Nau. Tistimunhas di Jeová é ka kóntra vasina. Pa nos, toma vasina é un disizon ki kada algen debe toma. Txeu Tistimunha di Jeová disidi toma vasina.

 Nu ta djobe kel midjór tratamentu di saúdi i nu ta da valor pa tudu kes kuza ki midisina sta ta faze pa ten ménus risku di nu panha kes duénsa gravi. Nu ta agradese tudu trabadju i sforsu ki kes algen ki ta trabadja ligadu ku saúdi ta faze, prinsipalmenti na kes ténpu más difísil.

 Tistimunhas di Jeová ta kolabora ku kes algen ki ta trabadja ligadu ku saúdi. Pur izénplu, désdi ki koronavírus kumesa, Tistimunhas di Jeová kontinua ta faze vídius na txeu língua i ta pô-s na jw.org, pa insentiva tudu algen pa sigi kes orientason di suguransa ki sta ta dadu. Kel-li ta inklui mante distánsia, ivita sta djuntu ku un monti di algen, fika di korenténa, laba mô, uza maskra i tanbê otus kuza ki autoridadis ta fla ô ta rekumenda pa nu faze. — Romanos 13:1, 2.

 Dja ten txeu anu ki publikasons di Tistimunhas di Jeová ta pâpia di kes prinsípiu li:

•   Tratamentu di saúdi é disizon di kada algen. — Gálatas 6:5.

   “[Kel revista li] ka ta rekumenda kalker tipu di ramedi ô tratamentu di saúdi ki nu debe faze i el ka ta da ninhun konsedju ligadu ku saúdi. Se obijetivu é mostra kuzê ki sta nvolvidu i dexa kada leitor tra se própi konkluzon i toma se própi disizon.” — Nhos korda!, 8 di febreru di 1987, na purtugês.

   “É bo ki ta disidi si bo ku bu fidju debe toma vasina ô nau.” — Nhos korda!, 22 di febreru di 1966, na purtugês.

•   Nu ta djobe tratamentu di saúdi pamodi nu ta da vida txeu valor. — Atos 17:28.

   “Tistimunhas di Jeová ta djobe diferentis tipu di tratamentu ki ten pa djuda-s ku ses prubléma di saúdi. Es ta da vida valor i es krê faze tudu kel ki es pode i ki sta di akordu ku Bíblia pa es vive pa más ténpu.” — Sentinéla, 15 di janeru di 1976, na purtugês.

   “Tistimunhas di Jeová ka ten ninhun prubléma na toma ramedi i faze tratamentus di saúdi. Es krê mante un bon saúdi i vive pa más ténpu. Na verdadi, alguns Tistimunha di Jeová é dotor, sima Lúkas ki vive na ténpu di apóstlus. . . . Tistimunhas di Jeová di sertéza ta da valor pa tudu trabadju i sforsu ki kes ki ta trabadja ligadu ku saúdi ta faze. Tanbê es ta agradese kes algen li pamodi es ta kuida di ses saúdi.” — Sentinéla, 1 di febreru di 2011, na purtugês.