Bo ke bingaka mpi insi Indonésie nde “émeraude ya l’Équateur.” Bamilio ya bantu ya me fwaka makutu mpi ya ke waka ve mbote ke zingaka na insi yai. Sambu na kusadisa bo, Bambangi ya Yehowa ke basisaka mikanda ya mutindu na mutindu ya ke tendulaka Biblia na ndinga ya bidimbu ya Indonésie. Bo ke vandaka ti baprograme ya kulonga bantu na ndinga yina ya bidimbu. Bantu ke sepela ti bikesa yina Bambangi ya Yehowa ke sala.

Na 2016 na Medan (distrike ya Sumatra na nordi), Bambangi ya Yehowa yidikaka lukutakanu mosi ya tubilaka ndinga ya bidimbu ya Indonésie. Mfumu mosi ya leta ya ke talaka mambu ya me tala kutanina distrike yina kwisaka na lukutakanu yango sambu na kutala mambu yina ke salama kuna kukonda mavwanga. Yandi sikisaka Bambangi ya Yehowa sambu na manaka yina bo ke yidikaka sambu na kulonga bantu ya ofele. Mambu yina yandi monaka simbaka kibeni ntima na yandi. Yo yina yandi mekaka nkutu kuyimba na ndinga ya bidimbu mutindu bantu yina vukanaka vandaka kuyimba.

Muntu yina ke taninaka kisika yango tubaka nde: “Ata kisumbula mosi ve me salama. Mambu yonso me luta mbote kibeni. Mono ke yindula nde Bambangi ya Yehowa ta landa kuyidika balukutakanu ya mutindu yai sambu na bantu yina me fwaka makutu.” Yandi tubaka diaka nde ntangu munkwa ya kisika yina waka nde bo yidikaka lukutakanu yina sambu na bantu yina me fwaka makutu, yandi sepelaka kusala kima mosi sambu na Bambangi ya Yehowa: Yandi tubaka nde bo pesa konso muntu ya kele na lukutakanu yina bima ya kudia; bantu ya vukanaka na lukutakanu yina vandaka 300.

Bambangi ya Yehowa ke kwendaka mpi na bantu yina me fwaka makutu sambu na kulonga bo nsangu ya mbote ya kele na Biblia. Mbala mingi, Bambangi ya Yehowa ke songisaka bo bavideo na ndinga ya bidimbu ya Indonésie. Bo me salaka bavideo yango sambu na kusadisa bantu yina me fwaka makutu na kuzinga mbote mpi na kuvanda na kiese.

Mahendra Teguh Priswanto kele ntwadisi ya kimvuka mosi ya ke sadisaka bifwa-makutu na Indonésie na distrike ya Semarang (distrike ya Java Central). Yandi tubaka nde: “Yo me fwana kibeni nde bo sikisa beno sambu na mambu yina beno ke sala sambu na kulungisa bampusa ya bantu yina me fwaka makutu. Mu mbandu, video nge lenda vanda na dibuta ya kiese ke sadisa kibeni. Beto ta vanda na kiese kana beno ke landa kusala kisalu na beno.”

Bikesa yina Bambangi ya Yehowa ke salaka simbaka ntima ya nkento mosi ya me fwaka makutu. Zina na yandi Yanti. Yandi ke tuba nde: “Mbala mingi, bantu ke sekaka bantu yina me fwaka makutu. Kansi Bambangi ya Yehowa ke zolaka beto. Bamingi na kati na bo me longukaka ndinga ya bidimbu ata bo ke tubaka yo kaka sambu na kusadisa bantu yina me fwaka makutu na kuzaba Muntu Yina Me Salaka bantu mpi sambu bo vanda ti luzingu mosi ya mbote kuluta. Bikesa na bo simbaka kibeni ntima na mono.”

Yanti me kumaka Mbangi ya Yehowa mpi bubu, yandi ke salaka na kimvuka mosi ya ke balulaka bavideo na ndinga ya bidimbu ya Indénosie. Yandi ke tuba nde: “Mikanda yina beto ke basisaka ke sadisaka bantu yina ke longukaka ndinga ya bidimbu na kuzaba yo mbote, kansi yo ke monisaka mingi-mingi mutindu ya kuvanda ti luzingu ya kiese.”