Skóla pa Pioneru

Obijetivu: Trena pregadoris pa ténpu interu, ki ta txomadu pioneru, b pa midjora ses manera di prega i inxina. Kel kursu ta inklui pártis di perguntas ku respóstas, dimonstrason, diskursu i pártis ki ta mostra modi ki nu pode aplika kuzê ki nu prende na kel skóla.
Durason: 6 dias.
Ken ki pode sisti kel skóla li: Kes ki ten un anu di pioneru ta konvidadu pa sisti kel skóla li. Kes ki dja ten txeu ténpu ki es é pioneru i ki dja ten sinku anu ki ka kursa kel skóla li pode konvidadu pa sisti kel skóla li otu bês.

Skóla pa Pregadoris di Reinu

Obijetivu: Pa da kes pregador pa ténpu interu i ki ten spiriénsia más trenu. Kes studanti ta midjora inda más ses kapasidadi di prega i inxina i es ta studa asuntus di Bíblia di manera más profundu. Txeu di kes alunu ki ta forma na kel skóla li ta konvidadu pa ba sirbi undi ten más nisisidadi di pregadoris.
Durason: Dôs mês.
Ken ki pode sisti kel skóla li: Pionerus pode konvidadu pa sisti kel skóla li si es sta kualifikadu i si ses situason ta permiti pa es ba sirbi undi ten más nisisidadi.

Skóla pa Ansions di Kongregason

Obijetivu: Djuda ansions c kuida di ses responsabilidadi na kongregason sima inxina i pastora kongregason i omenta ses amor pa Deus i pa ses irmon. — 1 Pedru 5:2, 3.
Durason: Sinku dia.
Ken ki pode sisti kel skóla li: Kes irmon ki dja ten poku ténpu ki diziginadu pa ser ansion i kes ansion ku más spiriénsia ki dja ten sinku anu ki es ka kursa kel skóla li pode konvidadu.

Skóla pa Enkaregadus di Grupu di Kongregason i ses Mudjer

Obijetivu: Pa trena kes pregador ki ta viaja i ki ta txomadu di enkaregadu di grupu di kongregason d pa kuida di ses responsabilidadi más dretu. (1 Timótiu 5:17) Kel trenu li ta djuda kes ansion i ses mudjer ten más konhisimentu di Bíblia.
Durason: Un mês.
Ken ki pode sisti kel skóla li: Kes novu enkaregadu di grupu di kongregason i ses mudjer ta konvidadu pa sisti kel skóla li dipôs di un anu di diziginason. Dipôs di kada sinku anu es ta konvidadu otu bês pa es sisti kel skóla li.

Skóla pa Trabadju di Reinu

Obijetivu: Djuda ansions i ajudantis di kongregason e kuida di ses responsabilidadi di akordu ku situasons i nisisidadi di kel momentu. (2 Timótiu 3:1) Kel skóla li ta fazedu kuazi tudu anu.
Durason: Ta dipende, normalmenti un dia.
Ken ki ta sisti kel skóla li: Enkaregadus di grupu di kongregason, ansions i ajudantis di kongregason.

Skóla pa Sirvisu di Betel

Obijetivu: Djuda kes irmon ku irmans ki ta trabadja na Betel f faze ses trabadju dretu i djuda-s bira ses amor pa Deus i pa ses irmon más fórti.
Durason: Sinku dia i meiu.
Ken ki ta sisti kel skóla li: Kes algen ki ten poku ténpu ki es entra na Betel ta konvidadu. Kes algen ki dja ten txeu ténpu na Betel i ten sinku anu ki ka sisti kel skóla li pode konvidadu pa sisti otu bês.

Skóla di Jiliádi di Tori di Vijia

Obijetivu: Djuda kes studanti ten un amor más fórti pa Palavra di Deus i djuda-s aplika kuzê ki es prende. (1 Tesalonisensis 2:13) Kes irmon ku irmans fiel ki ta sisti kel Skóla di Jiliádi ta pasa ta djuda más txeu organizason di Jeová i trabadju di pregason ki ta fazedu na mundu interu. Kes irmon ki formadu na kel skóla li pode diziginadu pa trabadja na pregason ô na filial, na ses país ô na otu país.
Durason: Sinku mês.
Ken ki ta sisti kel skóla li: Filial ta konvida kes ki sta na sirvisu pa ténpu interu pa prenxe pitison pa kel skóla. Kel skóla li ta fazedu na Mérka na Betel di Patterson, na Nova York.

Skóla pa Ménbrus di Kumison di Filial i ses Mudjer

Obijetivu: Trena kes ménbru di Kumison di Filial g pa kuida di trabadju ki filial ta faze i kes atividadi ki irmons ku irmans ta faze na kel país ô na kes país ki kel filial ta toma kónta.
Durason: Dôs mês.
Ken ki ta sisti kel skóla li: Sédi Mundial di Tistimunhas di Jeová ta skodje kes ménbru di Kumison di Filial i ses mudjer pa sisti kel skóla ki ta fazedu na Betel di Patterson, na Nova York.

Kes trenu ki Tistimunhas di Jeová ta resebe ten bazi na kuzê?

Bíblia é sénpri kel livru prinsipal ki ta uzadu na trenu ki Tistimunhas di Jeová ta resebe. Nu ta kridita ma Bíblia ben di Deus i el ten kel midjór instruson pa tudu ária di vida di un sérvu di Deus. — 2 Timótiu 3:16, 17.

Tistimunhas di Jeová ten ki paga pa es trenadu?

Nau. Kel trenu é di grasa. Kes atividadi di Tistimunhas di Jeová é sustentadu ku kontribuison dadu di livri vontadi. — 2 Koríntius 9:7.

a Bíblia i nos ajuda pa studa Bíblia, ki ta inklui vídius, sta disponível na jw.org.

b Pioneru é un Tistimunha di Jeová batizadu, ki pode ser un ómi ô un mudjer ki ten bon konportamentu, i ki di se livri vontadi ta gasta un sértu nunbru di óra kada mês na trabadju di pregason.

c Ansions é ómis ki é sérvus di Jeová maduru ki ta inxina ku bazi na Bíblia i ki ta djuda i inkoraja povu di Jeová. Es ka ta pagadu pa faze kel trabadju li.

d Un enkaregadu di grupu di kongregason é un algen ki ta prega pa ténpu interu i ki kada simana ta vizita un kongregason diferenti. Kes kongregason ki el ta vizita ta faze párti di un grupu di kongregason. El ta inkoraja irmons ku irmans através di diskursu ku bazi na Bíblia i el ta sai na pregason djuntu ku es.

e Ajudantis di kongregason ta faze txeu trabadju ki ta djuda ses irmon ku irmans. Asi ansions ta ten más ténpu pa inxina i pastora kongregason.

f Betel é nómi di kes filial di Tistimunhas di Jeová. Kes irmon ki ta sirbi pa ténpu interu i ki ta trabadja la ta djuda na kes atividadi ki Tistimunhas di Jeová ta faze na tiritóriu di kel filial.

g Un Kumison di Filial é formadu pa três ô más ómi kualifikadu.

Modi ki kes trenu ta djuda Tistimunhas di Jeová?

“Pamodi N ten txeu vergónha, N ta atxaba difísil pâpia di Bíblia ku kes algen ki N ka konxe. Má, kel trenu ki N resebe na runion na meiu di simana djuda-m ten más kunfiansa i midjora nha manera di inxina. Tanbê N midjora nha manera ki N ta pâpia ku irmons i irmans na kongregason i na nha trabadju.” — Natasha, Mérka.
“Sisti kel Skóla pa Pregadoris di Reinu djuda-m dizenvolve kes kualidadi di Jeová sima amor, paxénxa i bondadi. Pamodi kel-li N xinti ma N bira un sérvu di Jeová midjór, un amigu i un vizinhu midjór. Kel skóla li inxina-m modi ki N ta faze piskiza na Bíblia i modi ki N pode splika Palavra di Deus di manera ki ta toka korason di algen.” — Stephen, Nijéria.
“Skóla pa Ansions di Kongregason djuda-m dizenvolve kel umildadi ki N meste pa N ser un ansion midjór. Kes diskursu mostra-m ma N meste sigi izénplu di Jizus.” — Luca, Itália.
“Skóla pa Trabadju di Reinu inxina-m pamodi ki é inportanti ser un algen ki otus pode xinti avontádi pa txiga na mi, ki ta mostra bondadi i ta resebe otus dretu. N prende ma óras ki N ta faze kuzas pa otus algen, N debe faze-l pamodi amor ka pa obrigason.” — Samuel, Reinu Unidu.
“Skóla di Jiliádi djuda-nu analiza nos kabésa ku bazi na kuzê ki nu ta prende na Palavra di Deus, ki é sima un spedju. (Tiagu 1:22-25) Di kel manera li, nu odja undi ki nu meste faze mudansa na nos manera di ser i na nos sirvisu pa Jeová. Tanbê nu prende pensa más na otus algen di ki pensa na nos kabésa i dexa amor gia-nu na tudu kel ki nu ta fla i nu ta faze.” — Elnathan i Princess, Filipinas.