Banda na Desembri 2012, Bambangi ya Yehowa ya Thaïlande salaka kampanie ya sipesiali sambu na kusadisa bana ya nzo-nkanda na kununga na nzo-nkanda. Bambangi ya Yehowa 20 ya kuyela kwendaka kutala banzo-nkanda ya Bangkok. Bo kutanaka ti ntwadisi ya konso nzo-nkanda mpi bo pesaka balongi ti bana ya nzo-nkanda Réveillez-vous ! ya Oktobri 2012, yina vandaka na ntu-diambu, “Mutindu ya Kununga na Nzo-Nkanda.”

Kampanie yai nungaka kibeni, yo yina Bambangi panzaka yo na insi yina ya mvimba. Mvula yina landaka mpi kati-kati ya mvula yina ya nkaka, bo kwendaka na banzo-nkanda 830 mpi bo monaka nde balongi ti bana ya nzo-nkanda vandaka ti mpusa ya ngolo ya kubaka nimero yina ya Réveillez-vous !, yo yina yo lombaka nde bo niema yo diaka mbala tatu sambu na kupesa bazulunalu yonso yina bantu lombaka. Na mbala ya ntete bo lombaka ba Réveillez-vous! kiteso ya 30000. Kansi, sambu bantu mingi kibeni sepelaka ti disolo yina, bo kabulaka bakopi kuluta 650000!

Bantwadisi ya nzo-nkanda mpi balongi ndimaka nswalu mfunu ya Réveillez-vous ! Longi mosi tubaka nde, “Zulunalu yai ta sadisa bana na beto ya nzo-nkanda na kuvanda ti bangwisana ya ngolo ti mabuta na bo mpi na kuditudila balukanu ya mbote.” Banzo-nkanda ya nkaka kotisaka mambu ya vandaka na zulunalu yina na manaka ya malongi yina bo fwete longa bana ya nzo-nkanda. Bankaka sadilaka mambu yina sambu na kutanga na nzo-nkanda. Na nzo-nkanda mosi, bo lombaka bana ya nzo-nkanda na kusala barapore ya me simbama na mambu ya kele na zulunalu yina, mpi bana yina sonikaka barapore ya mbote kuluta, bakaka matabisi.

Mwana ya nzo-nkanda mosi ya nkento sepelaka ti disolo “Kununga Mvita ya Kuvanda Nene Kuluta na Kileke” yina vandaka na zulunalu yai. Yandi tendulaka nde kuvanda nene kuluta kele diambu yina bantu mingi ke kutana ti yo mpi nde banduku na yandi ke zolaka ve kutubila yo ti bantu ya nkaka. Yandi tubaka nde, “Mersi sambu na bandongisila ya beno ke pesa; beto ke bakisa yo mbote mpi yo kele mpasi ve na kusadila.”

Bibuti mpi sepelaka ti mambu yina. Mama mosi monisaka ntonda na yandi sambu na zulunalu na Bambangi yina kwisaka kutala yandi na nzo; yandi tubaka nde, “Yo kele ti mambu ya mfunu yina ke sadisa mwana na mono ya nkento na kununga na nzo-nkanda.”

Pichai Petratyotin, mumonisi ya Bambangi ya Yehowa na Thaïlande tubaka nde, “Réveillez-vous ! ke bendaka dikebi na mayele ya me fwana yina kele na Biblia, mpi yina ke natilaka bantu mambote mingi bubu yai. Bambangi ya Yehowa ke ndimaka kibeni mfunu ya kulonguka, yo yina beto vandaka na kiese ya kupesa bantu yonso nimero yai ya Réveillez-vous ! ya ofele.”