Na Augusti 2014 na ntoto ya mvimba, Bambangi ya Yehowa kabulaka trakiti mosi sambu na kusiamisa bantu na kusadila jw.org. Yo salaka nde ntalu ya bantu yina ke kotaka na site yina kukuma mingi bambala kuluta 20 na ngonda yina; bantu bamilio 65 kotaka na site na beto. Na mvimba, kiteso ya bantu 10 000 lombaka kulonguka Biblia ya ofele na nzila ya site yina—bantu 67 na kati ya bantu 100 kuluta na bangonda yina me luta! Kampanie sadisaka bantu ya bisika yonso.

Mbangi ya Yehowa mosi na Canada pesaka Madeline mbote na ascenseur mpi songaka yandi trakiti ya kampanie, Inki Kisika Beto Lenda Baka Bamvutu na Bangiufula ya Mfunu ya Luzingu? Madeline tubaka nde yandi vandaka na balcon ya nzo na yandi mazono na mpimpa mpi yandi sambaka sambu Nzambi kusadisa yandi na kuzwa bamvutu na bangiufula yina. Na bilumbu me luta, yandi bingaka bantu ya mabundu mingi sambu na kulomba bo na kulonguka Biblia ti yandi, kansi ata muntu mosi ve kwisaka kutala yandi. Ntangu fioti na nima, yandi yantikaka kulonguka Biblia ti Bambangi ya Yehowa.

Na Philippines, Rowena solulaka ti bakala mosi ya Chine yina telamaka na ntwala ya restora mosi. Yandi pesaka yandi trakiti mpi tendudilaka yandi nde Bambangi ya Yehowa ke zola kusadisa bantu na kulonguka Biblia ya ofele.

Muntu yina tubaka nde yandi me monaka ntete ve Biblia. Masolo na bo pusaka yandi na kukwisa na lukutakanu mosi ya nene ya Bambangi ya Yehowa. Na nima yandi tubaka nde yandi ke zola kuzaba mambu mingi na Biblia mpi nde yandi me baka bangidika sambu na kubaka yo na site internet na beto.

Guillermo, Mbangi ya Yehowa ya baba yina ke zingaka na Espagne, kutanaka ti Jorge nduku na yandi ya ntama ya nzo-nkanda yina kele mpi baba. Jorge tubaka nde mama na yandi me katuka kufwa mpi nde yandi kele ti baketi-keti mpi bangiufula mingi. Guillermo pesaka yandi trakiti ya kampanie mpi tendudilaka yandi mutindu yandi lenda zwa bansangu ya ndinga ya bidimbu na jw.org yina ta pesa bamvutu na bangiufula na yandi mingi. Guillermo songaka Jorge na kukwisa na lukutakanu na Nzo ya Kimfumu. Yandi kwisaka, mpi banda ntangu yina, Jorge ke kondaka ve ata lukutakanu mosi, ata yandi ke salaka bakilometre 60 sambu na kukuma na Nzo ya Kimfumu.

Ata yo lombaka mbongo mingi kibeni, bankwelani zole yina kele Bambangi na Groenland salaka nzietelo ya bangunga sambanu na ka bwatu ya fioti sambu na kukuma na kisika yina bantu 280 ke zingaka. Bo samunaka kuna, bo kabulaka batrakiti, mpi bo songaka video ya jw.org na ndinga ya Groenland. Bo yantikaka mpi kulonguka Biblia ti bankwelani zole yina bo kutanaka ti bo. Ntangu yai bo ke longukaka Biblia mbala zole konso mposo na telefone.

Bikesa yina sukaka ve kaka na Ndambu ya Nordi. Bambangi ya Yehowa ya Nicaragua bakaka bangidika sambu na kukabula trakiti yina na bantu ya ke tubaka Kimayangna na bamfinda ya Caraïbes. Na nima ya kusala nzietelo bangunga 20 kukonda kupema na bisi mosi ya kufwa-kufwa na nzila yina me fuluka ti mabulu, bo tambulaka na makulu bangunga 11, bantangu ya nkaka na bapoto-poto ya mudindu, sambu na kukuma na bisika yina. Kuna, bo kabulaka batrakiti mpi bo songaka bavideo na Kimayangna; mpi bantu ya bisika yina vandaka na kiese ya mingi kibeni.

Estela pesaka trakiti na bakala mosi yina vandaka kuluta na mbanza mosi ya fioti na mfinda ya Amazone na Brésil. Bakala yina ndimaka trakiti, kansi yandi tulaka yo na poshi mpi yandi monisaka ve mpusa mingi. Ntangu bakala yina vandaka kuvutuka na nzo na yandi, motere ya bwatu na yandi fwaka mpi yandi telamaka na lweka ya nzadi. Ntangu yandi vandaka kuvingila lusadisu, yandi tangaka trakiti. Na nsadisa ya telefone na yandi ya maboko, yandi kotaka na jw.org, kisika yandi tangaka masolo mingi mpi bakaka ndambu ya bavideo. Bilumbu fioti na nima, bakala yina kutanaka ti bakala ya Estela mpi songaka yandi na kupesa Estela mersi sambu na trakiti yina. Yandi tubaka nde: “Masolo ya mono tangaka ntangu mono vandaka na lweka ya nzadi bwisaka mono ntima tii kuna bwatu mosi kwisaka kusadisa mono. Bana na mono ke zolaka bavideo ya Kalebi. Mono ta landa kukota na jw.org.”