“Si bu krê prende sobri Deus mê, kontinua ta studa Bíblia ku Tistimunhas di Jeová.” N fika spantadu di obi kel-la. Dja N tinha poku ténpu ta studa ku Tistimunhas di Jeová. Má pa bu ntende pamodi ki N xinti si, dexa-m konta-u un poku sobri nha vida.

 N nase na Quezaltepeque, un sidadi ki ta fika na El Salvador. Ami é sestu di kes 15 fidju di nha pai ku nha mai. Es tenta inxina-m ser onéstu i obi ku lei. Tanbê, Leonardo i otus Tistimunha di Jeová alvês ta baba pa nha kaza pa inxina-nu sobri Bíblia. Má N ka da valor pa kuzas ki es inxina-m i N toma disizons mariadu un tras di kel otu. Kantu ki N tinha 14 anu, N kumesa ta bebe bebida alkólika i ta uza dróga djuntu ku nhas amigu di skóla. Poku-poku nhas amigu ba ta para di bai skóla pa es podia faze párti di un grupu violéntu. N sigi ses mau izénplu. Nu ta pasaba nos vida na rua, ta iziji pa algen da-nu dinheru i nu ta furtaba pa paga nos vísiu.

 Kel grupu violéntu bira nha família. N ta atxaba ma N tinha ki ser lial pa es. Pur izénplu, un dia, dipôs ki un ménbru di nha grupu violéntu uza dróga, el kumesa ta briga ku un di nhas vizinhu. Timenti es staba ta briga, nha vizinhu konsigi pega-l i el txoma pulísia. N fika ku raiba, nton N kumesa ta kebra karu di nha vizinhu ku un pó pizadu, asi pa el podia larga nha amigu. Timenti N staba ta kebra tudu vidru i distrui kes otu párti di se karu, nha vizinhu pidi-m pa N para, má N ka obi ku el.

 Kantu N tinha 18 anu, nha grupu violéntu entra na géra ku pulísia. Kantu ki N staba kuazi pa bota-s un bonba, ki ta fazedu na kaza, el spludi na nha mô. N ka sabe modi ki kel-la kontise. Sô N ta lenbra di odja nha mô distruídu i dipôs N dismaia. Kantu ki N korda na ospital N da kónta ma N perde nha mô direita, ma dja N fikaba surdu di nha obidu direita i ma N staba kuazi ségu di nha odju direita.

 Sikrê ku tudu kel ki kontise ku mi, kantu ki N sai di ospital, N volta lógu pa nha grupu violéntu. Má poku ténpu dipôs, pulísia prende-m i es manda-m pa kadia. La nha amizadi ku nhas kolega di grupu bira más fórti inda. Nu ta fazeba tudu kuza djuntu dia interu ti ora di durmi. Nu ta tomaba kafé djuntu i nu ta kumesaba ta fuma padjinha djuntu tudu dia.

 Timenti N staba na kadia, Leonardo bai vizita-m. Kantu nu staba ta pâpia, el ponta dédu pa un tatuaji ki N tinha na nha brasu direita. El pergunta-m: “Bu sabe kuzê ki kes três tatuaji li siginifika?” N fla-l: “Klaru. É séksu, dróga i rock.” Má el fla-m: “Parse-m ma es krê fla ospital, kadia i mórti. Bu staba na ospital i gósi bu sta na kadia. Dja bu sabe kuzê ki ta ben dipôs.”

 Kel ki Leonardo fla-m mexe ku mi. El tinha razon. N staba ta koba nha própi kóba pamodi kel vida ki N ta lebaba. Leonardo konvida-m pa N studa Bíblia ku el i N seta. Kel ki N prende di Bíblia motiva-m pa N muda nha vida. Pur izénplu, Bíblia ta fla ma ‘maus koléga ta straga bons ábitu.’ (1 Coríntios 15:33) Nton, un di kes primeru kuza ki N tinha ki fazeba éra ranja novus amigu. Nton, N para di bai runions di nha grupu violéntu i N kumesa ta sisti runions ki Tistimunhas di Jeová ta fazeba déntu di kadia. Na kes runion N konxe un otu algen ki staba prézu, ki txoma Andrés, ki batiza i bira Tistimunha di Jeová déntu di kadia. El konvida-m pa nu toma kafé djuntu. Dipôs di kel-la, dja N ka ta kumesaba nha dia ta fuma padjinha. Má, mi ku Andrés nu ta papiaba sobri un testu di Bíblia tudu dia di palmanhan.

 Ménbrus di nha grupu violéntu da kónta faxi ma N staba ta muda. Nton, un di kes líder di grupu fla-m ma el mesteba pâpia ku mi. N fika ku medu. Éra kuazi inposível sai di un grupu violéntu. Pur isu, N ka sabia kuzê ki el ta fazeba mi óras ki el diskubriba kal ki éra nhas intenson. El fla-m: “Dja nu repara ma bu ka sta sisti nos runions más. Má bu ta sisti runions di Tistimunhas di Jeová. Kuzê ki bu krê faze?” N fla-l ma N kria kontinua nha studu di Bíblia i muda nha vida. N fika spantadu pamodi el fla-m ma kel grupu violéntu ta ruspetaba nha disizon si N provaba es ma N kreba ser un Tistimunha di Jeová di verdadi. Dipôs el fla-m: “Si bu krê prende sobri Deus mê, kontinua ta studa Bíblia ku Tistimunhas di Jeová. Nu ta spéra ma bu ta para di faze kuzas mariadu. Bu sta ta faze dretu. Bu sta na kel kaminhu sértu. Tistimunhas di Jeová pode djuda-u di verdadi. N ta studaba ku es na Mérka i alguns algen di nha família é Tistimunha di Jeová. Ka bu xinti medu. Kontinua asi.” Inda N staba ku medu, má omésmu ténpu N staba txeu kontenti. N agradise Jeová na nha korason. N xinti sima un pasu ki libertadu i N konsigi ntende palavras di Jizus: ‘Nhos ta konxe verdadi i verdadi ta liberta nhos.’ — João 8:32.

 Má, alguns di kes ki antis éra nhas amigu oferese-m dróga pa pô-m na prova. Pa N ser sinseru, alguns bês N kaba pa kai na tentason. Má ku ténpu, dipôs di faze txeu orason di korason, N konsigi vense nhas vísiu. — Salmo 51:10, 11.

 Dipôs ki N sai di kadia, txeu algen ta pensaba ma N ta voltaba pa kel vida ki N tinha antis, má N ka volta más. Envês di kel-la, N bai pa kadia txeu bês má pa N bai prega pa kes otu prézu kes kuza ki N prende na Bíblia. Nton, alguns di kes ki antis éra nhas amigu odja ma dja N mudaba di verdadi. Má infilismenti kes ki antis éra nhas inimigu ka kridita na nha mudansa.

 Un dia, kantu N staba na pregason ku un irmon, dirapenti uns algen di un grupu violéntu ki antis éra nhas inimigu fika na nos volta. Es staba armadu i es kria mataba mi. Ku jetu, má ku koraji kel irmon splika-s ma N ka staba ta faze párti más di grupu violéntu. Timenti kel irmon staba ta pâpia ku es, N tenta fika kalmu. Dipôs es sota-m i es aviza-m pa nunka más N ka entra na kel zóna. Kes ómi nbaxa ses arma i es dexa-nu bai. Bíblia muda nha vida di verdadi. Si éra antis N ta tentaba vinga. Má gósi N ta obi konsedju di Bíblia ki sta na 1 Tessalonicenses 5:15: ‘Nhos toma kuidadu pa ningen ka paga mal ku mal, má nhos sforsa sénpri pa ben di kunpanheru i di tudu algen.’

 Désdi ki N bira un Tistimunha di Jeová, N sforsa pa N ser un ómi onéstu. É ka fásil. Má ku ajuda di Jeová Deus, di konsedju di Bíblia i di apoiu di nhas novu amigus, N konsigi. Nunka más N ka krê torna faze kes kuza ki N ta fazeba antis. — 2 Pedro 2:22.

 Ami éra un ómi violéntu i xeiu di raiba. N ten sertéza ma gósi N ka ta staba bibu si N kontinuaba ku kel vida ki N tinha antis. Kel ki N prende di Bíblia transforma-m. N larga nhas vísiu. N prende mante pas ku kes ki antis éra nhas inimigu. (Lucas 6:27) I gósi N ten amigus ki ta djuda-m dizenvolve bons kualidadi. (Provérbios 13:20) N ten un vida filís i ku un obijetivu, ki é sirbi Deus ki sta prontu pa purdua-m tudu kes kuza mariadu ki N faze. — Isaías 1:18.

 Na 2006, N sisti Skóla pa Pregadoris di Reinu pa solteru. Alguns anu dipôs, N kaza ku nha mudjer ki N krê txeu i djuntu nu ta kria nos fidju-fémia. Gósi N ta pasa maior párti di nha ténpu ta inxina otus algen kes prinsípiu di Bíblia ki djuda-m muda nha vida. Tanbê mi é ansion na nha kongregason i N ta tenta djuda kes jóven pa ivita kes éru ki N faze kantu ki N tinha ses idadi. Gósi, envês di koba nha própi kóba, N sta ta konstrui un futuru ki ta dura pa tudu ténpu, ki é kel ki Deus ta promete na Bíblia.