Keti Bambangi ya Yehowa Ke Pusaka Bantu na Kusoba Dibundu?

TALA NA

Ve, beto ke salaka yo ve. Zulunalu na beto ya ntete-ntete Nzozulu ya Nkengi ke tuba nde: “Kupusa bantu na kingolo-ngolo sambu bo soba dibundu kele mbi.” a Beto ke buyaka kupusa bantu na kingolo-ngolo na kusoba dibundu sambu na bikuma yai:

Yezu pusaka ve bantu na kingolo-ngolo sambu bo ndima malongi na yandi. Yandi zabaka nde bantu fioti mpamba ta ndima nsangu na yandi. (Matayo 7:13, 14) Ntangu balongoki na yandi ya nkaka bulaka sakuba sambu na mambu yina yandi tubaka, yandi bikaka bo bo kwenda, yandi kangaka bo ve na ngolo sambu bo bikala.—Yoane 6:60-62, 66-68.
Yezu longaka balongoki na yandi nde, bo fwete pusa ve bantu na kingolo-ngolo na kukatuka na mabundu na bo. Na kisika ya kupusa bantu na ngolo na kundima nsangu ya mbote ya Kimfumu, yo lombaka nde balongoki na yandi kusosa bantu yina ta sepela ti nsangu yina.—Matayo 10:7, 11-14.
Kukatuka na dibundu sambu bo me pusa nge na ngolo kele ve mfunu ata fioti, sambu Nzambi ke ndimaka kaka lusambu yina me katuka na ntima.—Kulonga 6:4, 5; Matayo 22:37, 38.

Keti kisalu na beto ke vandaka ya kubenda bantu na dibundu na beto?

Yo kele kieleka nde beto ke longaka nsangu yina kele na Biblia tii “na kisika ya kuluta ntama ya ntoto.” Beto ke longaka yo “na meso ya bantu yonso mpi nzo na nzo,” na kulanda nsiku yina kele na Biblia. (Bisalu 1:8; 10:42; 20:20) Diaka kaka bonso Bakristu ya mvu-nkama ya ntete, bantangu ya nkaka bo ke fundaka beto nde, beto me fwa nsiku sambu beto ke benda bantu na kukukwisa na dibundu na beto. (Bisalu 18:12, 13) Kansi mambu yina bo ke fundudilaka beto kele ya luvunu. Beto ke pusaka ve bantu na ngolo na kundima malongi na beto. Kansi beto me zaba nde, beto fwete pesa bantu nzila ya kulonguka mambu yina ta sadisa bo na kubaka lukanu ya mbote.

Beto ke pusaka ve bantu na ngolo na kukatuka na mabundu na bo. Beto ke kotisaka mpi ve mambu ya politiki na mambu na beto ya dibundu. Beto ke pesaka mpi ve bantu bima sambu bo kwisa na dibundu na beto. Beto kele ve bonso bantu ya nkaka yina bo ke bingaka Bakristu, kansi mambu yina ya bo ke salaka ke fingisaka Kristu. b

Keti muntu kele ti nswa ya kusoba dibundu?

Profete Abrahami yambulaka dibundu yina bampangi na yandi vandaka kusambila

Ee, Biblia ke monisaka nde bantu kele ti nswa ya kukwenda na dibundu ya nkaka. Yo ke tubilaka bantu mingi yina buyaka kuvanda bantu ya dibundu yina bampangi na bo vandaka mpi yina, na luzolo na bo mosi, bakaka lukanu ya kusambila Nzambi ya kieleka. Ndambu ya bantu yango, bo yandi yai: Abrahami, Ruti, bantu ya nkaka ya Atene, mpi ntumwa Polo. (Yozue 24:2; Ruti 1:14-16; Bisalu 17:22, 30-34; Bagalatia 1:14, 23) Katula yo, Biblia ke monisa nkutu nde, muntu kele ti nswa ya kuyambula lusambu yina Nzambi ke ndimaka.—1 Yoane 2:19.

ONU ke monisaka nde nswa yina muntu kele ti yo ya kusoba dibundu kele nswa ya “me simba Banswa Yina Bantu Yonso na Ntoto Ke Vandaka ti yo (fondement du droit international relatif aux droits de l’homme).” Mukanda mosi (Déclaration universelle des droits de l’homme) ke monisa mpi ke ndima nde, konso muntu kele ti “kimpwanza ya kupona dibundu na yandi to mambu ya yandi ke zola kundima” mpi “ya kusosa, ya kubaka, mpi ya kusonga bantu ya nkaka bansangu mpi bangindu,” yo vanda yina me tala mambu ya dibundu. c Ya kieleka, banswa yina ke pesaka mpi muntu mukumba ya kuzitisa banswa yina muntu ya nkaka kele ti yo, ya kulanda kundima mambu yina yandi ke ndimaka mpi ya kubuya kundima bangindu yina yandi ke ndimaka ve.

Keti kana muntu me soba dibundu, yandi me finga ba-nkaka to binkulu ya dibuta?

Ve, yo fwete vanda ve mutindu yina. Biblia ke tubaka nde beto fwete zitisa konso muntu, ata yandi kele na nki dibundu. (1 Piere 2:17) Katula yo, Bambangi ya Yehowa ke zitisaka nsiku ya Biblia yina ke tubaka nde bantu fwete zitisa bibuti na bo, ata bo kele na inki dibundu.—Baefezo 6:2, 3.

Kansi, bantu yonso ve ke ndimaka mambu yai ya Biblia ke tubaka. Nkento mosi ya me yelaka na Zambie ke tuba nde: “Na bwala na beto, kana muntu me soba dibundu . . . Yo vandaka bonso nde yandi me sala kima mosi ya kukonda kwikama, bonso nde yandi me buya dibuta mpi bwala na yandi.” Nkento yai kutanaka ti diambu yai na ntangu ya yandi yantikaka kulonguka Biblia ti Bambangi ya Yehowa. Yandi vandaka toko na ntangu yina. Na nima, yandi bakaka lukanu ya kukatuka na dibundu na bo. Yandi ke tuba nde: “Bibuti na mono vandaka kulanda kusonga mono nde, bo ke wilaka mono makasi mpi nde mono ke pesaka bo mawa mingi. Yo vandaka kusala mono mpasi mingi sambu mono ke sepelaka mingi kana bibuti me ndima kima mosi ya mwana ke zola kusala. . . . Kupona kukangama na Yehowa na kisika ya kukangama na dibundu ya ba-nkaka ke zola ve kutendula nde, mono me buya dibuta na beto.” d

a Tala Nzozulu ya Nkengi ya Yanuari 1, 2002, lutiti 12, paragrafe 15.

b Mu mbandu na mvu 785 ya ntangu na beto, Charlemagne basisaka nsiku nde, konso muntu na mbanza Saxe ya me buya kubaka mbotika sambu na kukuma Mukristu, bo fwete pesa yandi ndola ya lufwa. Mbandu ya nkaka: mukanda mosi (Traité de Paix d’Augsbourg) yina basoda ya Kimfumu ya Roma tulaka diboko (signiature) na mvu 1555 ya ntangu na beto tubaka nde, konso mfumu ya distrike fwete vanda na dibundu ya Katolika to ya Bamisioni mpi bana ya bwala fwete vanda na dibundu na yandi. Bo vandaka kusonga bantu yina me buya kukota na dibundu yina na kukatuka na bwala.

c Bansiku mingi pesaka banswa ya kiteso mosi mu mbandu charte africaine des droits de l’homme et des peuples, Déclaration américaine des droits et devoirs de l’homme, Charte arabe des droits de l’homme oyo endimamaki na 2004, Déclaration des droits humains de l’ASEAN (Association des nations d’Asie du Sud-Est), la Convention européenne des droits de l’homme et le Pacte international relatif aux droits civils et politiques. Kansi ata bansi yina ke tubaka nde yo me pesaka bantu nswa yina, bansi yango yo mosi ke zitisaka ve kibeni mambu ya bo me tubaka.

d Yehowa kele zina ya Nzambi ya kieleka mutindu Biblia ke monisa yo.