Bantu ke tangaka mikanda ya Bambangi ya Yehowa na ntoto ya mvimba. Bantu mingi ke tangaka yo na nzila ya Internet, mutindu nge ke tanga yo ntangu yai. Kansi, yo lenda yitukisa nge kana nge zaba mutindu bisalu na beto ya kuniema mikanda ke salamaka. Mu mbandu na 2013, beto basisaka mikanda ya ke tendulaka Biblia na bandinga kiteso ya 700 mpi beto kabulaka yo na bansi 239.

Na ntwala ya mvu 1920, bakompani ya mumbongo vandaka kuniema mikanda na beto yonso. Na mvula yina, beto yantikaka kuniema bazulunalu mpi tumikanda ya nkaka na biro mosi ya fioti yina beto vandaka kufutila na Brooklyn, na New York. Kansi bubu yai, beto me kuma ti babiro 15 ya ke niemaka mikanda. Babiro yango kele na Afrika, na Amerika ya Nordi, na Amerika ya Sudi, na Australie, na Azia mpi na Eropa.

Biblia kele mukanda ya kuluta mfunu ya beto ke niemaka. Na 1942, beto niemaka Biblia ya ntete ya mvimba. Yo vandaka mbalula ya King James Version (Bible du roi Jacques) na Kingelesi. Banda 1961, beto ke balulaka mpi ke basisaka Biblia—Mbalula ya Nsi-Ntoto ya Mpa ya mvimba na volime mosi. Na 2013, beto basisaka Babiblia, bamilio kuluta 184 na bandinga 121.

Yo me suka pana ve. Babiblia ya beto ke basisaka ke zingaka mingi. Beto ke niemaka Babiblia na bapapie yina kele ve ti acide yina lenda kumisa yo zioni mpi beto ke kangisaka bapapie yango mbote kibeni. Na nima, Biblia mosi ya ngolo ke basikaka yina bantu lenda sadila konso kilumbu.

Beto ke niemaka mpi mikanda ya nkaka ya ke sadisaka bantu na kubakisa Biblia. Tala bantalu ya mikanda yina beto me basisaka banda 2013:

• Nzozulu ya Nkengi, kele zulunalu na beto ya ntete. Beto ke niemaka yo na bandinga kuluta 210 mpi yo kele zulunalu yina beto ke kabulaka mingi na nsi-ntoto ya mvimba. Beto ke niemaka bazulunalu 45000000 na konso nimero.

• Réveillez-vous ! kele zulunalu ya zole yina beto ke kabulaka mpi mingi; beto ke niemaka yo na bandinga 99. Na konso nimero, beto ke niemaka bazulunalu kiteso ya 44000000.

• Inki Biblia Kelongaka Mpenza? Mukanda yai kele ti balutiti 224.Beto me basisaka yo sambu na kusadisa bantu yina ke tanga yo na kubakisa malongi ya mfunu ya Biblia. Banda 2005, beto me niemaka mikanda yai bamilio kuluta 214 na bandinga kuluta 240.

• Widikila Nzambi. Kamukanda yai kele ti balutiti 32. Beto me basisaka yo sambu na kusadisa bantu yina ke tangaka mbote ve. Yo ke tendulaka bakieleka ya Biblia na mutindu ya pete na nzila ya bifwanisu ya kitoko mpi ya bansa ya nkufi na nsi ya bifwanisu yango. Beto me niemaka kamukanda yai bamilio kuluta 42 na bandinga kuluta 400.

Katula mikanda yai, Bambangi ya Yehowa ke niemaka mikanda, tumikanda mpi batrakiti mingi ya nkaka yina ke sadisaka balongoki ya Biblia na kuzwa bamvutu na bangiufula na bo, na kunwana ti mambu yina bo ke kutanaka ti yo, mpi na kuvanda ti mabuta ya kiese. Na 2012, bamasini ya ke niemaka mikanda ya Bambangi ya Yehowa niemaka bazulunalu bamiliare kuluta 1,3 mpi mikanda ti Babiblia bamilio 80.

Mbala mingi, bantu yina ke kwisaka kutala babiro na beto ya ke niemaka mikanda ke yitukaka ntangu bo ke monaka bampangi ya babakala mpi ya bankento ke sala kisalu yai. Bampangi yai yonso ke pesaka ntangu mpi ngolo na bo na kisalu ya kuniema mikanda. Ntangu bampangi yai ke kwisaka na Betele, disongidila “Nzo ya Nzambi,” bantu mingi na kati na bo ke zabaka ve kisalu ya kuniema mikanda. Kansi, bo ke pesaka bo formasio kaka na Betele mpi kisika yai ke sadisaka bo na kubaka formasio mbote. Yo ke butaka mbuma ya mbote. Mu mbandu, nge lenda mona batoko ya babakala ya kele ti bamvula 20 ti ndambu ke sala na masini ya ke niemaka mikanda ya ke salaka na vitesi ya ngolo mpi ya lenda niema bazulunalu 200000 ya balutiti 16 na ngunga mosi.

Na ntoto ya mvimba, kisalu ya Bambangi ya Yehowa ke salamaka na nsadisa ya makabu ya luzolo ya mbote. Nzozulu ya Nkengi ya Sioni (Kingelesi) ya Augusti 1879 bubu yai beto ke bingaka yo, Nzozulu ya Nkengi tubaka nde: “Beto ke ndima nde ‘Nzozulu ya Nkengi ya Sioni’ ke basikaka na lusadisu ya YEHOWA mpi sambu yo kele mutindu yina, yo ta lomba ve lusadisu ya bantu ata fioti.” Beto ke yindulaka kaka mutindu yai.

Sambu na nki beto ke bakaka ntangu mingi, ke basisaka mbongo mingi mpi ke salaka bikesa mingi na kisalu yai? Sambu beto ke tulaka ntima nde, kana nge tanga Biblia mpi mikanda ya beto ke niemaka to kana nge tanga yo na nzila ya Internet, yo ta sadisa nge na kukwenda pene-pene na Nzambi.